[1] «Ni mɔgɔ min ye misi wala saga sonya ka a faga wala ka a feere, a ka misi sara misi duuru la ka saga sara saga naani la.
[2] Ni nson yera da karili la, ni a gosira fo ka a faga, jalaki yɔrɔ tɛ a fagali la,
[3] nka ni a kɛra tile fɛ, a fagabaa na jalaki a fagali kosɔn. Nson ka o fɛn sonyalen sara. Ni foyi tɛ a bolo, a yɛrɛ na feere ka a sara.
[4] Ni o fɛn sonyalen ɲɛnama yera a bolo, misi wo, fali wo, saga wo, a ka o sigiyɔrɔma fila sara.
[5] «Ni mɔgɔ min y'a to foro wala rezɛn nakɔtu ka tiɲɛn, ni a ye a ka bagan bila ka mɔgɔ wɛrɛ ka foro wala a ka rezɛn tu dun, a ka o sara ni a yɛrɛ ka foro la fɛnw wala a ka rezɛn tu la fɛnw bɛɛ la ɲumanw ye.
[6] «Ni tasuma tugura bin na fo ka taa ka ɲɔ jɔgɔ wala ɲɔ tigɛbali wala foro yɛrɛ jeni, o tasuma tugubaa ka a sara.
[7] «Ni mɔgɔ min ye wari wala fɛn wɛrɛ kalifa a mɔgɔɲɔgɔn ma, ko a k'a mara, ni a sonyara ka bɔ a ka so kɔnɔ, ni nson yera, a ka o sigiyɔrɔma fila sara.
[8] Ni nson ma ye, sotigi ka taa Ala ɲɛ kɔrɔ ka i kali ko a ma a bolo se a mɔgɔɲɔgɔn ka fɛn ma.
[9] «Ni nanbara kɛra misi ko la wala fali wala saga wala fini wala fɛn tununnen ko la, ni u bɛɛ ko u ta don, o mɔgɔ fila bɛɛ ka taa Ala ɲɛ kɔrɔ. Ni Ala ye min jalaki, o na o fɛn sigiyɔrɔma fila sara.
[10] «Ni mɔgɔ dɔ ye fali wala misi wala saga wala bagan sifa o sifa kalifa a mɔgɔɲɔgɔn ma, ko a ka o mara, ni o bagan sara, wala ni a yɔrɔ dɔ karila, wala ni a ɲɛmatununna, k'a sɔrɔ mɔgɔ si m'a ye,
[11] o tuma la, kalili na kɛ Matigi tɔgɔ la u cɛ, ko a marabaa bolo ma se a mɔgɔɲɔgɔn ka fɛn ma. Bagantigi ka sɔn o kalili ma, o marabaa kana a sara.
[12] Nka ni bagan sonyara a ka so, a na o bagan sara.
[13] Ni waradatɔ don, a ka na n'a ye ka a kɛ seere ye. A tɛna waradatɔ sara.
[14] «Ni mɔgɔ dɔ ye bagan singa a mɔgɔɲɔgɔn fɛ, ni o bagan yɔrɔ dɔ karila, wala ni a sara, k'a sɔrɔ bagantigi tɛ yen, min y'a singa, o ka a sara.
[15] Ni bagantigi bɛ yen, o mɔgɔ kana a sara. Ni a tun sofurula wari la, o wari n'a bɔ.
[16] «Ni cɛ dɔ ye npogotigi maminɛbali nɛgɛn ka da a fɛ, a ka a furu nafolo bɔ ka a furu.
[17] Ni npogotigi fa ma sɔn ka a denmuso di a ma, o cɛ ka npogotigi furu nafolo hakɛ sara.
[18] «Aw kana a to subaa muso ka balo.
[19] «Ni mɔgɔ dɔ jɛra bagan fɛ, wajibi don o tigi ka faga.
[20] «Ni mɔgɔ min ye saraka bɔ bato fɛn wɛrɛ ye ni Matigi kelen tɛ, o tigi ka halaki ka ban pewu.
[21] «I kana ko jugu kɛ siginfɛ la, i kana i fanga digi a la k'a masɔrɔ aw tun ye siginfɛw ye Misira jamana la.
[22] «I kana muso cɛ salen wala falatɔ tɔɔrɔ.
[23] Ni i ye u tɔɔrɔ, ni u kasira ne nɔ fɛ, ne na u kasikan lamɛn.
[24] Ne na dimin aw kɔrɔ kosɛbɛ ka aw faga ni npan ye. Aw musow na kɛ muso cɛ salenw ye, aw denw na kɛ falatɔw ye.
[25] «Ne ka mɔgɔ faantan min bɛ i fɛ yen, ni i ye juru don o la, i kana tɔnɔ ɲini a fɛ, janko tɔnɔ jugu.
[26] «Ni i ye i mɔgɔɲɔgɔn ka dulokiba minɛ fɛn dɔ kun kɔrɔ, i ka o kɔsegin a ma sani tile ka bi.
[27] A ka birifini kelenpe don, a farikolo la fini don. A na mun biri a la su fɛ? Ni a kasira ne nɔ fɛ, ne na a kasikan lamɛn, k'a masɔrɔ ne ye hinɛtigi ye.
[28] «I kana Ala neni. I kana i ka mɔgɔw kuntigi neni.
[29] «I kana mɛn ni i ma dɔ bɔ i ka suman kura kun fɔlɔ ni i ka rezɛn mɔ fɔlɔ la ka o di ne ma. I ka i denkɛ fɔlɔw fana di ne ma.
[30] I ka i ka misiw ni i ka sagaden fɔlɔw fana di ne ma. O ka tile wolonwula kɛ a ba kɔrɔ, a tile seginnan la i ka a di ne ma.
[31] «Aw ka kɛ mɔgɔ senumaw ye ne ye. Aw kana waradatɔ si dun. Aw ka o fili wuluw kɔrɔ.