[1] Matigi y'a fɔ Musa ye ko: «Ne na min kɛ Faraon na, i na o ye sisan. Bolo barikama n'a to a ka Israɛl bɔnsɔn bila ka taa. Bolo barikama n'a to a ka u gɛn ka bɔ a ka jamana la.»
[2] Ala kumana Musa fɛ ko kura k'a fɔ a ye ko: «Ne ye Matigi de ye.
[3] Ibrahima ni Isaka ni Yakuba ye ne dɔn ne tɔgɔ ‹Ala Sebaayabɛɛtigi› la, nka ne ma dɔn u fɛ ne tɔgɔ ‹Yawe› la.
[4] Ne ye ne ka layidu ta u ye ko ne na Kanan jamana di u ma, u tun kɛra siginfɛw ye o jamana min na ka kɔrɔ.
[5] Ne ye Israɛl ŋunankan mɛn u ka jɔnya kosɔn Misirakaw bolo. Ayiwa, ne ye ne hakili to ne ka layidu la.
[6] O de kosɔn i k'a fɔ Israɛl bɔnsɔn ye ko ne ye Matigi de ye. Ne na aw tila ka bɔ Misirakaw ka doniw kɔrɔ ka aw hɔrɔnya ka aw tila u ka jɔnya la. Ne na aw kisi ni bolo mɔɔnɔbɔlen ani kiri kobaw ye.
[7] Ne na aw kɛ ne ka mɔgɔ ye, ne na kɛ aw ka Ala ye. Aw na a dɔn ko ne ye Matigi aw ka Ala ye, o min bɛ aw tila ka bɔ Misirakaw ka doniw kɔrɔ.
[8] Ne ye ne kali ko ne na jamana min di Ibrahima ni Isaka ani Yakuba ma, ne na taa ni aw ye o jamana la k'a di aw ma ciyɛn ye. Ne ye Matigi de ye.»
[9] Musa kumana Israɛl bɔnsɔn fɛ ten, nka u ma Musa kan lamɛn, u ka dusukasi ni u ka jɔnya gɛlɛn kosɔn.
[10] Matigi y'a fɔ Musa ye ko:
[11] «I ka taa Misira masakɛ Faraon sɛgɛrɛ k'a fɔ a ye ko a ka Israɛl bɔnsɔn bila ka taa ka bɔ a ka jamana la.»
[12] Musa y'a fɔ Matigi ɲɛ kɔrɔ ko: «K'a sɔrɔ Israɛl bɔnsɔn ma ne ka kuma lamɛn, Faraon dun na ne lamɛn cogo di? Ne da man di.»
[13] Matigi kumana Musa ni Aron fɛ ko kura ka ci fɔ u ye Israɛl bɔnsɔn ni Misira masakɛ Faraon ko la, ko Israɛl bɔnsɔn ka taa ka bɔ Misira jamana la.
[14] U ka gwatigiw tɔgɔw filɛ ninw ye. Israɛl denkɛ fɔlɔ Rubɛn denkɛw: Henok ni Palu ni Hezrɔn ani Karmi. Olu tun ye Rubɛn ka gwaw ye.
[15] Simeɔn denkɛw: Jemuɛl ni Jamɛn ani Ohad ni Jokan ni Zokar ani Kananka muso denkɛ Saul. Olu tun ye Simeɔn ka gwaw ye.
[16] Levi denkɛw ni u bɔnsɔnw tɔgɔw filɛ ninw ye: Gersɔn ni Kehat ani Merari. Levi si tilew kɛra san kɛmɛ ni bisaba ani san wolonwula ye.
[17] Gersɔn denkɛw: Libni ni Simei ani u ka gwaw.
[18] Kehat denkɛw: Amram ni Jizehar ni Heborɔn ani Uziɛl. Kehat si tilew kɛra san kɛmɛ ni bisaba ani san saba ye.
[19] Merari denkɛw: Makili ni Musi. Olu tun ye Levi ka gwaw ni u bɔnsɔnw ye.
[20] Amram ye a fa dɔgɔmuso Jokebɛd furu, o ye Aron ni Musa bange a ye. Amram si tilew kɛra san kɛmɛ ni bisaba ani san wolonwula ye.
[21] Jizehar denkɛw: Korɛ ni Nefɛg ani Zikiri.
[22] Uziɛl denkɛw: Misaɛl ni Elzafan ani Sitri.
[23] Aron ye Eliseba furu, o tun ye Aminadab denmuso ye, Nakisɔn balimamuso tun don. Eliseba ye Nadab ni Abihu ni Eleazar ani Itamar bange Aron ye.
[24] Korɛ denkɛw: Asir ni Elkana ani Abiasaf. Olu tun ye Korɛ ka gwaw ye.
[25] Aron denkɛ Eleazar ye Putiɛl denmuso kelen furu, o ye Fineɛs bange a ye. Olu tun ye Levi bɔnsɔn kuntigiw ye ka kɛɲɛ ni u ka gwaw ye.
[26] Matigi kumana Aron ni Musa minw fɛ, ko u ka Israɛl bɔnsɔn labɔ Misira jamana la ka kɛɲɛ ni u ka gwaw ye, o Aron ni o Musa ko don.
[27] Mɔgɔ minw kumana Misira masakɛ Faraon fɛ, ko Israɛl bɔnsɔn ka bɔ Misira, o Musa ni o Aron ko don.
[28] Matigi kumana Musa fɛ Misira jamana la tuma min na,
[29] a y'a fɔ Musa ye ko: «Ne ye Matigi ye. Ne bɛ min fɔ i ye, i ka o bɛɛ fɔ Misira masakɛ Faraon ye.»
[30] Musa y'a fɔ Matigi ye ko: «Ne da man di, Faraon na ne lamɛn cogo di?»