[1] O tuma la Ala ye nin kuma bɛɛ fɔ ko:
[2] «Ne ye Matigi i ka Ala ye, min ye i labɔ Misira jamana jɔnya so la.
[3] «I kana bato fɛn wɛrɛ si kɛ i fɛ ne kɔ.
[4] «I kana ja dɛsɛlen si dila i yɛrɛ ye wala fɛn si bisigi, sankolo la fɛn wo, dugukolo kan fɛn wo, dugukolo jukɔrɔ ji la fɛn wo.
[5] I kana i biri u kɔrɔ, i kana baara kɛ u ye, katuguni ne, Matigi, i ka Ala, keleya bɛ ne la. Ne bɛ faw ka tilenbaliya hakɛ bɔ u denw la fo ka taa bila ne koniyabaaw bɔnsɔn sabanan ni a naaninan la.
[6] Minw bɛ ne kanu ka ne ka ci fɔlenw mara, ne bɛ makari olu bɔnsɔn waa caman la.
[7] «I kana Matigi i ka Ala tɔgɔ fɔ fuu, k'a masɔrɔ min bɛ Ala tɔgɔ fɔ fuu, Matigi tɛna o tigi ɲankatabali to.
[8] «I ka i hakili to lafiɲɛ don na ka a bila Ala ye.
[9] I ka baara kɛ tile wɔɔrɔ kɔnɔ ka i ka baara bɛɛ kɛ.
[10] Nka tile wolonwulanan don ye Matigi, i ka Ala lafiɲɛ don ye. I kana baara si kɛ o don na, e ni i denkɛ ni i denmuso ani i ka jɔnkɛ ni i ka jɔnmuso ani i ka baganw ni i ka siginfɛ min bɛ i ka so.
[11] K'a masɔrɔ Matigi ye sankolo ni dugukolo ni kɔgɔji ani u kɔnɔ fɛnw bɛɛ da tile wɔɔrɔ kɔnɔ ka i lafiya tile wolonwulanan don na. O de y'a to Matigi dubara lafiɲɛ don ye ka a saniya.
[12] «I ka i fa ni i ba bonya, walisa Matigi i ka Ala bɛ jamana min di i ma, i ka tilew ka caya o la.
[13] «I kana mɔgɔ faga.
[14] «I kana jatɔya kɛ.
[15] «I kana sonyali kɛ.
[16] «I kana nkalon da i mɔgɔɲɔgɔn na.
[17] «I ɲɛ kana bɔ i mɔgɔ ɲɔgɔn ka so fɛ. I ɲɛ kana bɔ i mɔgɔɲɔgɔn muso fɛ wala a ka jɔnkɛ wala a ka jɔnmuso fɛ, wala a ka misi wala a ka fali fɛ wala a bolo fɛn si fɛ.»
[18] Mɔgɔw bɛɛ ye sankulukan ni burukan mɛn ka san yɛgɛyɛgɛ ni kulu sisima ye. U y'o ye tuma min na, u yɛrɛyɛrɛla ka u jɔ yɔrɔ jan na.
[19] U y'a fɔ Musa ye ko: «E de ka kuma an fɛ, an na i lamɛn, nka Ala yɛrɛ kana kuma an fɛ, walisa an kana na sa.»
[20] Musa y'a fɔ mɔgɔw ye ko: «Aw kana siran, katuguni Ala nana ka aw kɔrɔbɔ, walisa aw ka siran a ɲɛ. Aw kana na jurumu kɛ.»
[21] Ayiwa, mɔgɔw tora yɔrɔ jan, nka Ala tun bɛ sankaba dibima min na, Musa gɛrɛla o la.
[22] Matigi y'a fɔ Musa ye ko a k'a fɔ Israɛl bɔnsɔn ye ko: «Aw yɛrɛw y'a ye ko ne kumana aw fɛ ka ne to sankolo la.
[23] Aw kana bato fɛn si dila aw yɛrɛw ye, warijɛ bato fɛn wala sanu bato fɛn, aw kana o si fara ne kan.
[24] I ka saraka bɔlan bɔgɔma jɔ ne ye ka i ka saraka jenitaw ni i ka nisɔndiya sarakaw ani i ka sagaw ni i ka misiw lase o kan. Ne tɔgɔ bɛ bonya yɔrɔ o yɔrɔ, ne bɛna bɔ aw ye yen ka duba aw ye.
[25] Ni i bɛ saraka bɔlan jɔ ne ye ni kabakurunw ye, i kana a jɔ ni kabakurun dɛsɛnenw ye, k'a masɔrɔ ni i bɛ i ka baarakɛ minanw da saraka bɔlan kan, o b'a nɔgɔ.
[26] I kana ne ka saraka bɔlan jɔ ka yɛlɛnyɛlɛnnan kɛ a la, mɔgɔ kana na a kan yɛlɛnbaa farilankolonya ye.