[1] Matigi y'a fɔ Musa ye ko: «I ka kabakurun walaha fila dɛsɛ i ko fɔlɔ taw. I ye walaha minw kari, kuma minw tun bɛ olu kan, ne na olu sɛbɛn u kan.
[2] I labɛn sani dugu ka jɛ. Ni dugu jɛra i ka yɛlɛn Sinayi kulu kan ka i jɔ ne ɲɛ kɔrɔ yen kulu kuncɛ la.
[3] Mɔgɔ si kana yɛlɛn ka taa i fɛ yen. Mɔgɔ si kana ye o kulu yɔrɔ si la fana. Sagaw ni misiw fana kana dumuni kɛ o kulu kɛrɛ fɛ.»
[4] Musa ye kabakurun walaha fila dɛsɛ i ko fɔlɔ taw. Musa solila ka wuli ka yɛlɛn Sinayi kulu kan, i ko Matigi y'a fɔ a ye cogo min na. O walaha fila tun bɛ a bolo.
[5] Matigi jiginna ka na sankaba la k'i jɔ a fɛ yen ka Matigi tɔgɔ fɔ.
[6] Matigi tɛmɛnna a ɲɛ kɔrɔ ka pɛrɛn ko: «Matigi, Matigi, makaritigi, hinɛtigi Ala. A tɛ dimin joona. A ka ɲumaya ni a ka kantigiya ka bon.
[7] A bɛ a ka kanuya mara bɔnsɔn nata waa caman ye. A bɛ tilenbaliya ni murutili ni jurumu yafa. A tɛ jo di jalakitigi ma. A bɛ faw ka tilenbaliya hakɛ bɔ u denw ni u mɔdenw la, fo ka taa se u bɔnsɔn yɛlɛma ko sabanan ni a naaninan ma.»
[8] O yɔrɔ nin bɛɛ Musa y'i biri duguma ka batoli kɛ.
[9] A ko: «Matigi, ni ne ye nɛɛma sɔrɔ i ɲɛ kɔrɔ, ne b'i deli i ka taa an fɛ, k'a masɔrɔ nin mɔgɔw tulow ka gɛlɛn. I ka an ka tilenbaliya ni an ka jurumu yafa an ma ka an minɛ ka kɛ i yɛrɛ ta ye.»
[10] Matigi ko: «A filɛ, ne bɛ layidu ta. Ne na kabakow kɛ i ka siya bɛɛ ɲɛ na, o bɔɲɔgɔnko kabakow ma kɛ fɔlɔ dugukolo yɔrɔ si la. I lamini siyaw bɛɛ na Matigi ka kɛwalew ye, katuguni ne na min kɛ ni i ye, o na kɛ siran koba ye.
[11] Ne bɛ ci minw fɔ i ye bi, i ka olu kɔlɔsi. A filɛ, ne na Amɔr siya ni Kanankaw ni Hɛti bɔnsɔn ani Ferɛz siya ni Hɛv siya ani Jebuskaw gɛn ka bɔ i ɲɛ.
[12] I bɛ don jamana min na, i yɛrɛ kɔlɔsi, i kana layidu ta o jamana mɔgɔw ye, walisa u kana na kɛ i minɛli jan ye.
[13] Nka aw ka u ka saraka bɔlanw ci ka u ka boli samasenw tiɲɛn ka u ka Astarte boliw tigɛ.
[14] I kana bato fɛn wɛrɛ si bato, katuguni Matigi tɔgɔ ye Keleya ye, Ala keleyama don.
[15] I ka i yɛrɛ kɔlɔsi, i kana layidu ta o jamana mɔgɔw ye, n'o kɛra, ni u bɛ jatɔya kɛ u ka bato fɛnw fɛ ka u ka bato fɛnw sɔn tuma min na, u dɔw na i wele, i fana na u ka sɔnnikɛ fɛn dɔ dun.
[16] Ni i ye u denmusow ta ka olu di i denkɛw ma, u denmusow na jatɔya kɛ u ka bato fɛnw fɛ. N'o kɛra, u na a to i denkɛw fana na jatɔya kɛ u ka bato fɛnw fɛ.
[17] «I kana nɛgɛ yeelelen si kɛ bato fɛn ye.
[18] «I ka buuru fununbali seli kɛ. I ka buuru fununbali dun tile wolonwula kɔnɔ waati latigɛlen na Abib kalo la, i ko ne y'a fɔ i ye cogo min na, katuguni i bɔra Misira Abib kalo la.
[19] «Den fɔlɔw bɛɛ ye ne ta ye, hali i ka baganw denkɛ fɔlɔw, misiw ni bagan misɛnw kɔni.
[20] I ka faliden fɔlɔ kunmabɔ ni sagaden ye. Ni i ma sɔn ka a kunmabɔ, i ka a kan kari. I ka i denkɛ fɔlɔ cɛmaw bɛɛ kunmabɔ. Mɔgɔ si bolo lankolon kana na ne ɲɛ kɔrɔ.
[21] «I ka baara kɛ tile wɔɔrɔ kɔnɔ ka i lafiya tile wolonwulanan la. I ka i lafiya danni kɛ tuma ni suman tigɛ tuma la.
[22] «I ka dɔgɔkunw seli kɛ, ani alikama suman kun fɔlɔ tigɛlen seli ani suman lasagonni seli san yɛlɛma tuma la.
[23] «I ka cɛw bɛɛ ka u yɛrɛw jira Matigi, Israɛl ka Ala ɲɛ kɔrɔ siɲɛ saba san o san.
[24] Ne na siyaw gɛn ka bɔ i ɲɛ ka i ka jamana dan yɔrɔw bonya. Ni i taara ka i yɛrɛ jira Matigi, i ka Ala ɲɛ kɔrɔ siɲɛ saba san o san, mɔgɔ siɲɛ tɛna bɔ i ka jamana fɛ.
[25] «I kana ne ka saraka joli ni buuru fununnen lase ɲɔgɔn fɛ. Tɛmɛnkan seli saraka kana si.
[26] «I ka na ni i ka suman kura kun fɔlɔ ye Matigi i ka Ala ka so kɔnɔ. «I kana baden tobi ni a ba nɔnɔ ye.»
[27] Matigi y'a fɔ Musa ye ko: «I ka o kumaw sɛbɛn, katuguni ne bɛ layidu ta i ni Israɛl ye ka kɛɲɛ ni o kumaw ye.»
[28] Musa ye tile binaani ni su binaani kɛ Matigi fɛ yen. A ma dumuni kɛ, a ma ji min. Matigi ye layidu kumaw, o kɔrɔ sariya tan, sɛbɛn o walahaw kan.
[29] Musa jiginna ka bɔ Sinayi kulu kan ni seereya walaha fila ye a bolo. A jiginnen ka bɔ kulu kan, a m'a dɔn ko a ɲɛda manamanana, o kɛra k'a masɔrɔ Matigi kumana a fɛ.
[30] Aron ni Israɛl bɔnsɔn bɛɛ ye Musa lajɛ tuma min na, a filɛ, a ɲɛda manamanana. U siranna, u ma se ka gɛrɛ a la.
[31] Ayiwa, Musa ye u wele, Aron ani jama kuntigiw bɛɛ seginna a yɔrɔ. Musa kumana u fɛ.
[32] O kɔ, Israɛl bɔnsɔn bɛɛ y'u madon. Matigi kumana Musa fɛ ko minw na k'a to Sinayi kulu kan, a ye olu bɛɛ fɔ u ye.
[33] Musa tilara a ka kuma la u fɛ tuma min na, a ye fini dɔ biri a ɲɛda la.
[34] Ni Musa tun bɛ don Matigi ɲɛ kɔrɔ, a tun bɛ o fini bɔ a ɲɛda la, fo a ka bɔ yen. Ni a tun bɔra yen tuma min na, min fɔra a ye, a tun bɛ o fɔ Israɛl bɔnsɔn ye.
[35] Israɛl bɔnsɔn ye Musa ɲɛda manamanatɔ ye. Musa ye o fini biri a ɲɛda la ko kura, fo a ka don yen ka kuma Matigi fɛ.