[1] Matigi y'a fɔ Musa ye ko: «I ka taa Faraon yɔrɔ. Ne ye ale ni a ka mɔgɔw dusukunw gɛlɛya, walisa ne ka ne ka taamashyɛnw kɛ u cɛma ka dafa.
[2] Ne ye Misirakaw minɛ ko juguya cogo min na, ani ne ye kabako minw kɛ u cɛma, ne ye olu kɛ walisa i ka o bɛɛ lakali i denw ni i mɔdenw ye badaa. Aw n'a dɔn o de la ko ne ye Matigi ye.»
[3] Musa ni Aron taara Faraon yɔrɔ k'a fɔ a ye ko Matigi, Hɛburuw ka Ala ko: «I b'i ban k'i yɛrɛ majigin ne ye fo tuma jumɛn? I ka ne ka mɔgɔw bila ka taa ka baara kɛ ne ye.
[4] Ni i ma sɔn ka ne ka mɔgɔw bila, sini ne na ntɔn ci i ka jamana fan bɛɛ la.
[5] U na dugukolo yɔrɔ bɛɛ datugu, fo mɔgɔ tɛ se ka dugukolo ye. Aw ka fɛn o fɛn tora sanbɛlɛ kɔ, ani jiri fɛn o fɛn falenna aw ka forow la, u na o bɛɛ dun.
[6] I ka sow ni i ka jɔnw ka sow ani Misirakaw bɛɛ ka sow na fa ntɔn na. I bɛnbaw ma o ɲɔgɔn ye kabini u bange tuma la fo ka na se bi ma.» Musa y'i yɛlɛma ka taa ka bɔ Faraon kɔrɔ.
[7] Faraon ka mogɔw y'a fɔ a ye ko: «Nin cɛ na to ka an tɔɔrɔ fo tuma jumɛn? I ka o mɔgɔw bila ka taa ka baara kɛ Matigi u ka Ala ye. I m'a dɔn fɔlɔ ko Misira tiɲɛnna ka ban wa?»
[8] Musa ni Aron welela ka taa Faraon yɔrɔ ko kura. A y'a fɔ u ye ko: «Aw ka taa baara kɛ Matigi aw ka Ala ye, nka aw ka mɔgɔw jɔn ni jɔn bɛ taa?»
[9] Musa ko: «An bɛ taa ni an ka denmisɛnw ni an ka mɔgɔ kɔrɔbaw ni an denkɛw ni an denmusow ni an ka bagan misɛnw ni an ka bagan kunbaw ye, katuguni an ka kan ka seli don bila Matigi ye.»
[10] Faraon y'a fɔ u ye ko: «Matigi ka to aw fɛ. Ne ka aw ni aw denw bila ka taa wa? Aw ka aw yɛrɛw kɔlɔsi, aw ka miirili man ɲi dɛ.
[11] O tɛna kɛ. Aw cɛw dama ka taa ka baara kɛ Matigi ye, sabu aw ye o de deli.» Musa ni Aron gɛnna ka bɔ Faraon ɲɛ kɔrɔ.
[12] Matigi y'a fɔ Musa ye ko: «I ka i bolo mɔɔnɔbɔ Misira jamana kun na, walisa ntɔn ka na Misira jamana la. Bin min tora sanbɛlɛ kɔ, ntɔn na o bɛɛ dun.»
[13] Musa ye a ka bere yankan Misira jamana kun na. Matigi ye fiɲɛba ci ka bɔ kɔrɔn fɛ ka tile ni su bɛɛ kɛ. Dugujɛda y'a sɔrɔ ntɔn nana o kɔrɔn fɛ fiɲɛ fɛ.
[14] Ntɔn sera Misira jamana bɛɛ la ka jigin fan bɛɛ la. U cayara cogo min na, o ɲɔgɔn tun ma kɛ abada, a tɛna kɛ tun.
[15] U ye dugukolo bɛɛ datugu, jamana dibina. Bin ni jiriden minw tora sanbɛlɛ kɔ, u ye o bɛɛ dun. Fura kɛnɛ si ma to jiri wala bin na Misira jamana yɔrɔ si la.
[16] O tuma la Faraon tɛliyara ka Musa ni Aron wele. A ko: «Ne ye Matigi aw ka Ala hakɛ ta, ka aw hakɛ ta.
[17] Ayiwa, sisan aw ka yafa ne ma nin kelen na ka Matigi aw ka Ala deli, walisa a ka nin fagali bere mabɔ ne la.»
[18] Musa bɔra Faraon kɔrɔ ka Matigi deli.
[19] Matigi ye fiɲɛba ci ka bɔ tilebi yanfan fɛ. O taara ni ntɔn ye k'u fili Kɔgɔji Bilen na. Hali ntɔn kelenpe ma to Misira jamana yɔrɔ si la.
[20] Nka Matigi ye Faraon dusukun gɛlɛya. A ma Israɛl bɔnsɔn bila ka taa fewu.
[21] Matigi y'a fɔ Musa ye ko: «I bolo kɔrɔta san fɛ, walisa dibi kologirinba ka don Misira jamana fan bɛɛ la, fo mɔgɔw ka mɔmɔli kɛ dibi la.»
[22] Musa ye a bolo kɔrɔta san fɛ, dibi kologirinba donna Misira jamana fan bɛɛ la tile saba kɔnɔ.
[23] Mɔgɔw ma se ka ɲɔgɔn ye. Mɔgɔ si ma wuli ka bɔ a ka yɔrɔ la o tile saba kɔnɔ, nka kɛnɛ tun bɛ Israɛl bɔnsɔn ka yɔrɔw la.
[24] Faraon ye Musa wele, a ko: «Aw ka taa baara kɛ Matigi ye. Aw ka denmisɛnw ka taa aw fɛ. Aw ka bagan misɛnw ni aw ka bagan kunbaw dama ka to yan.»
[25] Musa ko: «I yɛrɛ ka sarakaw ni saraka jenitaw di an ma, walisa an ka saraka faga Matigi an ka Ala ye.
[26] An ka baganw na taa an fɛ, hali ntɔrɔn kelenpe tɛna to an kɔ, katuguni an ka kan ka u dɔw saraka Matigi an ka Ala ye. An ka kan ka min saraka Matigi an ka Ala ye, an tɛ o dɔn sani an ka se yen.»
[27] Nka Matigi ye Faraon dusukun gɛlɛya, a ma sɔn ka mɔgɔw bila ka taa fewu.
[28] Faraon y'a fɔ Musa ye ko: «Taa ka bɔ ne kɔrɔ. I yɛrɛ kɔlɔsi, i kana ne ɲɛda ye tun, k'a masɔrɔ ni i ye ne ɲɛda ye don min na, i na sa o don yɛrɛ la.»
[29] Musa ko: «I ye tiɲɛ fɔ, ne tɛna i ɲɛda ye tun.»