[1] Matigi y'a fɔ Musa ye ko: «I k'a fɔ Aron ye ko a ka bere ta a bolo ka a yankan baw ni kɔw ani dalaw kun na, ko ntoriw ka yɛlɛn Misira jamana kɔnɔ.»
[2] Aron ye a bolo yankan Misira jiw bɛɛ kun na. Ntoriw yɛlɛnna ka Misira jamana bɛɛ datugu.
[3] Nka dɔnbaaw fana y'o kɛ ni u ka dɔnbaaya kow ye ka ntoriw yɛlɛn Misira jamana kɔnɔ.
[4] Faraon ye Musa ni Aron wele, a ko: «I ka Matigi deli ko a ka ntoriw mabɔ ne ni ne ka mɔgɔw la. Ne na Israɛl bɔnsɔn bila ka taa saraka bɔ Matigi ye.»
[5] Musa y'a fɔ Faraon ye ko: «O ko kɛ waati fɔli bonya ye i ta ye. Ne ka Matigi deli i ni i ka jɔnw ani i ka mɔgɔw ye tuma jumɛn, walisa a ka ntoriw mabɔ i ni i ka sow la? U na to baji la dɔrɔn.»
[6] Faraon ko: «Sini.» Musa ko: «I ye min fɔ, o na kɛ, walisa i k'a dɔn ko Matigi, an ka Ala bɔɲɔgɔnko si tɛ.
[7] Ntoriw na taa ka bɔ i ni i ka jɔnw ani i ka mɔgɔw ɲɛ kɔrɔ ka bɔ i ka sow la. U na to baji la dɔrɔn.»
[8] Musa ni Aron bɔra Faraon ka so. Matigi ye Faraon tɔɔrɔ ni ntori minw ye, Musa kasira Matigi nɔ fɛ olu ko la.
[9] Musa ye min deli, Matigi ye o kɛ. Ntoriw sara sow ni duw kɔnɔ ani forow la.
[10] Mɔgɔw ye u cɛ ka u tonton. Jamana kasa goyara.
[11] Faraon y'a ye ko o ko nɔgɔyara, a ye a dusukun gɛlɛya. A ma Musa ni Aron lamɛn. O kɛra ka kɛɲɛ ni Matigi ka kuma fɔlen ye.
[12] Matigi y'a fɔ Musa ye ko: «I k'a fɔ Aron ye, ko a ka bere kɔrɔta ka dugukolo buguri gosi. Buguri na yɛlɛma ka kɛ nkarankaw ye Misira jamana fan bɛɛ la.»
[13] U y'a kɛ ten. Aron ye a bolo kɔrɔta ni bere ye ka dugukolo buguri gosi. Buguri yɛlɛmana ka kɛ nkarankaw ye mɔgɔw ni baganw kan. Dugukolo buguri kɛra nkarankaw ye Misira jamana fan bɛɛ la.
[14] Dɔnbaaw ye u ka dɔnbaaya kow kɛ ko u na nkarankaw bɔ, nka u ma se. Nkarankaw tun bɛ mɔgɔw ni baganw kan.
[15] Dɔnbaaw y'a fɔ Faraon ye ko: «Nin ye Ala bolomako ye koyi.» O bɛɛ n'a ta Faraon ye a dusukun gɛlɛya, a ma Musa ni Aron lamɛn. O kɛra ka kɛɲɛ ni Matigi ka kuma fɔlen ye.
[16] Matigi y'a fɔ Musa ye ko: «I ka soli ka wuli ka Faraon kunbɛn, a bɛna bɔ ka taa ba da la. I k'a fɔ a ye ko Matigi ko: ‹I ka ne ka mɔgɔw bila ka taa ka baara kɛ ne ye.
[17] N'o tɛ, ni i ma sɔn ka ne ka mɔgɔw bila, ne na dimɔgɔw jugu caman caman ci i ni i ka jɔnw ani i ka mɔgɔw ma, u na don i ka sow kɔnɔ. Misirakaw ka sow bɛɛ na fa dimɔgɔw la, u na dugukolo datugu.
[18] Nka o don na ne na faranfasili kɛ i ni Gosɛn jamana cɛ, ne ka mɔgɔw sigilen bɛ yɔrɔ min na. Dimɔgɔ si tɛna sɔrɔ Gosɛn jamana la, walisa i k'a dɔn ko ne, Matigi, ne bɛ o jamana la.
[19] Ne na faranfasili kɛ i ka mɔgɔw ni ne ka mɔgɔw cɛ. O taamashyɛn na kɛ sini.›»
[20] Matigi y'a kɛ ten. Dimɔgɔ jugu kuluba caman donna Faraon ni a ka jɔnw ka sow kɔnɔ. Jamana bɛɛ tiɲɛnna dimɔgɔw fɛ.
[21] Faraon ye Musa ni Aron wele, a ko: «Aw ka taa saraka bɔ aw ka Ala ye ka aw to nin jamana kɔnɔ.»
[22] Musa ko: «O tɛ bɛn k'a masɔrɔ an na Misirakaw tana saraka Matigi, an ka Ala ye. Ni an bɛ Misirakaw tana saraka u ɲɛ na, u tɛna an bon ni kabakurunw ye wa?
[23] An na taa ka tile saba taama kɛ kungokolon kɔnɔ ka saraka bɔ Matigi, an ka Ala ye, i ko a y'a fɔ an ye cogo min na.»
[24] Faraon ko: «Ne na aw bila ka taa saraka bɔ Matigi, aw ka Ala ye kungokolon kɔnɔ. Nka aw kana taa yɔrɔ jan. I ka Ala deli ne ye.»
[25] Musa ko: «Ne bɔtɔ filɛ i ɲɛ kɔrɔ, ne na Matigi deli. Dimɔgɔw na taa ka bɔ Faraon ni a ka jɔnw ani a ka mɔgɔw ka sow kɔnɔ sini, nka i kana nanbara kɛ tun, ka i ban ka mɔgɔw bila ka taa saraka bɔ Matigi ye.»
[26] Musa bɔra Faraon yɔrɔ la ka Matigi deli.
[27] Musa ye min deli, Matigi ye o kɛ. A ye dimɔgɔw gɛn ka bɔ Faraon ni a ka jɔnw ani a ka mɔgɔw yɔrɔ la. Dimɔgɔ si ma to yen.
[28] Faraon kɔni ye a dusukun gɛlɛya ko kura. A ma sɔn ka mɔgɔw bila ka taa.