[1] Matigi kumana Musa fɛ ko: «I ye nin mɔgɔ minw labɔ Misira jamana la, i ni olu ka wuli ka bɔ yan. Ne ye ne kali Ibrahima ni Isaka ani Yakuba ye jamana min ko la ko ne na a di u bɔnsɔn ma, i ka taa yen.
[2] Ne na mɛlɛkɛ dɔ bila ka taa i ɲɛ. Ne na Kanankaw ni Amɔr siya ni Hɛti bɔnsɔn ani Ferɛz siya ni Hɛv siya ani Jebuskaw gɛn ka bɔ o jamana la.
[3] Jamana min falen bɛ nɔnɔ ni di la fo ka woyo, aw ka yɛlɛn ka taa yen. Ne tɛna taa yen aw cɛma walisa ne kana na aw halaki ka an to sira la, katuguni aw ye siya tulo gɛlɛn de ye.»
[4] Mɔgɔw bɛɛ ye o kibaru jugu mɛn tuma min na, u ɲɛnasisira. Mɔgɔ si ma a yɛrɛ masiri.
[5] Matigi y'a fɔ Musa ye ko, a k'a fɔ Israɛl bɔnsɔn ye ko: «Aw ye siya tulo gɛlɛn de ye. Ni ne taara aw cɛma hali waati dɔɔnin, ne na aw halaki. O de kosɔn aw ka aw ka masiriw bɔ aw la sisan, walisa ne bɛna min kɛ aw la, ne ka o dɔn.»
[6] Israɛl bɔnsɔn ye u ka masiriw bɔ u la ka u mabɔ Horɛb kulu la.
[7] Ayiwa, Musa ye finiso ta ka a jɔ bugufyɛ kɔ fɛ ka o yɔrɔ janya bugufyɛ la dɔɔnin ka a tɔgɔ da ko ɲɔgɔn kunbɛn finiso. Mɔgɔ o mɔgɔ tun bɛ Matigi ɲini, o tun bɛ bɔ ka taa o ɲɔgɔn kunbɛn finiso la bugufyɛ kɔ fɛ.
[8] Ni Musa tun bɛ bɔ ka taa finiso la tuma o tuma, mɔgɔw bɛɛ kelen-kelen tun bɛ wuli ka u jɔ u yɛrɛw ka finisow da la ka Musa taatɔ filɛ, fo a ka don finiso kɔnɔ.
[9] Ni Musa tun donna finiso kɔnɔ tuma min na, kabasen tun bɛ jigin ka jɔ finiso da la. Matigi kumana Musa fɛ.
[10] Ni mɔgɔw tun ye o kabasen jɔlen ye finiso da la tuma min na, mɔgɔw bɛɛ tun bɛ u jɔ ka batoli kɛ ka u bɛɛ kelen-kelen to u yɛrɛw ka finisow da la.
[11] Matigi kumana Musa fɛ ɲɛda ni ɲɛda, i n'a fɔ mɔgɔ bɛ kuma a teri fɛ. Musa kɔseginna ka taa bugufyɛ la, nka a ka baaraden kamalen, Nun denkɛ Josue, o ma bɔ finiso kɔnɔ.
[12] Musa y'a fɔ Matigi ye ko: «A filɛ, i b'a fɔ ne ye, ko ne ka taa ni nin mɔgɔw ye, k'a sɔrɔ i na min ci ka taa ne fɛ, i ma o tigi fɔ ne ye. O bɛɛ n'a ta, i ko i bɛ ne dɔn ne tɔgɔ la, ko ne ye nɛɛma sɔrɔ i ɲɛ kɔrɔ.
[13] Ne bɛ i deli sa, ni ne ye nɛɛma sɔrɔ i ɲɛ kɔrɔ i ka i cogo jira ne la, walisa ne ka i dɔn, ne ka nɛɛma sɔrɔ i ɲɛ kɔrɔ. I ka nin siya jate i ka mɔgɔw ye fana.»
[14] Matigi ko: «Ne yɛrɛ na taa i fɛ, ne na lafiya di i ma.»
[15] Musa y'a fɔ a ye ko: «Ni i yɛrɛ tɛ taa an fɛ, i kana an ta ka bɔ yan fewu.
[16] A bɛ dɔn k'a jɛya cogo di ko ne ni i ka mɔgɔw ye nɛɛma sɔrɔ i ɲɛ kɔrɔ, fo ni i taara an fɛ ka faranfasi don ne ni i ka mɔgɔw ani dugukolo kan siyaw bɛɛ cɛ?»
[17] Matigi y'a fɔ Musa ye ko: «I ye min deli, ne na o fana kɛ, katuguni i ye nɛɛma sɔrɔ ne ɲɛ kɔrɔ, ne bɛ i dɔn i tɔgɔ de la.»
[18] Musa ko: «Ne b'i deli, i ka i nɔɔrɔ jira ne la.»
[19] Matigi ko: «Ne na ne ka ɲumaya bɛɛ tɛmɛn i ɲɛ kɔrɔ ka Matigi tɔgɔ welewele da i ɲɛ kɔrɔ. Ne b'a fɛ ka nɛɛma kɛ mɔgɔ minw ye, ne na nɛɛma kɛ olu ye. Ne b'a fɛ ka makari mɔgɔ minw na, ne na makari olu de la.»
[20] Matigi ko: «I tɛ se ka ne ɲɛda ye, katuguni mɔgɔ si tɛna ne ye k'a ɲɛnama to.»
[21] Matigi ko: «Yɔrɔ dɔ filɛ ne kɛrɛ fɛ yan, i ka i jɔ fara kan.
[22] Ni ne nɔɔrɔ bɛ tɛmɛn tuma min na, ne na i don o fara cilen na, ne tɛmɛntɔ na ne bolo biri i kan.
[23] O kɔ, ne na ne bolo bɔ yen. I na ne kɔ ye, nka ne ɲɛda tɛna ye.»