[1] «I ka nin kow kɛ u la ka u saniya, walisa u ka sarakalasebaaya baara kɛ ne ye. «I ka nturabɔlan fiɲɛntan ni sagajigi fila fiɲɛntan minɛ.
[2] I ka buurukun fununbaliw fana ta ani buuru misɛn fununbali tulumaw ani furufuru fununbaliw, tulu funfunnen u kan. I ka u dila ni alikama mugu tɛntɛnnen ye.
[3] I ka olu bila cɛrɛ kɔnɔ ka na ni u ye cɛrɛ kɔnɔ, olu ni ntura ni sagajigi fila.
[4] «I ka Aron ni a denkɛw madon ɲɔgɔn kunbɛn finiso da la ka u ko ji la.
[5] I ka u ka finiw ta ka turuti don Aron kan na ani efɔd kan don forokiya ni efɔd ani disila fɛn, ka a cɛ siri ni cɛ sirilan ye.
[6] I ka jalamugu meleke Aron kun na ka sanu falafala siri jalamugu la.
[7] I ka munli tulu ta ka a yɛlɛma a kun na ka a mun ni o ye.
[8] I ka Aron ni a denkɛw cɛ siri ni cɛ sirilanw ye,
[9] ka banfulaw don Aron denkɛw kun na. Sarakalasebaaya ka kɛ u ta ye ka kɛɲɛ ni sariya wulibali ye. I ka Aron ni a denkɛw bila Ala ye o cogo la.
[10] «I ka na ni ntura ye ɲɔgɔn kunbɛn finiso da la. Aron ni a denkɛw ka u bolow da ntura kunkolo kan.
[11] I ka ntura kan tigɛ Matigi ɲɛ kɔrɔ ɲɔgɔn kunbɛn finiso da la.
[12] I ka ntura joli dɔ ta ka a kɛ i bolonkɔni la k'a kɛ saraka bɔlan bi ɲɛkolow la, ka o joli tɔ bɛɛ seri saraka bɔlan ju kɛrɛ la.
[13] I ka a nugula kɛn bɛɛ ani a biɲɛ ani a kɔla kuru fila ani kɔla kuru la kɛn bɛɛ ta ka u jeni saraka bɔlan kan.
[14] Nka i ka ntura sogo ni a wolo ni a bo jeni ni tasuma ye aw ka bugufyɛ kɔ fɛ. O ye jurumu yafa saraka ye.
[15] «I ka sagajigi kelen fana ta, Aron ni a denkɛw ka u bolow da o sagajigi kunkolo kan.
[16] I ka o sagajigi kan tigɛ ka a joli ta ka a seriseri saraka bɔlan fan bɛɛ kan.
[17] I ka sagajigi boso ka a kɔnɔ fɛnw ni a senw ko ka u bila a sogo bosolen ni a kunkolo kan.
[18] I ka sagajigi bɛɛ jeni saraka bɔlan kan. O ye saraka jenita ye Matigi ye. Tasuma la saraka don. O suma ka di Matigi ye.
[19] «I ka sagajigi filanan ta. Aron ni a denkɛw ka u bolow da o kunkolo kan.
[20] I ka sagajigi kan tigɛ ka a joli dɔ ta ka o kɛ Aron kininfɛ tulo nunkun kan, ani a denkɛw kininfɛ tulo nunkun kan, ani u kininfɛ bolonkɔni kunbaw kan ani u kininfɛ sennkɔni kunbaw kan. A joli tɔ ka seriseri saraka bɔlan fan bɛɛ kan.
[21] Joli min bɛ saraka bɔlan kan, i ka o dɔ ta ani munli tulu dɔ ka u seriseri Aron ni a ka finiw kan ani a denkɛw ni u ka finiw kan. O cogo la Aron ni a ka finiw na saniya ani a denkɛw ni u ka finiw.
[22] «I ka o sagajigi kɛn ani a kukala ni a nugula kɛn ani a biɲɛ ni a kɔlakuru fila ni kɔlakuruw la kɛn ani a kininfɛ woro ta. O ye mɔgɔ sigili sagajigi saraka ye.
[23] Buurukun fununbali cɛrɛ min bilara Matigi ɲɛ kɔrɔ, i ka buuru misɛn kun kelen ani buuru misɛn tuluma kun kelen ani furufuru kelen bɔ o la.
[24] I ka o fɛnw bɛɛ don Aron ni a denkɛw bolo ka u finifana ka kɛ saraka finifanata ye Matigi ɲɛ kɔrɔ.
[25] O kɔ, i ka o fɛnw bɔ u bolo ka olu jeni saraka bɔlan kan saraka jenita kan. Tasuma la saraka don Matigi ye. O suma ka di Matigi ye.
[26] I ka Aron sigili sagajigi saraka disi ta ka a finifana ka kɛ saraka finifanata ye Matigi ɲɛ kɔrɔ. O ye i niyɔrɔ de ye.
[27] I ka Aron ni a denkɛw sigili sagajigi disi ni a woro saniya, disi ka kɛ saraka finifanata ye, a woro ka kɛ saraka kɔrɔtata ye.
[28] O na kɛ Aron ni a denkɛw niyɔrɔ ye, sariya wulibali don Israɛl bɔnsɔn kan. A na kɛ saraka kɔrɔtata ye ka bɔ Israɛl bɔnsɔn ka nisɔndiya sarakaw la, u ka saraka kɔrɔtata don Matigi ye.
[29] «Aron ka fini senumaw ka kɛ a denkɛw ta ye a kɔ. Olu ka mun ni tulu ye ka sigi Ala ye ni o finiw ye u kan na.
[30] Aron denkɛ min bɛ sigi a nɔ na sarakalasebaaya la, o ka o finiw don a kan na tile wolonwula kɔnɔ, ni a bɛ don ɲɔgɔn kunbɛn finiso kɔnɔ ka baara kɛ yɔrɔ senuma la tuma min na.
[31] «I ka mɔgɔ sigili sagajigi saraka sogo ta ka a balabala yɔrɔ senuma dɔ la.
[32] Aron ni a denkɛw ka o sagajigi sogo ni cɛrɛ la buuru dun ɲɔgɔn kunbɛn finiso da la.
[33] Fɛn minw kɛra ka jurumu kafari ka u bila ka u saniya, u ka olu dun, nka mɔgɔ wɛrɛ kana u dun, katuguni u ka senu.
[34] Ni o mɔgɔ sigili saraka sogo wala o buuru tɔ sira, i ka a jeni ni tasuma ye. A kana dun, katuguni a ka senu.
[35] «Ne ye ci minw fɔ i ye, i ka olu bɛɛ kɛ Aron ni a denkɛw la ka tile wolonwula kɛ u sigili la Ala ye.
[36] I ka jurumu yafa saraka ntura lase don o don ka jurumu kafari. I ka saraka bɔlan jɛya ni o jurumu yafa saraka ye ka a mun ni tulu ye ka a saniya.
[37] I ka jurumu kafari saraka bɔlan kosɔn tile wolonwula kɔnɔ ka a saniya. Saraka bɔlan na kɛ fɛn senuma senuma ye. Ni fɛn o fɛn magara a la, o fana na kɛ fɛn senuma ye.
[38] «I ka fɛn minw lase saraka bɔlan kan don o don, olu filɛ ninw ye: san kelen sagaden fila, o kana dabila.
[39] I ka sagaden kelen lase sɔgɔma fɛ ka kelen lase wula fɛ.
[40] I ka mugu tɛntɛnnen kilo saba ta, ka litiri kelen olive mɔ susulen tulu fana ta ka u ɲaami ɲɔgɔn na. I ka olu ni sagaden kelen lase ɲɔgɔn fɛ. Diwɛn litiri kelen ka kɛ saraka bɔnta ye.
[41] I ka sagaden dɔ lase wula fɛ, ka sɔgɔma mugu saraka ni sɔgɔma saraka bɔnta bɔɲɔgɔnkow kɛ a la. O suma ka di, tasuma la saraka don Matigi ye.
[42] O na kɛ don o don saraka jenita ye aw bɔnsɔn nataw bɛɛ la ɲɔgɔn kunbɛn finiso da la Matigi ɲɛ kɔrɔ. Ne na aw kunbɛn o yɔrɔ la ka kuma i fɛ.
[43] Ne bɛna bɔ Israɛl bɔnsɔn ye o yɔrɔ la. Ne nɔɔrɔ na o yɔrɔ saniya.
[44] Ne na ɲɔgɔn kunbɛn finiso ni saraka bɔlan saniya ka Aron ni a denkɛw fana saniya, walisa u ka sarakalasebaaya baara kɛ ne ye.
[45] Ne na sigi Israɛl bɔnsɔn cɛma ka kɛ u ka Ala ye.
[46] U n'a dɔn ko ne ye Matigi u ka Ala ye, ko ne ye u labɔ Misira jamana la, walisa ne ka sigi u cɛma. Ne ye Matigi, u ka Ala de ye.