[1] Ayiwa, Matigi y'a fɔ Musa ye ko: «A filɛ, ne bɛ i kɛ i n'a fɔ Ala, Faraon ɲɛ na. I kɔrɔkɛ Aron na kɛ i ka kira ye.
[2] Ne bɛna ci minw fɔ i ye, i ka olu bɛɛ fɔ. I kɔrɔkɛ Aron na kuma Faraon fɛ ko a ka Israɛl bɔnsɔn bila ka taa ka bɔ a ka jamana la.
[3] Ne na Faraon dusukun gɛlɛya. Ne na ne ka taamashyɛnw ni ne ka kobaw caya Misira jamana la,
[4] nka Faraon tɛna aw lamɛn fewu. Ne na ne bolo da Misira kan ka ne ka kɛlɛbolow, ne ka mɔgɔw, Israɛl bɔnsɔn labɔ Misira jamana la ni kiri kobaw ye.
[5] Ni ne ye ne bolo mɔɔnɔbɔ Misira kun na don min na ka Israɛl bɔnsɔn tila ka u bɔ u cɛma, o tuma la Misirakaw n'a dɔn ko ne ye Matigi de ye.»
[6] Musa ni Aron y'a kɛ ten. Matigi tun ye ci minw fɔ u ye, u ye olu kɛ.
[7] Musa ni Aron kumana Faraon fɛ don min na, Musa si tun ye san bisegin sɔrɔ, Aron si tun ye san bisegin ni saba sɔrɔ.
[8] Matigi y'a fɔ Musa ni Aron ye ko:
[9] «Ni Faraon y'a fɔ aw ye ko aw ka taamashyɛn jira, i k'a fɔ Aron ye ko a ka a ka bere ta ka a fili duguma Faraon ɲɛ na. O na kɛ sa ye.»
[10] Musa ni Aron donna Faraon yɔrɔ. Matigi ye min fɔ, u ye o kɛ. Aron ye a ka bere fili duguma Faraon ni a ka jɔnw ɲɛ na, o kɛra sa ye.
[11] Nka Faraon ye a ka hakilitigiw ni a ka dɔnbaaw fana wele. Misira dɔnbaaw ye o ɲɔgɔn kɛ ni u ka dɔnbaaya kow ye.
[12] U bɛɛ kelen-kelen ye u ka berew fili duguma. Berew kɛra sa ye, nka Aron ka bere ye olu ka berew kunun.
[13] Faraon dusukun gɛlɛyara, a ma Musa ni Aron lamɛn. O kɛra ka kɛɲɛ ni Matigi ka kuma fɔlen ye.
[14] O tuma la Matigi y'a fɔ Musa ye ko: «Faraon dusukun gɛlɛyara, a ma sɔn ka mɔgɔw bila ka taa.
[15] I ka taa Faraon sɛgɛrɛ sini sɔgɔma. A filɛ, a bɛ taa ba da la. I k'a kunbɛn ba da la, bere min kɛra sa ye, i ka o ta i bolo.
[16] I k'a fɔ Faraon ye ko: ‹Matigi, Hɛburuw ka Ala, ko ne ye i ci a ma ko a ka ne ka mɔgɔw bila ka taa ka ne bato kungokolon kɔnɔ. Ko halibi a ma ne lamɛn.
[17] Ko a n'a dɔn nin de la, ko ne ye Matigi ye. Matigi ye o fɔ.› I na baji gosi ni i bolo bere ye. Ji na yɛlɛma ka kɛ joli ye.
[18] Baji la jɛgɛw na sa, baji na toli fo Misirakaw tɛna se ka a ji min.»
[19] Matigi y'a fɔ Musa ye fana ko: «I k'a fɔ Aron ye, ko a ka a ka bere mɔɔnɔbɔ Misira jiw kun na, u ka baw ni u ka kɔw ni u ka dalaw ani u ka ji dingɛw bɛɛ kun na. O jiw na kɛ joli ye. Joli na kɛ Misira jamana fan bɛɛ la. Hali jiri minanw ni kabakurun minanw kɔnɔ jiw na kɛ joli ye.»
[20] Matigi ye min fɔ, Musa ni Aron ye o kɛ. Aron ye bere kɔrɔta ka baji gosi Faraon ni a ka jɔnw ɲɛ na. Baji bɛɛ yɛlɛmana ka kɛ joli ye.
[21] Baji la jɛgɛw sara, baji tolila. Misirakaw ma se ka a ji min tun. Joli tun bɛ Misira jamana fan bɛɛ la.
[22] Misira dɔnbaaw fana y'a kɛ ten ni u ka dɔnbaaya kow ye. Faraon dusukun gɛlɛyara, a ma Musa ni Aron lamɛn. O kɛra ka kɛɲɛ ni Matigi ka kuma fɔlen ye.
[23] Faraon y'i yɛlɛma ka kɔsegin ka taa so. A ma o ko jate fewu.
[24] Misirakaw bɛɛ ye dingɛw sen ba da la ka ji minta ɲini, sabu u ma se ka baji min.
[25] U y'a kɛ ten tile wolonwula kɔnɔ, baji gosilen kɔ Matigi fɛ.
[26] O kɔ, Matigi kumana Musa fɛ, a ko a ka taa Faraon sɛgɛrɛ k'a fɔ a ye ko Matigi ko: «I ka ne ka mɔgɔw bila ka taa ka baara kɛ ne ye.
[27] Ni i ma sɔn ka u bila, ne na i ka jamana fan bɛɛ gosi ni ntoriw ye.
[28] Ntoriw na caya baji la fo ka dama tɛmɛn. U na bɔ yen ka don i ka so kɔnɔ ka don i sibon na ka yɛlɛn i ka dalan kan. U na don i ka jɔnw ka sow kɔnɔ ka yɛlɛn i ka mɔgɔw kan ka don i ka singonw ni i ka minanw kɔnɔ.
[29] Ntoriw na yɛlɛn i kan ani i ka mɔgɔw ani i ka jɔnw bɛɛ kan.»