[1] Mɔgɔ bɛɛ y'a ye ko Musa mɛnna, a ma jigin ka bɔ kulu kan, u ye ɲɔgɔn lajɛ Aron kɔrɔ k'a fɔ a ye ko: «Wuli ka bato fɛn dila an ye, o ka an ɲɛ minɛ sabu nin Musa, cɛ min ye an labɔ Misira jamana la, a kɛra min ye, an ma o dɔn.»
[2] Aron y'a fɔ u ye ko: «Sanu tulola nɛgɛ minw bɛ aw musow ni aw denkɛw ani aw denmusow tulow la, aw ka olu bɔ u tulow la ka na ni u ye ne fɛ yan.»
[3] Mɔgɔ bɛɛ ye tulola nɛgɛw bɔ u tulow la ka taa ni u ye Aron yɔrɔ.
[4] A ye u minɛ u bolo ka u dila ni tɔntɔ ye ka misiden bisigi dila ni sanu yeelelen ye. Mɔgɔw ko: «Israɛl, bato fɛn min ye i labɔ Misira, o filɛ.»
[5] Aron y'o ye tuma min na, a ye saraka bɔlan jɔ a ɲɛ fɛ ka pɛrɛn ko: «Sini na kɛ Matigi ka seli ye.»
[6] O dugusajɛ u solila ka saraka jenitaw bɔ ka na ni nisɔndiya sarakaw ye. Mɔgɔw bɛɛ y'u sigi ka dumuni kɛ ka minni kɛ. O kɔ, u wulila ka tulon kɛ.
[7] Matigi kumana Musa fɛ ko: «Jigin ka taa, k'a masɔrɔ i ye i ka mɔgɔ minw labɔ Misira jamana la, u ye u yɛrɛw tiɲɛn.
[8] Ne ye sira min ko fɔ u ye k'a gɛlɛya, u jɛngɛna ka o bila joona. U ye misiden bisigi dila ni sanu yeelelen ye ka u biri o kɔrɔ ka a bato ka sarakaw bɔ a ye k'a fɔ ko: ‹Israɛl, i ka i ka bato fɛn filɛ, o min ye i labɔ Misira jamana la.›»
[9] Matigi y'a fɔ Musa ye ko: «Ne y'a ye ko nin mɔgɔw ye mɔgɔ tulo gɛlɛnw ye.
[10] A to, ne ka dimin u kɔrɔ sa, ne na u si tunun, nka ne na i kɛ siyaba ye.»
[11] Musa ye Matigi a ka Ala deli kosɛbɛ, a ko: «Matigi, i ye i ka mɔgɔ minw labɔ Misira jamana la ni sebaayaba ani barikaba ye, mun y'a to i bɛ dimin olu kɔrɔ kosɛbɛ?
[12] Mun y'a to Misirakaw n'a sɔrɔ k'a fɔ ko, i ye u labɔ yen u tɔɔrɔli kama ka u faga kuluw yɔrɔ la ka u si tunun ka bɔ dugukolo kan? I yɛlɛma ka i ka dimiyaba to yen. I b'a fɛ ka nin ko jugu min kɛ i ka mɔgɔw la, i ka i miirili yɛlɛma o ko la ka a bila.
[13] I hakili to i ka jɔnw Ibrahima ni Isaka ani Israɛl la. I y'i kali i yɛrɛ la u ye ko i na u bɔnsɔn caya ka a kɛ i ko sankolola dolow. I kumana jamana min ko la, i ko i na o di u bɔnsɔn ma, a na kɛ u ta ye badaa.»
[14] Matigi tun y'a fɔ ko a b'a fɛ ka ko jugu min kɛ a ka mɔgɔw la, a ka miirili yɛlɛmana, a ma o kɛ tun.
[15] Musa y'i yɛlɛma ka jigin ka bɔ kulu kan, seereya walaha fila tun b'a bolo. Walahaw fan fila sɛbɛnnen tun don, u ɲɛfɛla ni u kɔfɛla.
[16] O walahaw tun ye Ala bolo nɔ ye. O sɛbɛnni tun ye Ala ka sɛbɛnni ye, a ɲɛgɛnna walahaw kan.
[17] Josue ye mɔgɔw pɛrɛnkan mɛn, a y'a fɔ Musa ye ko: «Kɛlɛkan bɛ bugufyɛ la.»
[18] Musa ko: «Se sɔrɔbaa kan tɛ o ye, se sɔrɔbali fana kan tɛ. Dɔnkili dakan bɛ ne tulo la.»
[19] A surunyalen bugufyɛ la, a ye o misiden bisigi ani dɔnkɛlaw ye. Ayiwa, Musa diminna haali, a ye o walaha fila fili ka bɔ a bolo ka u kari kulu ju la.
[20] A ye u ka misiden bisigi dilalen ta k'a jeni ni tasuma ye k'a mugumugu k'a seri ji la. A ye Israɛl bɔnsɔn lamin o ji la.
[21] Musa y'a fɔ Aron ye ko: «Nin mɔgɔw ye mun kɛ i la, fo i ye nin jurumuba lase u ma?»
[22] Aron ko: «Ne matigi kana dimin kosɛbɛ. I yɛrɛ b'a dɔn ko, ko jugu ka di nin mɔgɔw ye.
[23] U y'a fɔ ne ye ko ne ka bato fɛn dila u ye, o ka u ɲɛ minɛ. Sabu e Musa, cɛ min ye u labɔ Misira jamana la, ko, i kɛra min ye, u ma o dɔn.
[24] Ne y'a fɔ u ye, ko sanu bɛ mɔgɔ o mɔgɔ fɛ, u ka o bɔ. Ayiwa, u y'o di ne ma, ne y'a kerun tasuma la, nin misiden bisigi bɔra a la.»
[25] Musa y'a ye ko mɔgɔw bɛɛ kɛra yɛrɛmabilaw ye ko Aron ye u to u yɛrɛw sago kɛli la fo ka u kɛ yɛlɛbɔ fɛn ye u juguw ɲɛ na.
[26] O tuma la Musa y'i jɔ bugufyɛ donda la, a ko: «Mɔgɔ o mɔgɔ bɛ Matigi fɛ, o ka na ne yɔrɔ yan.» Levi bɔnsɔn bɛɛ ye ɲɔgɔn lajɛ a kɔrɔ.
[27] A y'a fɔ u ye, ko Matigi, Israɛl ka Ala ko: «Cɛw bɛɛ kelen-kelen ka u ka npanw dulon u kɛrɛ la ka taa ka segin kɛ bugufyɛ kunw ni ɲɔgɔn cɛ. Cɛw bɛɛ kelen-kelen ka u balimakɛw ni u tɔɲɔgɔnw ni u sigiɲɔgɔnw faga.»
[28] Musa ye min fɔ, Levi bɔnsɔn ye o kɛ. Cɛ waa sabaɲɔgɔn fagara o don na.
[29] Musa ko: «Aw bɛɛ kelen-kelen ka aw yɛrɛw di Matigi ma bi aw denkɛw ni aw balimakɛw kosɔn, walisa a ka duba aw ye.»
[30] O dugusajɛ, Musa y'a fɔ mɔgɔw bɛɛ ye ko: «Aw ye jurumuba kɛ. Ayiwa, ne bɛna yɛlɛn ka taa Matigi yɔrɔ, a dɔrɔ ne na aw ka jurumu kafari.»
[31] O tuma la Musa taara Matigi yɔrɔ ko kura k'a fɔ ko: «Nin mɔgɔw ye jurumuba kɛ dɛ. U ye sanu bato fɛn dila.
[32] O bɛɛ n'a ta ni i sɔnna ka u ka jurumu yafa u ma, … n'o tɛ, ne b'i deli, i ka ne tɔgɔ jɔsi ka bɔ i ka kitabu sɛbɛnnen na.»
[33] Matigi y'a fɔ Musa ye ko: «Mɔgɔ min ye ne hakɛ ta, ne na o de tɔgɔ jɔsi ka bɔ ne ka kitabu la.
[34] I ka taa sa, ne kumana yɔrɔ min ko la, i ka taa ni nin mɔgɔw ye yen. A filɛ, ne ka mɛlɛkɛ na taa i ɲɛ, nka ne ka hakɛbɔ don na, ne na u sara u ka jurumu kosɔn.»
[35] Matigi ye mɔgɔw gosi, katuguni u y'a to Aron ka misiden bisigi dila.