[1] Musa y'a jaabi ko: «A filɛ, u tɛna da ne la. U tɛna ne kan minɛ, nka u n'a fɔ ko Matigi ma a yɛrɛ jira ne la.»
[2] Matigi ko: «Mun bɛ i bolo?» A ko: «Bere.»
[3] Matigi ko: «A fili duguma.» A y'a fili duguma, a kɛra sa ye. Musa bolila sa ɲɛ.
[4] Matigi y'a fɔ Musa ye ko: «I bolo mɔɔnɔbɔ ka a minɛ a ku ma.» A ye a bolo mɔɔnɔbɔ ka a minɛ. A kɛra bere ye a bolo tun.
[5] Matigi ko: «I ka o kɛ walisa u ka da a la ko Matigi, u bɛnbaw ka Ala, Ibrahima ka Ala ni Isaka ka Ala ani Yakuba ka Ala ye a yɛrɛ jira i la.»
[6] Matigi y'a fɔ a ye ko kura ko: «I bolo don i ka dulɔki kɔrɔ.» Musa ye a bolo don a ka dulɔki kɔrɔ. A y'a bɔ yen, kuna tun bɛ a bolo yɔrɔ bɛɛ la, a jɛyara i n'a fɔ neje.
[7] Matigi ko: «I bolo don i ka dulɔki kɔrɔ ko kura.» A ye a bolo don a ka dulɔki kɔrɔ ko kura. A y'a bɔ yen, a seginna a farisogo cogo kɔrɔ la.
[8] Matigi ko: «Ayiwa, ni u ma da i la, ni u ma da taamashyɛn fɔlɔ la, u na da taamashyɛn filanan la.
[9] Ni u ma da o taamashyɛn fila si la, ni u ma i kan minɛ, i ka baji dɔ soli ba la, k'a bɔn duguma. I ye ji min soli, o na kɛ joli ye duguma.»
[10] Musa y'a fɔ Matigi ye ko: «Ayi Matigi, ne da man di, kabini kunasini wala kunun fo ka na bila i kuma waati la i ka jɔn fɛ, ne tɛ se kuma la. Ne nɛnkun fana ka girin.»
[11] Matigi y'a fɔ a ye ko: «Jɔni ye mɔgɔ da dila? Jɔni bɛ mɔgɔ kɛ bobo ye wala tulo geren wala yelikɛla wala fiyentɔ? O tɛ ne, Matigi nɔ ye wa?
[12] I ka taa sa, ne na i da dɛmɛ ka i kalan i ka fɔta la.»
[13] Musa ko: «Ayi Matigi, i b'a fɛ ka min ci, i ka o ci.»
[14] Matigi diminna Musa kɔrɔ, a ko: «I kɔrɔkɛ Aron, Levi bɔnsɔn, o tɛ yen wa? Ne y'a dɔn ko ale bɛ se kuma la. A bɛ na i kunbɛn fana. I yeli na diya a ye a dusukun na haali.
[15] I na kuma a fɛ, a na kɛ i da ye. Ne na i da dɛmɛ ka a da fana dɛmɛ. Aw ka kan ka min kɛ, ne na aw kalan o la.
[16] Ale na kuma mɔgɔw fɛ i nɔ na. A na kɛ i da ye, i na kɛ a ɲɛ na i n'a fɔ Ala.
[17] I ka nin bere ta i bolo, i na taamashyɛnw kɛ ni o ye.»
[18] O tuma la Musa wulila ka kɔsegin ka taa a birankɛ fɛ k'a fɔ a ye ko: «Ne b'i deli, i k'a to ne ka taa ne balimaw fɛ Misira k'a filɛ ni u ɲɛnama don halibi.» Jɛtoro y'a fɔ Musa ye ko: «Taa hɛrɛ la.»
[19] Ka Musa to Madian jamana la, Matigi y'a fɔ Musa ye ko: «I ka kɔsegin ka taa Misira, k'a masɔrɔ mɔgɔ minw tun b'a fɛ ka i faga, olu bɛɛ sara.»
[20] Musa ye a muso ni a denkɛw layɛlɛn fali kan ka kɔsegin ka taa Misira jamana la. A ye Ala ka bere ta a bolo.
[21] Matigi y'a fɔ Musa ye ko: «Ni i taara Misira, ne ye kabako minw kɛli fanga di i ma, i ka olu bɛɛ kɛ Faraon ɲɛ na. Ne kɔni na Faraon dusukun gɛlɛya, a tɛna sɔn o mɔgɔw ka taa.
[22] I n'a fɔ Faraon ye ko Matigi ko: ‹Israɛl ye ne denkɛ ye, ne denkɛ fɔlɔ don.
[23] Ko ne ko Faraon ka ne denkɛ bila walisa o ka taa ka baara kɛ ne ye. Ni a ma sɔn k'a bila, ayiwa ne na a yɛrɛ denkɛ fɔlɔ faga.›»
[24] Ka Musa to sira kan ka taa, u sira yɔrɔ min na, Matigi ye Musa gosi yen, a tun b'a fɛ k'a faga.
[25] O tuma la Sefɔra ye kɛrɛbo fara murulama ta ka a denkɛ boloko ka o wolo fili Musa sen kɔrɔ. A ko: «I ye ne furucɛ jolima ye.»
[26] O kɔ, Ala ye Musa bila. O tuma la Sefɔra y'a fɔ ko: «Furucɛ jolima.» O fɔra bolokoli kosɔn.
[27] Matigi y'a fɔ Aron ye ko: «I ka taa Musa kunbɛn kungokolon kɔnɔ.» Aron taara a kunbɛn Ala ka kuluba yɔrɔ la ka a da susu.
[28] Matigi ye Musa ci ni kuma minw ye ka taamashyɛn minw ko fɔ a ye, a ye olu bɛɛ fɔ Aron ye.
[29] Musa ni Aron taara Israɛl cɛkɔrɔbaw bɛɛ lajɛ ɲɔgɔn kan.
[30] Matigi ye kuma minw fɔ Musa ye, Aron ye olu bɛɛ fɔ ka taamashyɛnw kɛ o mɔgɔw bɛɛ ɲɛ na.
[31] O mɔgɔw dara a la. U y'a mɛn ko Matigi nana bɔ Israɛl bɔnsɔn ye ka a ɲɛ da u tɔɔrɔ kow kan, u ye u biri duguma ka batoli kɛ.