[1] O kow kɔ, Musa ni Aron taara k'a fɔ Faraon ye ko: «Matigi, Israɛl ka Ala y'a fɔ ko i ka a ka mɔgɔw bila ka taa seli kɛ a ye kungokolon kɔnɔ.»
[2] Faraon ko: «Matigi ye jɔni ye, fo ne ka a kan minɛ ka Israɛl bila ka taa? Ne tɛ Matigi dɔn, ne tɛna Israɛl bila ka taa fewu.»
[3] Musa ni Aron ko: «Hɛburuw ka Ala ye a yɛrɛ jira an na. A to an ka taa ka tile saba taama kɛ kungokolon kɔnɔ ka saraka bɔ Matigi, an ka Ala ye, walisa a kana na an gosi ni fiɲɛbana wala npan ye.»
[4] Misira masakɛ ko: «Musa ni Aron, mun y'a to aw bɛ mɔgɔw bali u ka baara la? Aw ka taa ka baara kɛ.»
[5] Faraon ko: «A filɛ, nin mɔgɔw cayara nin jamana kɔnɔ kosɛbɛ, aw de y'a to u bɛ u ka baara bila.»
[6] O don yɛrɛ la, Faraon y'a fɔ faama baara kuntigiw ni garadiw ye ko:
[7] «Aw kana bin mugumugu di mɔgɔw ma ka biriki gosi tun, i ko aw delila k'a kɛ cogo min na. U yɛrɛw ka taa bin mugumugu ɲini.
[8] U delila ka biriki dama min gosi, u ka o ɲɔgɔn gosi. Foyi kana o jɛ. U ye salabaatɔw ye, o de y'a to u ko u bɛ taa saraka faga u ka Ala ye.
[9] Dɔ ka fara nin cɛw ka baara kan, ka u bolo degun, walisa u ka to a kan, u kana u tulo majɔ nkalon kumaw la.»
[10] O tuma la faama baara kuntigiw ni garadiw taara ka kuma mɔgɔw fɛ ko: «Faraon y'a fɔ ko a tɛna bin mugumugu di aw ma tun.
[11] Aw yɛrɛw ka taa bin mugumugu ɲini a sɔrɔ yɔrɔ la. Foyi tɛna bɔ aw ka baara la.»
[12] Mɔgɔw jɛnsɛnna Misira jamana fan bɛɛ la ka bin mugumugu cɛ.
[13] Ayiwa, baara kuntigiw ye mɔgɔw jija, ko u ka baara dafa don o don i ko bin mugumugu tun bɛ di u ma tuma min na.
[14] Faraon ka baara kuntigiw tun ye Israɛl bɔnsɔn minw sigi ka kɛ garadiw ye Israɛl bɔnsɔn kun na, olu bugɔra. A fɔra u ye ko: «Mun y'a to aw ma o dama dafa kununwo ani bi, i ko aw delila k'a kɛ cogo min na?»
[15] Israɛl bɔnsɔn garadiw taara u yɛrɛw makasi Faraon ye ko: «Mun y'a to i ye i ka jɔnw kɛ ten?
[16] Bin mugumugu ma di i ka jɔnw ma, o bɛɛ n'a ta u ko an ka biriki gosi. I ka jɔnw bugɔra nka i yɛrɛ ka mɔgɔw jalaki don.»
[17] Faraon ko: «Aw ye salabaatɔw ye. Ɔwɔ, aw ye salabaatɔw ye. O de y'a to aw ko aw bɛ taa ka saraka faga Matigi ye.
[18] Ayiwa aw ka taa ka baara kɛ sa. Bin mugumugu tɛna di aw ma, nka hali o, wajibi don aw ka biriki dama dafa.»
[19] Israɛl bɔnsɔn garadiw y'a ye ko u na tɔɔrɔ haali, k'a masɔrɔ a fɔra u ye ko foyi kana biriki dama jɛ, don bɛɛ baara ka kɛ a cogo la.
[20] U bɔtɔ Faraon yɔrɔ la, u ni Musa ni Aron bɛnna, olu tun bɛ u makɔnɔ.
[21] Garadiw y'a fɔ u ye ko: «Matigi ka aw filɛ ka kiri tigɛ aw kan. Aw ye an mangoya Faraon ni a ka jɔnw ye. Aw ye npan don u bolo, walisa u ka an faga.»
[22] O tuma la Musa seginna ka taa kuma Matigi fɛ ko: «Matigi, mun y'a to i ye nin mɔgɔw tɔɔrɔ? Mun na i ye ne ci?
[23] Kabini ne taara Faraon yɔrɔ la ka kuma a fɛ i tɔgɔ la, a ye nin mɔgɔw minɛ ko juguya. I ma i ka mɔgɔw tila fewu.»