[1] «I ka i kɔrɔkɛ Aron ni a denkɛw madon i la ka bɔ Israɛl bɔnsɔn cɛma, walisa a ka sarakalasebaaya baara kɛ ne ye, Aron ni a denkɛw Nadab ni Abihu ni Eleazar ani Itamar.
[2] «I ka fini senumaw dila i kɔrɔkɛ Aron ye nɔɔrɔ ni masiri kama.
[3] I ka kuma maɲɛrɛ dɔnnaw fɛ, ne ye hakilitigiyaba di minw ma, ko u ka Aron ka finiw dila, walisa a ka saniya, a ka sarakalasebaaya baara kɛ ne ye.
[4] U ka fini minw dila, olu filɛ ninw ye: disila fɛn ani efɔd ni forokiya ani turuti sɔgɔlen ni jalamugu ani cɛ sirilan. U ka fini senumaw dila i kɔrɔkɛ Aron ni a denkɛw ye, walisa u ka sarakalasebaaya baara kɛ ne ye.
[5] U ka sanu ni gese bulama ni lomaasa gese ni gese bilen ani lenfu gese ta.
[6] «U ka efɔd dila ni sanu ni gese bulama ni lomaasa gese ni gese bilen ani lenfu gese ye ka maɲɛrɛ baara kɛ a la.
[7] U ka kamankun na fɛn fila dila efɔd kun fila la, walisa o ka tugu ɲɔgɔn na.
[8] Cɛ sirilan ni efɔd ka baara cogo kelen na. U ka dila ni fɛnw sifa kelen ye, sanu ni gese bulama ni lomaasa gese ni gese bilen ani lenfu gese.
[9] I ka onikis kabakurun fila ta ka Israɛl denw tɔgɔw ɲɛgɛn u kan.
[10] U tɔgɔ wɔɔrɔ ka ɲɛgɛn kabakurun fɔlɔ kan, u tɔgɔ tɔ wɔɔrɔ ka ɲɛgɛn kabakurun filanan kan ka kɛɲɛ ni u kɔrɔya ye.
[11] I ka Israɛl denw tɔgɔw ɲɛgɛn o kabakurun fila kan, i ko kabakurunw ni tɔgɔ taamashyɛn fɛnw bɛ ɲɛgɛn cogo min na. O kabakurunw ka coron sanu kɔnɔ.
[12] I ka o kabakurun fila da efɔd kamankun na fɛnw kan. U ka kɛ hakilijigin fɛn ye Israɛl denw ko la. Aron ka u tɔgɔw doni a kamankun fila kan Matigi ɲɛ kɔrɔ ka kɛ hakilijigin fɛn ye.
[13] O kabakurunw ka coron sanu kɔnɔ.
[14] I ka sanu yɛrɛwolo jɔlɔkɔ fila dila ka u kɛ i ko juru dɛfɛlen, ka o jɔlɔkɔ dɛfɛlenw don kabakurun coronlenw la.
[15] «I ka kiri ko disila fɛn dila maɲɛrɛ baara kɛ cogo la. I ka a ni efɔd dila cogo kelen na. I ka a dila ni sanu ni gese bulama ni lomaasa gese ni gese bilen ani lenfu gese ye.
[16] A fan naani ka kɛɲɛ ka kuru ka da ɲɔgɔn na. A janya ni a bonya ka kɛ sibiri ɲɛ kelen ye.
[17] I ka kabakurun coronlenw sira naani kɛ a la. A sira fɔlɔ ka kɛ ni sardwane ni topaze ani emɛrɔde ye.
[18] A sira filanan ka kɛ ni eskarbukle ni safir ani luulu ye.
[19] A sira sabanan ka kɛ ni opale ni agate ani ametisite ye.
[20] A sira naaninan ka kɛ ni krisolite ni onikis ani jaspe ye. O kabakurunw ka coron sanu kɔnɔ.
[21] U ka kɛ tan ni fila ye ka kɛɲɛ ni Israɛl denw tɔgɔw ye. Israɛl siya tan ni fila tɔgɔw kelen-kelen ka ɲɛgɛn o kabakurunw kelen-kelen kan, i ko tɔgɔ taamashyɛn fɛnw bɛ ɲɛgɛn cogo min na.
[22] I ka jɔlɔkɔw dila ni sanu yɛrɛwolo ye i ko juru dɛfɛlen ka u kɛ disila fɛn na.
[23] I ka sanu nkɔri fila dila ka u siri disila fɛn kun fila la.
[24] I ka o sanu jɔlɔkɔ dɛfɛlen fila don disila fɛn kun na sanu nkɔri fila kɔnɔ.
[25] I ka jɔlɔkɔ kun tɔ fila siri kaba coronlen fila la ka u siri efɔd kamankunna fɛnw ɲɛfɛla la.
[26] I ka sanu nkɔri fila wɛrɛ dila ka u siri disila fɛn kun fila la, a kɔfɛla la.
[27] I ka sanu nkɔri fila wɛrɛ dila ka u siri efɔd kamankunna fɛn fila la u ɲɛfɛla jukɔrɔ a kala sira kɛrɛ fɛ efɔd cɛ sirilan san fɛ.
[28] U ka disila fɛn nkɔriw ni efɔd sanu nkɔriw siri ɲɔgɔn na ni jala bulama ye, walisa disila fɛn ka to efɔd cɛ sirilan san fɛ, disila fɛn kana foni ka bɔ efɔd la.
[29] «Israɛl denw tɔgɔ minw ɲɛgɛnna kiri ko disila fɛn kan ni Aron bɛ don yɔrɔ senuma la tuma o tuma, a ka taa ni olu ye a yɛrɛ disi la ka u kɛ hakilijigin fɛn dabilabali ye Matigi ɲɛ kɔrɔ.
[30] I ka urim ni tumin nɔrɔ disila fɛn na. U ka kɛ Aron disi la ni a bɛ don Matigi ɲɛ kɔrɔ tuma min na. O cogo la Aron ka Israɛl bɔnsɔn ka kiri kow doni a disi la Matigi ɲɛ kɔrɔ tuma bɛɛ.
[31] «I ka efɔd kan don forokiya dila ni fini bulama ye.
[32] I ka a kanda tigɛ ka saraba da a kan na ka a lamini, i ko nɛgɛ dulɔki dila cogo, walisa a kana fara.
[33] I ka gerenati jiriden bisigiw don forokiya senkɔrɔla dawolo la ka a lamini, u ka kɛ bulama ni lomaasa ni bilenman ye. I ka sanu ntananw don olu cɛ ka forokiya lamini.
[34] Sanu ntanan kelen, gerenatiden bisigi kelen, sanu ntanan kelen, gerenatiden bisigi kelen, olu ka don forokiya senkɔrɔla dawolo la ka a lamini.
[35] Aron ka baara kɛ ni o forokiya ye a kan na. Ni a donna yɔrɔ senuma kɔnɔ Matigi ɲɛ kɔrɔ, ni a bɔra yen, o ntananw mankan na mɛn, walisa a kana na sa.
[36] «I ka sanu yɛrɛwolo falafala dila ka nin ɲɛgɛn a kan, i ko tɔgɔ taamashyɛn fɛnw bɛ ɲɛgɛn cogo min na ko: ‹SENUMAYA MATIGI YE.›
[37] I ka o sanu falafala siri jalamugu ɲɛfɛla la ni juru bulama ye, o na kɛ jalamugu ɲɛfɛla la.
[38] A na kɛ Aron ten na. Israɛl bɔnsɔn bɛ u ka saraka fɛn senuma minw di, Aron na a kun don o fɛn senumaw bɛɛ ka tilenbaliya kɔrɔ. O sanu falafala ka kɛ Aron ten na tuma bɛɛ, walisa Matigi ka sɔn Israɛl bɔnsɔn na.
[39] «I ka turuti dila ni lenfu fini ye ka jalamugu dila ni lenfu fini ye ka cɛ sirilan dila ka a sɔgɔ.
[40] «I ka turutiw ni cɛ sirilanw ni jalamugu dila Aron denkɛw ye nɔɔrɔ ni masiri kama.
[41] I ka o finiw don i kɔrɔkɛ Aron ni a denkɛw kan na ɲɔgɔn fɛ ka u mun ni tulu ye ka u bila ka u saniya, walisa u ka sarakalasebaaya baara kɛ ne ye.
[42] I ka kurusiw dila u ye ni lenfu fini ye ka u sutara ka bɔ u cɛsiri yɔrɔ la ka taa se u woro ma.
[43] Aron ni a denkɛw ka o kurusiw don u la ni u bɛ don ɲɔgɔn kunbɛn finiso kɔnɔ tuma min na, wala ni u bɛ gɛrɛ saraka bɔlan na ka baara kɛ yɔrɔ senuma kɔnɔ, walisa u kana na jalaki ka sa. O ka kɛ sariya ye Aron ni a bɔnsɔn ye badaa.