[1] «I ka fini jamanjan tan dila ni lenfu gese ni gese bulama ni lomaasa gese ani gese bilen ye. I ka finiw dila ni olu ye, ka serubɛnw jaw sɔgɔ u la maɲɛrɛ baara kɛ cogo la.
[2] Finiw bɛɛ kelen-kelen janya ka kɛ nɔnkɔn ɲɛ mugan ni segin ye. U bonya ka kɛ nɔnkɔn ɲɛ naani ye. Finiw bɛɛ ka dama kɛɲɛ.
[3] Fini duuru ka kala ɲɔgɔn na. Fini tɔ duuru fana ka kala ɲɔgɔn na.
[4] O fini duuru minw kalala ɲɔgɔn na, i ka nton bulamaw dila o fini duurunan dawolo la. Fini tɔ duuru minw kalala ɲɔgɔn na, i ka o ɲɔgɔn dila olu duurunan dawolo la.
[5] I ka nton biduuru dila o fini duurunan la ka nton biduuru dila fini tɔ duurunan dawolo la. O ntonw ka sin ɲɔgɔn ma.
[6] I ka sanu kolonin biduuru dila. Finiw ka tugu ɲɔgɔn na ni olu ye. So ka kɛ kelen ye o cogo la.
[7] «I ka fini janw dila ni ba si ye. U ka kɛ so kunna birifini ye. I ka fini tan ni kelen dila.
[8] O finiw bɛɛ kelen-kelen janya ka kɛ nɔnkɔn ɲɛ bisaba ye. U bonya ka kɛ nɔnkɔn ɲɛ naani ye. O fini tan ni kelen ka dama kɛɲɛ.
[9] I ka fini duuru kala ɲɔgɔn na ka o fini tɔ wɔɔrɔ fana kala ɲɔgɔn na. Fini wɔɔrɔnan ka kuru fila ye finiso ɲɛfɛla la.
[10] Fini duuru minw kalala ɲɔgɔn na, i ka nton biduuru dila o finiw duurunan dawolo la. Fini tɔ minw kalala ɲɔgɔn na, i ka nton biduuru dila o fini wɔɔrɔnan dawolo la.
[11] I ka nsiranɛgɛ kolonin biduuru dila ka u don ntonw la ka finiw tugu ɲɔgɔn na, walisa so ka kɛ kelen ye.
[12] O fini wɔɔrɔnan ka tɛmɛn so janya kan, o tila ka jigin so kɔ fɛ.
[13] Nɔnkɔn ɲɛ kelen-kelen janya na to o fini janw kun fila la, o na jigin finiso fan fila la ka a datugu.
[14] «Sagajigi wolo minw donna gala bilen na, i ka olu ta ka kɛ so kunna birilan ye. I ka kunna birilan wɛrɛ dila ni dofɛn wolow ye ka o biri u bɛɛ kun na.
[15] «I ka so jiri fɛrɛnw dila ni zajɛ jiri ye, ka u jɔ.
[16] Jiri fɛrɛn janya ka kɛ nɔnkɔn ɲɛ tan ye. U bɛɛ kelen-kelen bonya ka kɛ nɔnkɔn ɲɛ kelen ni tila ye.
[17] Sen fila ka kɛ jiri fɛrɛnw bɛɛ kelen-kelen na. U ka tugu ɲɔgɔn na. I ka so jiri fɛrɛnw bɛɛ kɛ ten.
[18] I ka jiri fɛrɛn mugan dila so worodugu yanfan kama.
[19] I ka warijɛ jusigilan binaani kɛ jiri fɛrɛn mugan jukɔrɔ. Jusigilan fila-fila ka kɛ jiri fɛrɛnw bɛɛ kelen-kelen jukɔrɔ. U sen fila ka don olu la.
[20] I ka jiri fɛrɛn mugan dila so saheli yanfan kama
[21] ani u warijɛ jusigilan binaani. Jusigilan fila-fila ka kɛ jiri fɛrɛnw bɛɛ kelen-kelen jukɔrɔ.
[22] I ka jiri fɛrɛn wɔɔrɔ dila so kɔfɛla la a tilebi yanfan kama.
[23] I ka jiri fɛrɛn fila-fila dila so kɔfɛla selekew kama.
[24] U ka kɛ fara fila ye ka bɔ duguma fo ka se sanfɛ. U kun ka siri ɲɔgɔn na ni nɛgɛ nkɔri kelen ye. U fila-fila ka kɛ ten, u ka kɛ so seleke fila bɛɛ la.
[25] O cogo la a na kɛ jiri fɛrɛn segin ye, ani u warijɛ jusigilan tan ni wɔɔrɔ. U jusigilan fila-fila ka kɛ jiri fɛrɛnw bɛɛ kelen-kelen jukɔrɔ.
[26] «I ka berew dila ni zajɛ jiri ye. Bere duuru ka kɛ so fan kelen jiri fɛrɛnw ta ye.
[27] Bere duuru dɔ ka kɛ so fan dɔ jiri fɛrɛnw ta ye. Bere duuru wɛrɛ ka kɛ so kɔfɛla jiri fɛrɛnw ta ye tilebi yanfan fɛ.
[28] Cɛmancɛ la bere min bɛ jiri fɛrɛnw cɛ tigɛ, o ka tɛmɛn jiri fɛrɛnw bɛɛ kɔnɔ ka bɔ kun dɔ la ka taa bila a kun dɔ la.
[29] I ka sanu da jiri fɛrɛnw yɔrɔ bɛɛ kan ka sanu nkɔriw kɛ u la, berew ka don olu la. I ka sanu da o berew yɔrɔ bɛɛ kan.
[30] Cogo min jirala i la ka i to kulu kan, i ka so jɔ ka kɛɲɛ ni o ye.
[31] «I ka so cɛtigɛ fini dila ni gese bulama ni lomaasa gese ni gese bilen ani lenfu gese ye. Serubɛnw jaw ka sɔgɔ a la maɲɛrɛ baara kɛ cogo la.
[32] I ka so cɛtigɛ fini dulon zajɛ jiri samasen naani la, sanu dalen u yɔrɔ bɛɛ kan. Sanu nkɔriw ka kɛ o samasenw la. U na jɔ warijɛ jusigilan naani kan.
[33] I ka cɛtigɛ fini dulon o koloninw jukɔrɔ. I ka seereya wagande ladon so cɛtigɛ fini kɔ fɛ. O so cɛtigɛ fini na yɔrɔ senuma ni yɔrɔ senuma senuma tila.
[34] I ka jurumu kafari yɔrɔ da seereya wagande kan yɔrɔ senuma senuma kɔnɔ.
[35] I ka tabali sigi so cɛtigɛ fini ɲɛfɛla la. Fitinɛba ka kɛ tabali kuntilenna la so worodugu yanfan fɛ. Tabali ka kɛ saheli yanfan fɛ.
[36] «I ka finiso dala fini dila ni gese bulama ni lomaasa gese ni gese bilen ani lenfu gese ye ka a sɔgɔ.
[37] I ka zajɛ jiri samasen duuru dila so dala fini kama ka sanu da a yɔrɔ bɛɛ kan. Sanu ntolow ka kɛ u la. I ka nsiranɛgɛ yeele ka a kɛ u jusigilanw ye.