[1] Ala y'a fɔ Musa ye ko: «Yɛlɛn ka na Matigi yɔrɔ. I ni Aron ni Nadab ni Abihu ani Israɛl cɛkɔrɔba biwolonwula ka yɛlɛn ka na. Ka aw to yɔrɔ jan, aw na batoli kɛ.
[2] Musa kelenpe ka gɛrɛ Matigi la, nka olu kana gɛrɛ a la. Mɔgɔ tɔw fana kana yɛlɛn ka taa a fɛ.»
[3] Musa taara Matigi ka kumaw ni a ka ko fɔlenw bɛɛ lakali mɔgɔw ye. Mɔgɔw bɛɛ y'a jaabi ni kan kelen ye ko: «Matigi ye kuma minw fɔ, an na olu bɛɛ kɛ.»
[4] Ayiwa, Musa ye Matigi ka kumaw bɛɛ sɛbɛn, o kɔ, a solila ka wuli ka saraka bɔlan jɔ kulu ju la ka samasen tan ni fila jɔ ka kɛɲɛ ni Israɛl siya tan ni fila ye.
[5] A ye Israɛl bɔnsɔn kamalen dɔw ci, olu ka saraka jenitaw bɔ Matigi ye ka nturaw faga k'a kɛ nisɔndiya saraka ye.
[6] Musa ye u joli tilancɛ kɛ minan dɔw kɔnɔ ka a tɔ tilancɛ seriseri saraka bɔlan kan.
[7] O kɔ, a ye layidu kitabu ta ka o kalan mɔgɔw ɲɛ na. U ko: «Matigi ye min fɔ, an na o bɛɛ kɛ ka a kan minɛ.»
[8] Musa ye o joli ta ka a seriseri mɔgɔw kan k'a fɔ ko: «Matigi ye layidu min ta aw ye nin kumaw bɛɛ ko la, o layidu joli filɛ nin ye.»
[9] O kɔ, Musa ni Aron ni Nadab ni Abihu ani Israɛl cɛkɔrɔba biwolonwula yɛlɛnna.
[10] U ye Israɛl ka Ala ye, a sen kɔrɔla bɛ i n'a fɔ safir kabakurun bulama dara yen, a jɛra i n'a fɔ sankolo yɛrɛ.
[11] Nka a ma a bolo se Israɛl mɔgɔ tɔgɔbaw ma. U ye Ala ye, u ye dumuni kɛ ka minni kɛ.
[12] Matigi y'a fɔ Musa ye ko: «Yɛlɛn ka na ne yɔrɔ kulu kan ka to yan. Ne na kabakurun walahaw di i ma, ne ye sariya ni ci fɔlen minw sɛbɛn mɔgɔw kalanni kama kɔni.»
[13] Musa ni a ka baaraden Josue wulila. Musa kɔni yɛlɛnna ka taa Ala ka kulu kan.
[14] A y'a fɔ cɛkɔrɔbaw ye ko: «A' ye an makɔnɔ yan, sani an ka kɔsegin ka na. Ayiwa, Aron ni Hur na to aw fɛ. Ni kiri ko bɛ aw dɔ fɛ, o tigi ka taa u yɔrɔ.»
[15] Ayiwa, Musa yɛlɛnna ka taa kulu kan, sankaba ye kulu datugu.
[16] Matigi nɔɔrɔ tora Sinayi kulu kan. Sankaba y'a datugu tile wɔɔrɔ kɔnɔ. Tile wolonwulanan la, ka Matigi to sankaba cɛmancɛ la, a ye Musa wele.
[17] Matigi nɔɔrɔ yera Israɛl bɔnsɔn fɛ i n'a fɔ tasuma jenili kɛtɔ kulu kun na.
[18] Musa donna sankaba la ka yɛlɛn ka taa kulu kan. Musa ye tile binaani ni su binaani kɛ kulu kan.