[1] A ye saraka jenita saraka bɔlan dila ni zajɛ jiri ye. A janya kɛra nɔnkɔn ɲɛ duuru ye. A bonya kɛra nɔnkɔn ɲɛ duuru ye. A fan naani kɛɲɛna. A jɔ kundama kɛra nɔnkɔn ɲɛ saba ye.
[2] A ye biɲɛkolow dila a seleke naani la. U bɔra saraka bɔlan yɛrɛ la. A ye nsiranɛgɛ da a yɔrɔ bɛɛ kan.
[3] A ye o saraka bɔlan minanw bɛɛ dila, a bugurijɛ kɛlanw ni a bugurijɛ cɛlanw ni a tasaw ni a sogo sɔgɔlanw ani tasuma bɔlanw. A ye o minanw bɛɛ dila ni nsiranɛgɛ ye.
[4] A ye saraka bɔlan kɔnɔ da nɛgɛ dila ni nsiranɛgɛ ye i ko basi tɛmɛn. A ye o da saraka bɔlan dawolo jukɔrɔ, a cɛmancɛ la ka bɔ duguma.
[5] A ye nsiranɛgɛ faga k'a kɛ nkɔri naani ye ka u don o kɔnɔ da nɛgɛ seleke naani la, ka olu kɛ berew don yɔrɔ ye.
[6] A ye berew dila ni zajɛ jiri ye ka nsiranɛgɛ da u kan.
[7] A ye o berew don o nkɔriw la saraka bɔlan kɛrɛw la, saraka bɔlan ta berew don. A ye a dila ni jiri fɛrɛnw ye ka a kɔnɔna lankolon to.
[8] A ye koli minanba dila ni nsiranɛgɛ ye ka a sigilan fana dila ni nsiranɛgɛ ye. Muso minw lajɛlen tun bɛɲɔgɔn kunbɛn finiso da la, a ye koli minan dila ni olu ka dungarew ye.
[9] A ye so dukɛnɛ dila. A worodugu yanfan lamini finiw kɛra ni lenfu fini ye. A janya kɛra nɔnkɔn ɲɛ kɛmɛ ye.
[10] A samasenw kɛra mugan ye. U nsiranɛgɛ jusigilanw kɛra mugan ye. U ntolow ni u fini dulon berew dilara ni warijɛ ye.
[11] A saheli yanfan lamini finiw janya kɛra nɔnkɔn ɲɛ kɛmɛ ye, ani u samasen mugan ni u nsiranɛgɛ jusigilan mugan. Samasenw ntolow ni u fini dulon berew dilara ni warijɛ ye.
[12] Tilebi yanfan lamini finiw kɛra nɔnkɔn ɲɛ biduuru ye, ani u samasen tan ni u jusigilan tan. Samasenw nɛgɛ ntolow ni u fini dulon berew dilara ni warijɛ ye.
[13] Kɔrɔn yanfan janya kɛra nɔnkɔn ɲɛ biduuru ye.
[14] Lamini fini minw bɛ a donda fan kelen fɛ, olu janya kɛra nɔnkɔn ɲɛ tan ni duuru ye, ani u samasen saba ni u jusigilan saba.
[15] A donda fan dɔ fana kɛra o cogo la. O finiw janya kɛra nɔnkɔn ɲɛ tan ni duuru ye, ani u samasen saba ni u jusigilan saba.
[16] Dukɛnɛ lamini finiw bɛɛ dilara ni lenfu fini ye.
[17] Samasenw jusigilanw dilara ni nsiranɛgɛ ye. Samasenw nɛgɛ ntolow ni u fini dulon berew dilara ni warijɛ ye. Warijɛ dara samasenw kunnala la.
[18] Dukɛnɛ samasenw tugura ɲɔgɔn na ni warijɛ fini dulon berew ye. Dukɛnɛ donda la fini sɔgɔra ni gese bulama ni lomaasa gese ni gese bilen ani lenfu gese ye. A janya kɛra nɔnkɔn ɲɛ mugan ye. A jɔ kundama kɛra nɔnkɔn ɲɛ duuru ye, ka kɛɲɛ ni lamini finiw ye.
[19] Dukɛnɛ donda la samasen naani ni u jusigilan naani dilara ni nsiranɛgɛ ye. U ntolow ni u fini dulon berew dilara ni warijɛ ye. Warijɛ dara samasenw kunnala la.
[20] So bɔlɔ nun bɔlenw ni a lamini samasenw bɔlɔ nun bɔlenw dilara ni nsiranɛgɛ ye.
[21] So fɛnw dama filɛ nin ye, ɲɔgɔn kunbɛn finiso kɔni. U jate kɛra ka kɛɲɛ ni Musa ka ci fɔlen ye Levitew bolo, sarakalasebaa Aron denkɛ Itamar tun ye u kuntigi ye.
[22] Matigi ye min fɔ Musa ye, Juda bɔnsɔn Bezaleɛl ye o bɛɛ dila. Bezaleɛl fa tun ye Uri ye. Uri fa tun ye Hur ye.
[23] Bezaleɛl dɛmɛbaa tun ye Dan bɔnsɔn Ahisamak denkɛ Oholiab ye. Ale fana tun ye maɲɛrɛ dɔnna ye ka fɛnɲɛgɛn ka baara kura dabɔ ka fini sɔgɔ ni gese bulama ni lomaasa gese ni gese bilen ani lenfu gese ye.
[24] Sanu nili fɛn minw donna yɔrɔ senuma baara la, o bɛɛ lajɛlen kɛra kilo waa kelen ye ka kɛɲɛ ni yɔrɔ senuma ka jateli cogo ye.
[25] Jama la mɔgɔ dannenw ka warijɛ kɛra kilo waa saba ni kɛmɛ duuru ɲɔgɔn ye, ka kɛɲɛ ni yɔrɔ senuma ka jate cogo ye.
[26] Mɔgɔw bɛɛ kelen-kelen ta ye bɛka ye. Bɛka ye sikle tilancɛ ye ka kɛɲɛ ni yɔrɔ senuma sikle ye. Mɔgɔ minw danna k'a daminɛ u si san mugan la fo ka taa se u ɲɛ mɔgɔw ma, cɛ waa kɛmɛ wɔɔrɔ ni waa saba ni kɛmɛ duuru ni biduuru. U bɛɛ kelen-kelen ye bɛka warijɛ di.
[27] O warijɛ la kilo waa saba kɛra yɔrɔ senuma jiri fɛrɛnw jusigilanw ni cɛtigɛ fini samasenw jusigilanw ye. Jusigilan kɛmɛ, kilo waa saba, jusigilan kelen, kilo bisaba.
[28] Warijɛ tɔ min tora, o kɛra ka lamini samasenw ntolow ni u fini dulon berew dila ka da u kunnala la.
[29] Nsiranɛgɛ nili fɛnw kɛra kilo waa fila ni kɛmɛ wɔɔrɔ ɲɔgɔn ye.
[30] A ye o nsiranɛgɛ kɛ ɲɔgɔn kunbɛn finiso da samasenw jusigilanw ye, ani nsiranɛgɛ saraka bɔlan ani a kɔnɔ da nɛgɛ ani saraka bɔlan minanw bɛɛ,
[31] ani dukɛnɛ lamini samasenw ni dukɛnɛ donda la samasenw jusigilanw ni so bɔlɔ nun bɔlenw ani dukɛnɛ bɔlɔ nun bɔlenw.