[1] Ala ye min kɛ Musa ni a ka mɔgɔw Israɛl ye, Musa birankɛ Jɛtoro, Madian sarakalasebaa, ye o kibaru bɛɛ mɛn ko Matigi ye Israɛl labɔ Misira jamana la.
[2] Musa birankɛ Jɛtoro taara ni Musa muso Sefɔra ye. Musa tun y'o bila ka taa a fa yɔrɔ.
[3] A taara ni Sefɔra denkɛ fila fana ye. Kelen tɔgɔ ko Gersɔn, k'a masɔrɔ Musa ko: «Ne ye siginfɛ ye jamana wɛrɛ la.»
[4] Dɔ tɔgɔ ko Eliezɛr katuguni a ko: «Ne fa ka Ala kɛra ne dɛmɛbaa ye ka ne tila Faraon ka npan na.»
[5] Musa birankɛ Jɛtoro nana ni Musa muso Sefɔra ni a denkɛ fila ye Musa yɔrɔ kungokolon kɔnɔ a ka bugufyɛ la Ala ka kulu kɛrɛ fɛ.
[6] A ye ci bila k'a fɔ Musa ye ko: «Ne, i birankɛ Jɛtoro, ne nana i yɔrɔ ni i muso ani i denkɛ fila ye.»
[7] Musa taara ka a birankɛ kunbɛn k'a biri a kɔrɔ ka a da susu. U ye ɲɔgɔn fo ka don finiso kɔnɔ.
[8] Matigi ye min kɛ Faraon ni Misirakaw la Israɛl kosɔn, ani Israɛl sɛgɛnna sira la cogo min na, ani Matigi ye u tila cogo min na, Musa ye o bɛɛ lakali a birankɛ Jɛtoro ye.
[9] Matigi ye ko ɲuman min kɛ Israɛl ye ka a tila Misirakaw la, o ko bɛɛ diyara Jɛtoro ye.
[10] Jɛtoro ko: «Matigi ka tanu. A ye aw tila Misirakaw ni Faraon na, a ye a ka mɔgɔw tila ka bɔ jɔnya la.
[11] Ne y'a dɔn sisan ko Matigi ka bon ni bato fɛn tɔw bɛɛ ye, katuguni Misirakaw ka juguya bira Misirakaw yɛrɛw kan.»
[12] Musa birankɛ Jɛtoro ye saraka jenita bɔ ka saraka dɔw faga Ala ye. Aron ni Israɛl cɛkɔrɔbaw nana ka dumuni kɛ Musa birankɛ fɛ Ala ɲɛ kɔrɔ.
[13] O dugusajɛ Musa y'i sigi ka mɔgɔw ka kiri tigɛ. Mɔgɔw y'u jɔ Musa ɲɛ kɔrɔ kabini tile bɔ tuma fo wula fɛ.
[14] Musa tun bɛ min kɛ mɔgɔw ye, a birankɛ ye o bɛɛ ye. A ko: «I bɛ mun kɛ nin mɔgɔw ye? Mun na i kelenpe bɛ sigi yen, mɔgɔw b'u jɔ i ɲɛ kɔrɔ kabini sɔgɔma fo wula fɛ.»
[15] Musa ye a birankɛ jaabi ko: «Mɔgɔw bɛ na ne yɔrɔ, walisa u ka Ala ɲininka.
[16] Ni ko dɔ bɛ u cɛ, u bɛ na ne ma, ne bɛ kiri tigɛ u cɛ. Ne bɛ Ala ka ci fɔlen ni a ka sariyaw jira u la.»
[17] Musa birankɛ y'a fɔ a ye ko: «I bɛ min kɛ, o man ɲi.
[18] I na i yɛrɛ barika ban ka nin mɔgɔw fana barika ban. Nin ko ka bon i barika ma. I kelenpe tɛ se a la.
[19] I ka i tulo majɔ ne kan na sisan, ne na i laadi, Ala ka to i fɛ. I ka kɛ dalaminɛ ye mɔgɔw ni Ala cɛ, ka u ka kow lase Ala ma.
[20] I ka u kalan ci fɔlenw ni sariyaw la. U ka kan ka sira min taama ka ko minw kɛ, i ka olu jira u la.
[21] I ka cɛ hakilitigi dɔw ɲɛnatɔmɔ ka bɔ jama la. U ka kɛ Ala ɲɛsiranbaaw ye, ni dannamɔgɔw don, minw tɛ wasabaliw ye, i ka olu sigi ka kɛ kuntigiw ye jama la. I ka u kɛ mɔgɔ waa kelen-kelen kuntigiw ye, ani kɛmɛ-kɛmɛ kuntigiw ani biduuru-duuru ani tan-tan kuntigiw.
[22] Olu ka mɔgɔw ka kiri kow ɲɛnabɔ tuma bɛɛ. U ka na ni kobaw ye i yɔrɔ, nka u yɛrɛw na ko misɛnw ɲɛnabɔ. I ka i ka doni fiɲɛya, olu ka i dɛmɛ a tali la.
[23] Ni i bɛ o kɛ ka kɛɲɛ ni Ala ka ci fɔlen ye, i na o kɛ ka dafa. Nin jama bɛɛ nisɔndiyalen na se u taa yɔrɔ la.»
[24] Musa ye a birankɛ kan minɛ, ka a ka kuma fɔlen bɛɛ kɛ.
[25] Musa ye Israɛl hakilitigi dɔw ɲɛnatɔmɔ ka u kɛ kuntigiw ye, waa kelen-kelen kuntigiw ni kɛmɛ-kɛmɛ kuntigiw ni biduuru-duuru kuntigiw ani tan-tan kuntigiw.
[26] Olu tun bɛ mɔgɔw ka kiri tigɛ tuma bɛɛ. U tun bɛ taa Musa sɛgɛrɛ ni kobaw ye. U yɛrɛw tun bɛ ko misɛnw ɲɛnabɔ.
[27] Musa ye a birankɛ Jɛtoro bila ka taa. A taara a yɛrɛ ka jamana la.