[1] Matigi kumana Musa fɛ ko:
[2] «Aw ka Israɛl bɔnsɔn den fɔlɔw bɛɛ bila ne ye, mɔgɔw den fɔlɔw ani baganw den fɔlɔw. Olu bɛɛ ye ne ta ye.»
[3] Musa y'a fɔ mɔgɔw ye ko: «Aw bɔra Misira jɔnya so la don min na, aw hakili ka to o don na, katuguni Matigi ye aw labɔ nin yɔrɔ la ni barikaba ye. Mɔgɔ si kana buuru fununnen dun.
[4] Aw bɔtɔ filɛ bi yɛrɛ Abib kalo la.
[5] Matigi y'i kali aw bɛnbaw ye ko a na jamana min di aw ma, Kanankaw ni Hɛti bɔnsɔn ani Amɔn bɔnsɔn ni Hɛv siya ani Jebuskaw ka jamana, o falen bɛ nɔnɔ ni di la fo ka woyo. Ni Matigi ye aw ladon yen tuma min na, aw ka nin seli kɛ Matigi ye nin kalo la.
[6] Aw na buuru fununbali dun tile wolonwula kɔnɔ. A tile wolonwulanan don na kɛ seliba ye Matigi ye.
[7] Aw na buuru fununbali dun o tile wolonwula kɔnɔ. Buuru fununnen si kana sɔrɔ aw ka sow kɔnɔ. Funun fɛn si kana sɔrɔ aw ka jamana yɔrɔ si la.
[8] I k'a fɔ i denkɛ ye o don na, ko i bɔra Misira jamana la tuma min na, Matigi ye min kɛ i ye, nin bɛ kɛ ka an hakili jigin o la.
[9] A na kɛ i ko taamashyɛn i bolo la, ani hakilijigin fɛn i ɲɛ furancɛ la, walisa Matigi ka sariya ka kɛ i da la, katuguni Matigi ye i labɔ Misira ni barikaba ye.
[10] O de y'a to aw na nin laada kɛ a waati latigɛlen na san o san.
[11] «Matigi y'i kali aw ni aw bɛnbaw ye Kanan jamana min ko la, ni a ye aw ladon yen ka o di aw ma,
[12] o tuma la aw ka den fɔlɔ bɛɛ di Matigi ma, ani aw ka baganw den fɔlɔw. U cɛmaw ye Matigi ta ye.
[13] I na faliden fɔlɔ kunmabɔ ni sagaden ye. Ni i t'a fɛ k'a kunmabɔ, i ka a kan kari. Aw na aw ka mɔgɔ den fɔlɔw fana kunmabɔ, aw denkɛ fɔlɔw kɔni.
[14] I denkɛ mana i ɲininka don nataw la ko nin kɛ kun ye mun ye, i k'a fɔ a ye, ko Matigi ye an labɔ Misira jɔnya so la ni barikaba ye.
[15] Faraon ma sɔn ka an bila tuma min na, Matigi ye Misira jamanaden fɔlɔw bɛɛ faga, k'a daminɛ mɔgɔ den fɔlɔ la ka taa bila bagan den fɔlɔ la. O de y'a to i bɛ den fɔlɔ cɛmaw bɛɛ kɛ saraka ye Matigi ye, nka i bɛ i yɛrɛ denkɛ fɔlɔw kunmabɔ.
[16] A na kɛ i ko taamashyɛn i bolo la, ani i ten na fɛn i ɲɛ furancɛ la, katuguni Matigi ye aw labɔ Misira ni barikaba ye.»
[17] Faraon ye mɔgɔw bila ka taa tuma min na, Ala ma u ɲɛ minɛ ka taa Filisitikaw ka jamana sira fɛ, hali ni o tun ka surun, k'a masɔrɔ Ala ko: «Ni o mɔgɔw y'a ye ko kɛlɛ bɛ yen, a dɔrɔ u na nimisa ka kɔsegin ka taa Misira tun.»
[18] Ayiwa, Ala y'a to mɔgɔw ka munumunu kungokolon kɔnɔ ka taa Kɔgɔji Bilen sira fɛ, Israɛl bɔnsɔn wulila ka bɔ Misira jamana la, u labɛnnen ni kɛlɛkɛ minanw ye.
[19] Musa ye Yusufu kolow cɛ ka taa n'u ye a bolo, sabu Yusufu tun ye Israɛl bɔnsɔn wajibiya ko u ka u kali, a ko: «Ala bɛna bɔ aw ye, siga t'a la. Aw ka ne kolow cɛ ka bɔ yan ka taa n'u ye.»
[20] U wulila ka bɔ Sukɔt ka buguw turu Etam, kungokolon da fɛ.
[21] Matigi tun bɛ taa u ɲɛ kabasen na tile fɛ ka u ɲɛ minɛ sira la. Su fɛ a tun bɛ taa kabasen tasumama la ka yeelen bɔ u ye, walisa u ka taama su fara tile kan.
[22] O kabasen ma taa ka bɔ mɔgɔw ɲɛ kɔrɔ tile fɛ, kabasen tasumama ma taa ka bɔ u ɲɛ kɔrɔ su fɛ.