[1] اوجالاردا اولانین پناهی آلتیندا اوتوران، هر شیه قادئر اولانین کؤلگه‌سئنده یاشایار.
[2] ربّئم حاقّیندا دانیشیرام: «او منئم سیغیناق یرئم‌دئر، او منئم قالامدیر، منئم تاریم، او کی، اونا توکّول ادئرم.»
[3] یقئن کی، او سنی اووچونون توروندان قورتارار، اؤلوملو طاعوندان!
[4] سنی پرلرئنئن آلتیندا اؤرتر؛ اونون قانادلاری آلتینا سیغینارسان، اونون اعتئبارلی اولدوغو سنئن قالخانین‌دیر، سنئن سئپرئن‌دئر.
[5] نه گجه‌نئن قورخوسوندان قورخاجاقسان، نه ده گوندوزده اوچان اوخدان،
[6] نه قارانلیقدا گَزَن طاعوندان، نه ده گون اورتادا هر شیی وئران ادن قیرغیندان.
[7] یانیندا مئن نفر، صاغیندا اون‌مئن نفر قیریلسا بله، سنه خطر دَیمز.
[8] آنجاق گؤزلرئنله باخارسان، پئس آداملارین جزاسینی گؤررسن.
[9] چونکی دیئبسن: «رب منئم پناهیم‌دیر.» چونکی اوجالاردا اولانی اؤزون اوچون مسکن ادئبسن،
[10] موصئبت سنه توخونا بئلمز، فلاکت سنئن چادیرینا یاخینلاشماز.
[11] چونکی سنئن اوچون ملکلرئنه فرمان وره‌جک کی، بوتون یوللاریندا سنی قوروسونلار.
[12] اونلار سنی اللری اوسته ساخلایارلار کی، آیاقلارین بئر داشا دیمه‌سئن.
[13] آصلانا، ساغیر ائلان اوستونه آیاق باسارسان، شئر بالاسینی، اژداهانی آیاغین آلتیندا اَزَرسن.
[14] «چونکی منی سوئر اونو قورتاراجاغام، چونکی منئم آدیمی چاغیریر، اونا باشی‌اوجالیق وره‌جیم.
[15] او منی چاغیراندا، من اونا جاواب وره‌جیم، زحمتده اونونلا اولاجاغام، اونو قورتاریب احتئرامینی آرتیراجاغام.
[16] اونو اوزون بئر عؤمورله دویوراجاغام، نئجاتیمی اونا گؤرسده‌جیم.»