<Zəbur 121

[1] گؤزلرئمی داغلارا طرف قالدیریرام؛ منئم کؤمه‌یئم هارادان گله‌جک؟

[2] منئم کؤمه‌یئم گؤی و یری یارادان ربدن گلئر.

[3] قویمایاجاق کی، آیاغین سوروشسون؛ سنی ساخلایان یاتمایاجاق.

[4] باخ، ائسرایئلی ساخلایان نه یاتار، نه ده یوخویا گدر.

[5] سنی ساخلایان ربدئر؛ صاغ طرفئنده رب سنه کؤلگه‌دئر.

[6] گوندوز گونش، گجه ده آی سنی وورماز.

[7] رب سنی هر پئسلئکدن حئفظ ادر؛ او سنئن جانینی حئفظ ادر.

[8] ائندئدن ابده کئمی، رب سنئن چیخیش و گئرئشئنی حئفظ اده‌جک.