[1] منه رحم ات، ای تاری، منه رحم ات! چونکی جانیم سنه پناه گتئرئر؛ بو بلالارین کچئب-گتمه‌سئنه قدر، سنئن قانادلارینین کؤلگه‌سئنه پناه گتئرئرم.
[2] اوجالاردا اولان تارینین درگاهینا فریاد اده‌جیم، او تارینین درگاهینا کی، منئم ائنتئقامیمی آلیر.
[3] گؤیدن گؤندَ‌رئب منه نئجات وره‌جک؛ جانیمین قصدئنه دوران ظالئم آداملاری تنبه اده‌جک. سِلا تاری محبّت و وفاسینی گؤند‌ره‌جک.
[4] جانیم آصلانلار آراسیندادیر، آلوولانان آداملار آراسیندا یاتیرام کی، دئشلری نئزه‌دئر، اوخلاردیر، دئللری ائتی قیلینج‌دیر.
[5] گؤیلر اوستونه داها اوجالان، ای تاری! قوی سنئن شؤوکتئن تامام دونیادان داها اوجا اولسون.
[6] اونلار منئم قدملرئم اوچون تله قوروبلار؛ جانیم بوکولوب، قاباغیمدا قویو قازیبلار، اونون ائچئنه اؤزلری دوشوبلر. سِلا
[7] اوره‌یئم قرارینی ورئب، ای تاری! اوره‌یئم قرارینی ورئب؛ اوخویاجاغام، پرستئش نغمه‌سی اوخویاجاغام.
[8] اویان، ای جانیم! اویان، ای چنگ، ای طنبور! من سحری اویاندیراجاغام.
[9] خالقلار آراسیندا سنه حمد اده‌جیم، ای پروردئگار؛ طایفالار آراسیندا سنه پرستئش نغمه‌سی اوخویاجاغام.
[10] چونکی سنئن محبّتئن گؤیلره قدر بؤیوکدور، حقئقتئن بولودلارا یتئشئر.
[11] گؤیلر اوستونه داها اوجالان، ای تاری! قوی شؤوکتئن بوتون یر اوستونده اولسون.