[1] ربّه شوکور ادئن، آدینی چاغیرین، خالقلارا اونون عمل‌لرئنی بئلدئرئن.
[2] اونا اوخویون، اونا پرستئش نغمه‌سی اوخویون؛ اونون بوتون عجایئب ائشلرئندن دیئن.
[3] اونون موقدّس آدیندا فخر ادئن؛ قوی ربّی آختارانلارین اورَکلری سوئنسئن.
[4] ربّی و اونون قووّتئنی طلب ادئن؛ اونون حوضورونو دائم آختارین.
[5] اونون اتدئیی عجایئب ائشلرئنی یادا سالین؛ اونون مؤجوزه‌لرئنی، آغزیندان چیخان حؤکملرئنی.
[6] ای اونون قولو، ائبراهئمئن نسلی، ای یعقوب اؤولادلاری، اونون سچدئکلری.
[7] رب تاریمیز اودور؛ اونون حؤکملری بوتون یر اوزونده‌دئر.
[8] او، اؤز عهدئنی ابده کئمی، بویوردوغو سؤزو مئن نسله قدر یادا گتئرئر،
[9] او عهدی کی، ائبراهئمله باغلادی، او وعده‌نی کی، ائسحاقا آند ائچدی،
[10] و اونو یعقوب اوچون قانون، ائسرایئل اوچون ابدی عهد قویوب ددی:
[11] «کَنَعان تورپاغینی سئزه وره‌جیم کی، مئراث پایینیز اولسون.»
[12] او زامان کی، اونلار ساییدا آز ائدئلر، آز بئر عئدّه، اورادا قرئب ائدئلر ده،
[13] بو مئلّتدن او بئری مئلّته، بو مملکتدن او بئری مئلّته کؤچوردولر،
[14] رب هچ کسی قویمادی کی، اونلارا سئتم اتسئن؛ اونلارین خاطئرئنه پادشاهلاری بله تنبه ادئب ددی:
[15] «منئم مسح اتدئکلرئمه دیمه‌یئن، منئم پیغمبرلرئمه ضرر یتئرمه‌یئن.»
[16] سونرا، اؤلکه‌یه قیتلیق گتئردی، اونلارین تداروک گؤردویو بوتون چؤرکلرئنی محو اتدی،
[17] قاباقلاریندان بئر آدام گؤندَرمئشدی، بئر قول آدیندا ساتیلان یوسئف ائدی بو.
[18] آیاقلارینی کونده ائله ائنجئتمئشدئلر، بوینونو دمئر حالقاسینا سالمیشدیلار.
[19] او زاماناجاق کی، ددئیی سؤز یرئنه یتئشدی، ربّئن سؤزو یوسئفی خالئصلشدئردی.
[20] پادشاه آدام گؤندَ‌رئب یوسئفی آزاد اتدی؛ خالقلارین حؤکمداری اونو آزاد بوراخدی.
[21] اونو اِوئنئن آغاسی اتدی، اونو بوتون وار-یوخونا حؤکمدار قویدو کی،
[22] ریئسلرئنی جانی ائسته‌دئیی کئمی تعلئم ورسئن، آغساقّاللارینا حئکمت اؤیرتسئن.
[23] سونرا ائسرایئل مئصئره گلدی: یعقوب خام وئلایتئنده قرئب یاشادی.
[24] رب اونون خالقینی چوخ ثمره‌لی ادئب، اونلاری دوشمنلرئندن داها چوخ قودرتلی اتدی.
[25] سونرا دوشمنلرئن اورَکلرئنی دؤندَردی کی، اونون خالقیندان نئفرت اتسئنلر، اونون قوللاری ائله مکرله رفتار اتسئنلر.
[26] قولو موسانی، سچدئیی هارونو گؤندَ‌ردی.
[27] اونلار اونون علامتلرئنی خالقین آراسیندا، مؤجوزه‌لرئنی حام وئلایتئنده یرئنه یتئردئلر.
[28] ظولمت گؤندَ‌رئب مملکتی قارانلیق اتدی؛ لاکئن اونون سؤزلرئنئن ضئدّئنه عوصیان اتدئلر.
[29] سولارینی قانا دؤندَردی، بالیقلارینی اؤلدوردو.
[30] مملکتلرئنده قورباغالار قایناشدی، پادشاهلارین اوتاقلاریندا دا بله.
[31] امر اتدی و چئبئن سورولری گلدئلر، میغمیغالار اونلارین بوتون اؤلکه‌لرئنه یاییلدیلار.
[32] یاغیش عوضئنه دولو وردی، مملکتلرئنه آلوولانمیش اود یاغدیردی.
[33] اوزوم و انجئر آغاجلارینی ووردو، اؤلکه‌لرئنده اولان آغاجلاری قیردی.
[34] بویوردو و چیئرتگه‌لر گلدئلر، ساییسیز جاوان چیئرتگه‌لر.
[35] اونلارین مملکتلرئنده اولان بوتون گؤی اوتو یدئلر، اونلارین یرلرئنئن محصولونو یدئلر.
[36] اونلارین مملکتلرئنده بوتون ائلک دوغولانلاری ووردو، اونلارین قووّتلرئنئن ائلکئنی.
[37] سونرا ائسرایئلی گوموش و قیزیللا چیخارتدی، اونلارین قبئله‌لری آراسیندا یولدا قالان یوخ ائدی.
[38] اونلار چیخان زامان، مئصئر سوئنئردی، چونکی ائسرایئل قورخوسو جانلارینا دوشموشدو.
[39] کؤلگه اوچون اونلارا بولود آچدی، گجه اونلارا ائشیق ورمک اوچون اود وردی.
[40] ائسته‌دئلر و اونلارا بئلدئرچئن گتئردی، گؤیدن اونلارا بوللوقجا چؤرک وردی.
[41] قایانی یاردی، سو اشئیه فیشقیردی؛ قوروموش چؤله بئر چای کئمی آخدی.
[42] چونکی او موقدّس وعده‌سئنی، قولو ائبراهئمی یادا سالدی.
[43] بله‌جه او، خالقینی شادلیقلا، سچدئکلرئنی ترنّومله چیخارتدی.
[44] اونلارا مئلّتلرئن تورپاقلارینی وردی؛ طایفالارین ثروتئنه صاحئب اولدولار کی،
[45] ربّئن قانونلارینی ساخلاسینلار اونون تعلئملرئنی یرئنه یتئرسئنلر. ربّه حمد ادئن!