[1] بوتون قلبئمله سنه شوکور اده‌جیم، یارب، سنئن حیرته سالان بوتون ائشلرئنی نقل اده‌جیم.
[2] سنده سوئنئب شادلیق اده‌جیم؛ سنئن آدینا پرستئش نغمه‌سی اوخویاجاغام، ای اوجالاردا اولان.
[3] دوشمنلرئم گری دؤنَن زامان، سنئن حوضورونا گؤره ییخیلیب محو اولدولار.
[4] چونکی داعوامی سن گؤروب، حاقّیمی سن آلیبسان؛ صالح بئر داور کئمی تختئنده اوتوروبسان.
[5] مئلّتلره آجیقلانیب، پئس آدامی یوخ ادئبسن؛ اونلارین آدینی ابددن ابده‌جک سئلئبسن.
[6] دوشمن ابدی وئرانه‌لئکده ائتئب-گدئب؛ اونلارین شهرلرئنی بونؤوره‌دن محو ادئبسن؛ اونلاردان حتّا بئر نئشان دا بله قالماییب.
[7] آمّا رب ابده کئمی سلطنت ادئر، موحاکئمه اتمک اوچون تختئنی قوروب؛
[8] او، دونیایا صالحلئکله حؤکم اده‌جک، ائنسانلارا ائنصافلا سلطنت اده‌جک.
[9] رب مظلوم آدام اوچون پناه یری، دار گونلرده اوجا بئر قالادیر.
[10] سنئن آدینی تانییانلار، سنه توکّول ادرلر، چونکی سنی آختارانلاری، هچ واخت بوراخمازسان، یارب.
[11] ای صحیوندا ساکئن اولانلار، ربّه پرستئش نغمه‌سی اوخویون؛ اونون نه اتدئکلرئنی مئلّتلر آراسیندا اعلان ادئن.
[12] چونکی تؤکولموش قانین ائنتئقامینی آلان رب، اونلاری خاطیرلاییر: او، فاغیرلارین فریادینی یاددان چیخارتماز.
[13] منه یازیغین گلسئن یارب، ای اؤلوم قاپیلاریندان منی قالدیران! مندن نئفرت ادنلر اوزوندن چکدئیئم زحمته باخ!
[14] اله کی، سنئن بوتون حمدئنی صحیون شَهَرئنئن دروازالاریندا نقل ادئم. من سنئن نئجاتیندا شادلیق اده‌جیم.
[15] مئلّتلر، قازدیقلاری قویویا دوشوبلر، آیاقلاری، سردئکلری تورا ائلئشئب.
[16] رب، اتدئیی عدالتلی ائشی ائله اؤزونو گؤرسه‌دئب؛ پئس آدام اؤز اللرئنئن ائشئنده توتولوب. هئگّایون سِلا
[17] پئس آداملار، تارینی یاددان چیخاردان بوتون مئلّتلر، اؤلولر دئیارینا قاییداجاقلار.
[18] لاکئن مؤحتاج آدام همئشه‌لئک یاددان چیخماز، فاغیر آدامین اومئدی ده ابده کئمی محو اولماز.
[19] قالخ، یارب! قویما ائنسان قالئب گلسئن؛ قوی مئلّتلر سنئن حوضوروندا موحاکئمه اولسونلار.
[20] اونلارین ائچئنه قورخو سال، یارب، قوی مئلّتلر آنجاق بشر اولدوقلارینی آنلاسینلار. سِلا