[1] Везачу Эло Аюбе, дарцана юккъера схьа вист а хилла, элира:
[2] «Хьайн гӀодаюкъ, къонахчо санна, дӀаехка: Ас хаттарш дийр ду хьоьга, ткъа ахьа Суна жоп ло.
[3] Хьо Сан кхел яр харцдан воллу, хьо бехказавалархьама, Со бехке а веш?
[4] Хьан дуй ткъа Делан санна нуьцкъала куьг, Цуьнан санна долчу озаца хьоьга къекъалур дуй?
[5] ТӀаккха возаллица а, юьхькӀамца а хазло, иштта сий а, исбаьхьалла а хьайна тӀедуха.
[6] Хьайн чӀогӀа йолу дералла дӀа а хеца, курачуьнга дӀа а хьажий, иза охьатаӀаве.
[7] Массо а курачаьрга дӀа а хьажий, уьш юьхьӀаьржачу хӀиттабе, шаьш мел лаьттачу меттигашкахь Ӏеса нах дӀа а хьаша.
[8] Уьш лаьттах а бохкий, боданечу эхарта чу йийсаре дӀабига.
[9] ТӀаккха Ас-Айса хьуна хьалха даре дийр ду хьан аьтту куьйго хьо кӀелхьарвоккхург хилар.
[10] ХӀинца бегемотах лаьцна дуьйцур ду Аса. И доккха дийнат, хьо санна, Аса дина ду. Цо буц йоу, стеро санна.
[11] Шен гӀогӀашкахь ма ницкъ болуш ю иза! Цуьнан гайна тӀехь долу пхенаш ма чӀогӀа ду!
[12] Цуьнан цӀога, баганан дитт санна, чӀогӀа ду, ткъа пхенаш цуьнан хенаш тӀехь вовшахъхьирчина ду.
[13] Цуьнан когийн даьӀахкаш цӀестан турбанаш санна ю, цуьнан пӀендарш аьчка гӀожмаш санна ду.
[14] Иза Аса кхоьллинчарна юкъахь уггар ницкъ болуш ю. Сайн туьраца иза кхоьллинчу Соьга бен иза эшалур яц.
[15] Цунна лаьмнаша ло кхача, циггахь ловзуш лелаш ду аренан акхарой.
[16] Коканийн коьллашна кӀел Ӏуьллу иза, уьшалийн шач юкъахь дӀалечкъа.
[17] Оцу коьллаша шайн ӀиндагӀа кӀел иза дӀалачкъайо, хина йистерачу дак-дитташа цунна го бо.
[18] Хи къиза лелачу хенахь, иза цунах ца къехка. Йордан-хи шен бета тӀе деача а, иза синтемехь ю.
[19] Цуьнан бӀаьргашна хьалха а хӀоьттина, цуьнан мерах мӀара хьаьнга чекхбаккхалур бара?
[20] МӀераца Левиятан цӀе йолу саьрмик хьалабаккхалур барий хьоьга, муьшаца оцу саьрмикан мотт дӀабехкалур барий?
[21] Цуьнан мерӀуьргахула тӀийраг чекхъяккхалур ярий хьоьга, я мехаца мочхалх Ӏуьрг даккхалур дарий?
[22] Цо хьоьга юх-юха а дехарш дийр дуй те? Иза хьоьга эсалчу дешнашца бистхир буй те?
[23] Гуттаренна а хьан лай хила, цо хьоьца барт бийр буй те?
[24] Олхазарца санна, цуьнца ловзуш хир ву хьо? Хьайн гӀарбашийн дуьхьа иза дӀабоьхкур бу ахь?
[25] ЧӀерийлецархоша, хьоьца мах а бийцина, хьоьгара оьцур бу иза? Цара, нахана дӀабохкийтархьама, совдегаршна юкъахь боькъур бу иза?
[26] Цуьнан цӀока хьоьга гоьмукъех юзалур ярий я цуьнан коьртах чаьнчакх чекхъяккхалур ярий?
[27] Нагахь санна хьайн куьг цунна тӀе ахь диллахь, и тӀом хьуна, иштта кхин ца леллал, дага боуьйтур а бу».