[1] «Ткъа хӀинца, Аюб, ас бохучуьнга ла а догӀа, массо а ас олучу дешан тидам а бе.
[2] ХӀинца ас сайн бага дӀайоьллу, сан дешнаш меттан юьххьехь ду.
[3] ЦӀеначу даг чуьра сан дешнаш схьадовлу, суна хууш дерг сан матто цӀена схьабоху.
[4] Со Делан Сино кхоьллина, Нуьцкъалчун Ӏаьнаро суна дахар ло.
[5] Хьайн аьтто белахь, жоп ло суна, соьца къовса кеч а ло, дӀа а хӀоттий.
[6] Далла хьалха со а хьо верриг ву, со-со а ву поппарх вина.
[7] Цундела сох болчу кхерамо хьо Ӏада ма во, хьуна тӀехь болу сан Ӏаткъам беза хир бац.
[8] Суна сайна хезира ахьа мел аьлларг, хьан аз хӀинца а сан лерехь ду:
[9] „Со цӀена ву, зуламаш лелийна а воцуш, со бехказа ву, къинош летийна а воцуш.
[10] Ткъа Далла суна таӀзар дан бахьанаш карадо, со Шен мостагӀа а лору Цо.
[11] Цо сан когашна буржалш тоьхна, ас мел боккхучу коге леррина хьоьжу“.
[12] Цу тӀехь хьо бакъ вац, Аюб, хӀунда аьлча Дела адамал лекха ву.
[13] ХӀунда къийсало хьо Цуьнца, адамо олучу дешнашна Цо жоп ма ца ло?
[14] Дела адаме юх-юха а вистхуьлуш велахь а, Цо бохург ца тусало стагана.
[15] Цо гӀенах олу стаге я буьйсанан суьртехь, кӀорга наб адамна кхеттачу хенахь я шен меттахь стаг Ӏуьллучу хенахь.
[16] ТӀаккха церан лерг сама а доккхий, дикка гучу тайпана царна лерина долу Шен дӀахьедар до Цо,
[17] стага дан леринарг цуьнга ца дайта а, цуьнан куралла дӀаяккха а,
[18] иштта иза эхартана гена ваккхархьама а, цуьнан дахар Ӏожаллин хих чекх ца далийтархьама а.
[19] Шен меттахь лазарца кхетаво Цо иза, цуьнан даьӀахкашкахь гуттар а тӀом а латтош.
[20] ТӀаккха цуьнан кийрано яа хӀума тӀе ца оьцу, уггар токхе йолу хӀума а цуьнга ца яало.
[21] Цуьнан дегӀ гӀелло, цунах хӀумма а ца дуьсу, хьалха гуш йоцу цуьнан даьӀахкаш гучуйоху.
[22] Цуьнан са эхарте кхочуш ду, ткъа цуьнан дахар – Ӏожалла тӀеяхьаш болчу геланчашка.
[23] Амма нийса муха лела деза гайтархьама, адамна юкъалелаш долу малик делахь, вуно дуккха а долчу маликех цхьаъ,
[24] оцу стагах къинхетам а бина, цо эр ду Деле: „Эхарте кхачарх паргӀатваккхахьа иза, цунах такха дезарг суна карийна“.
[25] ТӀаккха цуьнан дегӀ къона волуш хилларг санна, дӀахӀуттур ду, иза юхавоьрзур ву шен жималлин деношка.
[26] Цо Деле доӀа дийр ду, ткъа Дела цунна тамехь хир ву. Деле Ӏибадат а деш, цо воккхаверца мохь хьокхур бу. Дала цуьнан нийса хьал юхаметтахӀоттор ду.
[27] Нахе дӀадуьйцур ду цо шена хилларг: „Ас къинош летийна сайх, харцдолчух бакъдерг а деш, амма суна догӀу таӀзар Цо суна ца дина.
[28] Эхарте кхачарх со паргӀатваьккхира Цо, хӀинца сан дахар серлонах дуьзна ду“.
[29] И дерриг а Дала адаман дуьхьа деш ду, кхин шозза, кхузза дукхах а деш,
[30] цуьнан са эхарте кхачарх даккхархьама а, цунна дахаран серло лепийтархьама а.
[31] Тидам бе, Аюб, ладогӀа ас бохучуьнга. ХӀумма а ма ала, ткъа аса дуьйцур ду.
[32] Амма хьайн ала хӀума делахь, суна дуьхьал ала. Вист а хила, хӀунда аьлча суна лаьа хьо бехказавоккхийла.
[33] Нагахь хьайн ала хӀума дацахь, вист а ца хуьлуш Ӏе, ас Ӏамор ду хьуна хьекъале дерг».