[1] «Сайн бӀаьргашца бина барт бу сан, уьш зудабере хьарамлонца дӀахьожур бац аьлла.
[2] Иштта хилча, хӀун кхоллам бара те лакхарчу Дала суна кечбинарг? ХӀун кхел йинера те суна стигаларчу Нуьцкъалчо?
[3] Зуламхошна лерина дац те дакъазабовлар, харцонаш лелочарна лерина бац те бохам?
[4] Далла ца го те сан некъаш, массо а сан гӀулч Цо ягар ца йо те?
[5] Ас чӀагӀо йо, со харцонаш еш ца лелла аьлла, мекарниг дан сан ког сих ца белла аьлла.
[6] Дала со бакъдолчу терзан тӀехь узийла, тӀаккха хуур дара Цунна, со цӀена вуйла.
[7] Со нийсачу некъа тӀера галваьллехь, сан бӀаьргаша сан дог вонна тӀе дерзийнехь, сан куьйгаш хьарамчу хӀумано бехдинехь, –
[8] ас дӀадийнарг кхечо доийла, сан зӀийдагаш орамашца цхьаьна хьалайохийла.
[9] Нагахь сан дагна уллорачун зуда а езаелла, сайн уллорачун неӀарехь кӀелонаш ас йинехь,
[10] сан зудчо кхечунна кохьар хьийзайойла, цуьнца буьйшуш кхиберш а хуьлийла,
[11] хӀунда аьлча иза хьарамло хир яра, цунна кхелахой кхел ян езаш хир бара.
[12] Иза массо а хӀаллакдеш йолу цӀе хир яра. Ас къа мел хьегнарг дакъазадоккхур дара.
[13] Нагахь ас сайн ялхошца нийсо лелош ца хиллехь, церан сайца къовсам баьлча,
[14] ас хӀун дийр дара, Дела суна хьалха дӀахӀоьттича? Цо сайга хаттар дича, ас хӀун эр дара Цуьнга?
[15] Со Кхоьллинчо и ялхо а ца кхоьллина те? Тхайн нанойн кийрахь тхойшиъ а Цо ца кечвина те?
[16] Ас чӀагӀо йо, къечун дехар ас дӀа ца теттина аьлла, йисина Ӏачу зудчун бӀаьргаш ас ца кхолийтина аьлла.
[17] Ас чӀагӀо йо, сайн бепиг ас сайна ца дитина аьлла, цунах байлахь бисинчарна дакъа а ца деш.
[18] Со жима волчу хенахь дуьйна байлахь бисинчарна да санна хилла, бисина болчу зударшна ненан кийрахь дуьйна гӀо дина ас.
[19] ТӀедуха хӀума цахиларна стага бала хьегар а, къечу стагана тӀетаса хӀума цахилар а сайна гича,
[20] ас царна тӀедуха хӀума лора, сан уьстагӀийн тӀергӀано уьш бох а бора, ткъа цара даггара баркаллаш а олура.
[21] Нагахь ас боберана дуьхьал буй айбинехь, гӀалин кевнехь болчу кхелахошкара сайна гӀо хир дуйла а хууш,
[22] сан куьг белша тӀера охьадужийла, пхьаьрсан голлец каглойла сан куьг.
[23] ХӀунда аьлча Дала сайна бохам барх со чӀогӀа кхоьруш вара. Цуьнан возаллина дуьхьалвала сан ницкъ хир бацара.
[24] Нагахь санна со деших тешнехь, я цӀеначу дешига ас аьллехь: „Хьо сан чӀагӀо ю“,
[25] нагахь санна ас сайн доккхачу хьолах дозалла динехь, сайн куьйгаша къа мел хьегначух со сакъераделла хиллехь,
[26] нагахь санна маьлхан къегаш хиларе а, беттасин сийлахьчу боларе а хьоьжуш,
[27] сан дог царах къайлаха Ӏеха а делла, уьш лара куьйгана барт ас баьккхинехь,
[28] иза кхел ян дезаш долу зулам хир дара, лакхарчу Далла ас тешнабехк бийр бара.
[29] Сайн мостагӀа валар бахьана долуш воккхавеш хилла со, я цуьнга вон деача, сакъералуш хилла?
[30] МостагӀчунна Ӏожаллин неӀалт кхайкхош, сайн баге къа ца летадайтира ас.
[31] Сан хӀусамна чохь болчара эр ма ду: „Аюба жижигах ца вузийнарг вуй ткъа?“
[32] Ваьлла лелачо цкъа а арахь буьйса ца яьккхина: сан цӀийнан неӀарш цунна массо а хенахь дӀайиллина хилла.
[33] Ас чӀагӀо йо, сайн къинош сайн четахь дӀа ца хьулдина аьлла, кхечу адамаша санна, цкъа а сайн зулам ас къайла ца даьхьна аьлла, хӀунда аьлча адамийн тобанех со дӀакъехкар вара, вист а ца хуьлуш, сайн хӀусама чохь сеццал, тукхамашна дола хетарх кхоьрур а вара.
[35] Соьга стаг ладугӀуш велахьара! Айса мел аьлларг чӀагӀдо ас. Нуьцкъалниг суна жоп луш велахьара! Нагахь санна со бехкевеш волчо сан стенна тӀехь бехк бу яздинехьара,
[36] и йоза ас сайн белшаш тӀехь лелор дара, таж санна, иза сайн коьрта тӀе дуьллур дара.
[37] ТӀаккха айса мел баьккхина ког дӀабуьйцур бара аса, элана санна, Цунна улло гӀур вара со.
[38] Сан лаьтто суна дуьхьал кхайкхош делахь, оханна тӀера хершнаш доьлхуш делахь,
[39] ас царна тӀера ялта мах боцуш диънехь, я цу ахархойн дегнаш ас дохийнехь,
[40] кха тӀехь кӀен метта коканаш долийла, ткъа мекхан метта асар хьалакхуьийла». Цу тӀехь чекхделира Аюбан къамел.