[1] Ala ka balaka don Nuho ni a denkɛlu lɔ k'a fɔ ai yɛ, a vɛɛ: «Ài yi jili ka siyaya, ka duukolo lafa.
[2] Soo suu suu yi duukolo kɔkan, niimafen mɛsɛn suu suu yi taamana duu ma, kɔnɔ suu suu yi san ma, aini jɛɛ suu suu yi kɔɔlu kɔlɔ, wolu bɛ siyantɔ ài ɲa bubale. Ai bɛ do labilanin ài yɛ.
[3] Niimafen bɛ kɛtɔ balo le le ài yɛ. Ǹ'i ai bɛ dila ài ma yi ne, iwo ǹ na fɛlɛnfennu dila ài ma teme.
[4] Kɛɛ ài kà soo jelima dɔn, kamasɔlɔn niimafen bɛ nii yi ai jeli le lɔ.
[5] Àilu ni ài bɔzɔnnu koni, ni niimafen suu suu vɛ ài jeli labɔnna, ǹe gbugbu kɛtɔ wo kunko lala a kɛba le kun, soolu tanin ka la mɔɔnivinnu kan. Mɔɔ o mɔɔ vɛ a mɔɔɲɔɔ nii bɔla, ǹ kɛtɔ wo kunko lala wo tii gbu le kun.
[6] Mɔɔ o mɔɔ vɛ a mɔɔɲɔɔ jeli labɔnna, wo tii jeli labɔntɔle mɔɔ bolo, kamasɔlɔn Ala na mɔɔnivinnu danna a jɛlɛkanu sawula le lɔ.
[7] Àilu koni, ài yi jili ka siyaya. Ài yi buu ka siyaya duukolo fan bɛ lɔ.»
[8] Ala k'a fɔ Nuho ni a denkɛlu yɛ kɔtunun, a vɛɛ:
[9] «A ye, ǹ'i salatikan tala àilu ni ài bɔzɔnnu yɛ,
[10] ani duukolo niimafen bɛ, fen fen tonin ài fɛ ka bɔ kulunba kɔnɔ: kɔnɔlu o, kolofennu o, ani tuukɔlɔsoolu.
[11] Ǹ'i salatikan tala ài bɛ yɛ k'a fɔ ko tufanaji tɛnala niimafen bɛ siyasala butu. Tufanaji tɛnala nala butu ka duukolo halaki.»
[12] Ala k'a fɔ kɔtunun, a vɛɛ: «Ǹ'i tɔɔmase dila ài ma yi ne ka bɛn ǹa salatikan ya ko ma, ǹ'i salatikan min tala ǹe ni àilu ani niimafen bɛ wotɛ, ka ta bi ma ka taa sii ài bɔzɔn natɔlu bɛ la.
[13] M̀ɛ ǹa ɲiɲantoli la sanbiliya ma. Wo do kɛtɔ ǹa salatikan tɔɔmase le le, ǹ na salatikan min tala ǹe ni duukolo niimafen bɛ wotɛ.
[14] M̀ɛ sanbiliyalu ladɛnna duukolo kunna kotan, ni ɲiɲantoli do ka bɔ gbɛ la sanbiliyalu ma,
[15] wo vɛ kɛla, ǹ hangili bilatɔ ǹa salatikan nɔ, salatikan min tanin ǹe ni àilu ni niimafen suu bɛ wotɛ. Tufanaji ɲɔɔzii gbɛlɛ tɛnala nala butu ka niimafen bɛ halaki.
[16] Ɲiɲantoli vɛ bɔla gbɛ la sanbiliyalu ma kotan, ǹ kɛtɔ wo yena. Ǹ hangili do bilatɔ salatikan banbali wo lɔ, salatikan min tanin ǹe Ala ni niimafen suu bɛ wotɛ duukolo kɔkan.»
[17] Ala vɛɛ Nuho kɔtunun: «Ǹa salatikan tɔɔmase le ve le, ǹ na salatikan min lasiila ǹe ni niimafen bɛ wotɛ duukolo kɔkan.»
[18] Nuho denkɛ minu ka bɔ kulunba kɔnɔ, wolu tɛɛ Sɛmu ni Hamu ni Jafɛti le le. Kanaan fa le tɛɛ Hamu le.
[19] Nuho denkɛ sawa wolu le bɔzɔnnu ka jɛzɛn duukolo fan bɛ lɔ.
[20] Nuho tɛɛ sɛnɛkɛba le le, ale le do ka kɛ mɔɔ kunfɔlɔ le ka lɛzɛn gbele kɛ.
[21] A ka lɛzɛnji dɔ min ngɛ, wo ka a mina. A ka t'i la aa faanigbaa kɔlɔ, a falimakolon ne.
[22] Kanaan fa Hamu ka a fa Nuho falimakolon ye ngɛ, a ka bɔ luu ma k'a fɔ a baden fila yɛ.
[23] Wo kɛ, Sɛmu ni Jafɛti ka faani dɔ ta, k'a la ai kanma, ka don ai kɔma siya le gbaa kɔlɔ, k'ai fa masutala. Ai tɛɛ ai ɲa lataala fan gbɛlɛ lɔ siya le, min y'a kɛ, ai kana ai fa falimakolon ye.
[24] Lɛsɛnji bɔ Nuho ɲa la, a lɔnko ka bila wo ko lɔ, a denkɛ laban na min kɛla a la.
[25] Wo kɛ, Nuho do vɛɛ: «Daan yi Kanaan ma, a kɛtɔ a kɔlɔnu ya jɔnnu ta jɔn ne le.»
[26] Nuho k'a fɔ kɔtunun, a vɛɛ: «Ǹ'i ǹ Tii Ala tanu, Sɛmu yi Ala min batola. Ala yi Kanaan kɛ Sɛmu ya jɔn ne.
[27] Ala yi Jafɛti ya ko jili. Ala yi Sɛmu ya faanigbaalu kɛ Jafɛti siiya le. Ala yi Kanaan kɛ aa jɔn ne.»
[28] Tufanaji timin kɔ, Nuho ka san kɛmɛ sawa san biloolu (350) le kɛ.
[29] Nuho si danmajiya ka kɛ san kɛmɛ kɔnɔ san biloolu (950) le le. Wo dafanin, a ka sa.