[1] Wo kɔ, Janguba ka a dennu kili k'a fɔ ai yɛ, a vɛɛ: «Ài y'ài ladɛn, min y'a kɛ, ǹ'i maasinin kolu ɲafɔ ài yɛ, minu kɛtɔ ài masɔlɔnna.
[2] «Ài y'ài ladɛn, Janguba denkɛlu, ài y'ài tolomalɔ, ài y'ài fa Isilan kumakan mɛn.
[3] «Lubɛn, ile le ǹ denkɛ kunfɔlɔ le. I sɔlɔn le ka ǹa kɛya ni ǹ fanga labɔ gbɛ lɔ kunfɔlɔ le, i dalaya kɔlɔtanin vɛ ǹ denkɛ tɔ bɛ ta le, i ɲɔɔ seetii tɛ ai tɛma.
[4] Kɛɛ i tɛzoyayine iwo kɔɔfa, i do tɛnala kɛla ɲamɔɔ le butu, kamasɔlɔn i k'i la i fa ya lafen nɔ ka je makɔsɔ, i do k'i la hali ǹa bilin gbu lɔ!
[5] «Simiyɔn ni Levi yi dɔɔ ni kɔlɔ le le, ai aiya siyamifannu labaalela benkanniko le kanma.
[6] Ai vɛ kɛla ai kun bilinna i ɲɔɔ ma, ǹ sen kà bila aiya ko dɔ lɔ. Ǹ fɛ kà kɛ aiya ladɛn na, kamasɔlɔn ai na faali kɛla mɔnɛya bolo le ma, ai do ka to ai sawo kɛla, fɔɔ ai vɛ nisilu sen fasalu tɛɛtɛɛla.
[7] Daan yi ai ma, kamasɔlɔn aiya mɔnɛya faiyayine, ani aiya josolakuna lɔgbeleyayine bubale! Ǹ kɛtɔ ai bɔzɔnnu lɔtalala Janguba bɔzɔn tɔlu wotɛ, ǹ kɛtɔ ai jɛzɛnna Bani-Isilankalu wotɛ.
[8] «Ile Juda koni, i badenmalu kɛtɔ i labalinna, i fadennu do kɛtɔ ai mabilinna i sen kɔlɔ, kamasɔlɔn i kɛtɔ i bolo lala i juulu tɔnkɔ lɔ,
[9] Juda, ǹ denkɛ, jala kavelen ne i le, i jɛlɛnin ka taa, i wɔli kɔ lɔ soo faala k'a dɔn. Jala v'i bilin k'i la. Jene i wakali ka taa jala lawuli?
[10] Juda ni masaya tɛnala falanna i ɲɔɔ ma, masayabele do tɛnala bɔla Juda kabiladennu bolo, fɔɔ bele wo tii bɛlɛbɛlɛ vɛ nala waate min nɔ, sibolomalu kolotɔ min tii yɛ.
[11] Juda ya lɛzɛn gbelelu kɛtɔ ɲiala bɛlɛbɛlɛ kɛ, fɔɔ a vɛ sena aa sofalini kɔɔntɔ silila lɛzɛnju keinkein na. Ka bɛn aa lɛzɛnji wala jate ma, a kɛtɔ aa faanilu kola lɛzɛnji le, a do kɛtɔ aa feeyabɔ kola ji wo le, min wulɛnnin zɔɛɛn iwo jeli.
[12] A totɔ lɛzɛnji minna fɔɔ k'a ɲala wulɛn, a do kɛtɔ nɔnɔ minna fɔɔ k'a ɲii gbɛ.
[13] «Zebulun siitɔ kɔɔji da le la, a siiya le kɛtɔ kulunba lɔya le, aa duu dan daminatɔ Sidon so le ma.
[14] Isakali yi sofalini kɔɔnin ne le, min bilinnin aa donilu tɛma.
[15] A vɛ nɔningɛya ɲuma dɔ yena, duu min keinyayine, wo vɛ kɛla, a kɛtɔ a kɔ majiila doni tako lɔ, a do kɛtɔ a jɛlɛ bilala jɔnya lɔ, a vɛ pɔlɔtɔ baalelu kɛla.
[16] «Dan kɛtɔ aa jama ya kolu ɲabɔla, iwo dɔ kabilalu Bani-Isilankalu tɛma.
[17] Dan kɛtɔle iwo sa kɛwon min lanin siya dafɛ, iwo fɔnfɔnni min yi walan dala, sa min yi soo kinna a sen ma, a vɛ sootii labenna a kɔma siya le.»
[18] «Ǹ Tii Ala, ǹ jei siinin iya lakisili le la.»
[19] «Waanbenbalu kɛtɔ waan benna Gadi kan, kɛɛ a kɛtɔ ai kɔsalanna ka waan ben ai kan.
[20] «Asɛli kɛtɔ balo ɲumalu le dɔnna, dɔnnifen tɔnɔma minu bɛnnin masakɛlu ma, wolu bɔtɔ aa duu le lɔ.
[21] Nafitali yi minaanmoso le le, min bilanin a jɛlɛ ma, min yi den keinkeinnu sɔlɔnna.
[22] «Jusufu yi kɔlɔmaju le le, min y'a denna bɛlɛbɛlɛ kɛ, kɔlɔmaju min lɔnin falakɔɔ dafɛ, min bololu yi jɛlɛla k'ai dɛn jiin kunma.
[23] Biɲɛtiilu kɛtɔ baamakɛlɛ tɛɛla a ma, ai vɛ aiya biɲɛlu lafilifilila a ma, ka a lɔgbɛnɛn.
[24] Kɛɛ aa biɲɛkala minanin totɔ a tɛɛ la kpan, a bololu fangadonnin totɔle ka bɛn Ala ya see ma, Janguba ya Fangatii, ale min kɛnin Isilan kunmafɛlɛnba ni a matangaba le.
[25] I fa Tii Ala le i madɛmɛnna, Seebɛtii Ala le yi balaka siyama donna i lɔ, balaka minu yi bɔla sannɔ ka jii, balaka minu yi wulila ka bɔ duu kɔlɔ, ani balaka minu yi donna moso kɔnɔgbolo ni a sin nɔ.
[26] Balaka minu donnin i fa lɔ, wolu fisayayine m̀ bemanu ta le, ai do kulugbeleyayine ka timin tɔnɔmafen minu yi bɔla tini kɔlɔkɔlɔlu lɔ. Ala yi balaka wo ɲɔɔziilu lajii Jusufu kan. Balaka wolu yi to ale kan, min kɛnin ɲamɔɔ le a fadennu tɛma.
[27] «Bɛnjamin yi tuukɔlɔwuluni le le, min faiyayine bubale, a yi kɛlɛtɔnɔ dɔnna sɔɔmadala, a v'i kɔseila wulala ka kɛlɛkɔlɔfennu lɔtala.»
[28] Bani-Isilanka kabila tan ni fila (12) le ve le. Ai fa ka kuma wolu fɔ ai yɛ, a tɛɛ duwawu kɛla ai yɛ waate min nɔ. Duwawu wolu ka bɛn a denkɛ kelenkelenna bɛ ma.
[29] Wo fɔ Janguba bolo, a ka a denkɛlu jamali, a vɛɛ: «Ǹ'i taa bolo le ma m̀ bemanu taaya lɔ. Ài ka kan ka taa ǹ sudoon m̀ bemanu fɛ kawawoo wo lɔ, min yi Hɛtika kɛ́ Efelon ya sɛnɛduu lɔ.
[30] Kawawoo wo yi Makipela, Mamele telebɔ fannɔ Kanaan duu lɔ. M̀ bema Ibulahima le na duu wo sanna Hɛtika kɛ́ Efelon ma k'a kɛ a ta kabuluso le.
[31] M̀ bema Ibulahima ni m̀ mama Salan sudoonnin je le. Ǹ fa Isiyaka ni m̀ ba Lebeka sudoonnin je le. Ǹ ka Leya sudoon woja le fana.
[32] Sɛnɛduu wo ni a kawawoo bɛ ka san Hɛtikalu le ma.»
[33] Janguba wɔlinin a dennu jamalila, a ka a sennu lajɛlɛ aa lafen nɔ, k'i la, a nii vɛ bɔla, ka taa a bemanu fɛlɔ.