[1] Janguba ka to taala, Ala ya mɛlɛkalu ka a kunkɔlɔbɛn.
[2] Janguba k'ai ye ngɛ, a vɛɛ: «Jannɔ yi Ala makɛya le le!» Wo le k'a kɛ, a ka woja tɔɔla ko Mahanayimu (wo kɔlɔ le ko: «Makɛya Fila»).
[3] Janguba ka keladennu lataa a kɔlɔ Esawu ma, min tɛɛ siinin Seyili tinima duu lɔ, Ɛdomi jamana lɔ.
[4] A k'ai jamali, a vɛɛ: «Ài yi kuma min fɔ ǹ kuntii Esawu yɛ, ài vɛɛ a yɛ: ‹Iya bɔiden Janguba yi min fɔla i yɛ, wo le ne: Ǹ siinin tɛɛ Laban fɛ le lɔ lonaya boloma, ka to a lɔ ka sii bi la.
[5] M̀ɛ nisilu sɔlɔn, ani sofalini ni saa ni banilu, ani bɔiden kɛman ni a mosoman. M̀ɛ sama min bila ile ǹ kuntii ma, fɔsa ǹa ko yi diya yi yɛ teme.› »
[6] Keladennu kɔseinin Janguba fɛlɔ, ai vɛɛ a yɛ: «Mɔ taanin i kɔlɔ Esawu fɛlɔ. A natɔ i labɛnya lɔ yi ne, kɛ́ mɔɔ kɛmɛ naani (400) le a kɔ.»
[7] Wo mɛn Janguba bolo, a ka siyan bubale ka hamin. A do ka aa mɔɔlu lɔtala k'ai kɛ jamakulu fila le, ka aa saa ni bani ni nisi ni ɲɔɔmɛlu fana lɔtala wo ɲa kelen ma.
[8] A tɛɛ a milila, a vɛɛ: «Ni Esawu ka na k'i kɛ jamakulu kelen kan, a tɔ kelen yi sene bɔlila.»
[9] Janguba do ka Ala madiya, a vɛɛ: «Ǹ Tii Ala, m̀ bema Ibulahima ni ǹ fa Isiyaka yi min batola, ile Ala n'a fɔ yi la ǹ yɛ ko ǹ'i ǹ kɔsei ǹ kabiladennu fɛlɔ ǹ sɔlɔnduu lɔ. Wo le y'a kɛ, i yi hɛlɛ kɛ ǹ yɛ.
[10] I n'iya kanundeya ni iya kankelentiiya jiyala ǹ na teme bɛlɛbɛlɛ kɛ, ǹe ni wo man kan. Ǹa taamabele kelen le tɛɛ m̀ bolo Julidɛn kɔɔ tɛɛ waate lɔ siɲa kunfɔlɔ lɔ, kɛɛ tandainɔ yi ne, ǹa malalimɔɔ vɛ siya ka kɛ jamakulu fila le.
[11] I jaani le, i yi m̀ makalan ka m̀ bɔ ǹ kɔlɔ Esawu bolo, kamasɔlɔn ǹ'i siyanna, a kana ǹe ni m̀ mosolu ani ǹ dennu bɛ faa kelen ne.
[12] I n'a fɔ yi la ko i kɛtɔ hɛlɛ kɛla ǹ yɛ, ka m̀ bɔzɔnnu siyaya iwo kɔɔji kawunna kiɲɛ, fɔɔ ai dan tɛnala lɔnna ka bɛn ai wala jate ma.»
[13] Janguba ka si woja. A nanin aa kolofen minu le, a ka wo dɔlu lɔtɔmɔn ka bɛn a kɔlɔkɛ Esawu samako ma:
[14] bamoso kɛmɛ fila (200), bakɔlɔnni muan (20), saamoso kɛmɛ fila (200), saajii muan (20),
[15] ɲɔɔmɛ denmatii bisawa (30) ani wolu sinmindennu, nisimoso binaani (40), tola tan, sofalinimoso muan (20), aini sofalinikɛ tan.
[16] A ka kolofen kulu wo kelenkelennalu bila jɛ, k'ai kalifa aa bɔidennu la. A do vɛɛ ai yɛ: «Ài yi bila ǹ ɲa, ài yi tɛɛni to kolofen kululu wotɛ.»
[17] Mɔɔ min tɛɛ kolofen kulu kunfɔlɔ gbɛngbɛnna, Janguba vɛɛ wo yɛ: «Ni ǹ kɔlɔ Esawu k'i ɲɔɔmɛn i le k'i maɲininga, a vɛɛ: ‹I kuntii yi jene le? I taatɔ min ne? I yi jene ya kolofennu gbɛngbɛnna?›
[18] Wo do vɛ kɛla, i y'a javi, i vɛɛ: ‹Iya bɔiden Janguba ya kolofen ne lu yi. A na ai lanala ko k'a kɛ aa kuntii Esawu sama le. Ale gbu yi nala mɔ kɔ.› »
[19] Janguba ka jamali kelen wo le di aa bɔiden filana ma, ani a sawana, wo ni a tɔlu bɛ, minu tɛɛ kolofen kululu gbɛngbɛnna. A vɛɛ ai yɛ: «Ài vɛ ǹ kɔlɔ Esawu yena, ài yi kuma kelen wo ɲafɔ a yɛ.
[20] Ài y'a fɔ a yɛ ǹe Janguba yi nala ài kɔ, ǹe min kɛnin aa bɔiden ne.» Janguba tɛɛ a fɔla a miliya lɔ, a vɛɛ: «Ni ǹ ka ǹ jɛlɛ kunmasan samalifen minu le kunfɔlɔ le, ǹ'i minu lataala ǹ ɲa, wo vɛ kɛla, tumadɔ a kɛtɔ a bolo siila ǹ kɔlɔ mɔ ɲɔɔmɛn waate lɔ.»
[21] A ka kɛ ten ne, Janguba ka samalifen wolu lataa a ɲa, ale gbu do ka wo lon su kɛ a makɛya lɔ je.
[22] Su kelen wo lɔ, Janguba k'i wuli ka a moso fila ta, ani aa jɔnmoso fila, ani a denkɛ tan ni kelen (11), k'ai latimin Jaboki kɔɔni kɔma.
[23] A k'ai latimin kɔɔni kɔma, ani a sɔlɔnfennu bɛ.
[24] Janguba kelen ka to je, kɛ́ dɔ ka na ka bɔɔni bila a la. Ai do ka to bɔɔnila fɔɔ kɛnɛbɔ dafɛ.
[25] Kɛ́ wo k'a ye ngɛ ko a tɛnala sena Janguba la, a ka Janguba gbasi a tɔɔ la, ka a tɔɔ mua.
[26] Kɛ́ vɛɛ: «M̀ bila, ǹ'i taa, kamasɔlɔn kɛnɛ yi bɔ kan.» Janguba k'a javi, a vɛɛ: «Duwawu kɛ ǹ yɛ, niwotɛ ǹ t'i bila feu!»
[27] Kɛ́ k'a maɲininga, a vɛɛ: «I tɔɔ di?» A k'a javi, a vɛɛ: «Ǹ tɔɔ le Janguba.»
[28] Kɛ́ do vɛɛ: «I tɔɔ tɛnala kɛla Janguba le butu. Ile ni Ala vɛ sɛɛ kɛ, ile ni mɔɔnivinnu fana vɛ sɛɛ kɛ, i do vɛ see sɔlɔn. Wo le n'a kɛla, i tɔɔ kɛtɔ butu Isilan ne» (wo kɔlɔ le ko: «Ale ni Ala yi sɛɛ kɛla»).
[29] Janguba k'a fɔ a yɛ, a vɛɛ: «I jon, i tɔɔ fɔ ǹ yɛ.» Kɛ́ do vɛɛ a yɛ: «I y'a fɛ ka ǹ tɔɔ lɔn dailu mindɛ la?» A do ka duwawu kɛ Janguba yɛ je.
[30] Janguba k'a fɔ, a vɛɛ: «M̀ɛ Ala ye ɲa ni ɲa, wo bɛ n'a kɛ, ǹ nii yi ǹ nɔ bene.» Wo le k'a kɛ, Janguba ka woja tɔɔla ko Penuyɛli (wo kɔlɔ le ko «Ala ɲakɔlɔla»).
[31] Tele yi bɔla waate min nɔ, Janguba ka timin Penuyɛli la, a vɛ jiila a sen kelen ma, kamasɔlɔn a tɔɔ muannin tɛɛ.
[32] Wo le n'a kɛla, Bani-Isilankalu tɛ soo tɔɔlabuu dɔnna, kamasɔlɔn ai ka Janguba gbasi a tɔɔ le la, a fasa kan.