[1] Wo k'a talan, ai tɛɛ vɛ na Jusufu le Misilan. Misilanka kɛ́ Potifali, min tɛɛ Misilan masakɛ kankɔlɔsii dɔ le, aa lakanali kuntiiba koni, wo le ka Jusufu san Sumayila bɔzɔnnu ma, minu nanin a le je.
[2] Mɔ Tii Ala ka to Jusufu fɛ, a ka kɛ kunnadiyamɔɔ le. Jusufu siinin tɛɛ aa jɔnfa Misilanka kɛ́ ya bon na.
[3] Aa jɔnfa k'a ye ko mɔ Tii Ala yi Jusufu fɛ ko bɛ lɔ, kamasɔlɔn a tɛɛ vɛ a bolo bilala ko suu suu lɔ, wo bɛ tɛɛ sawati.
[4] Jusufu ya ko ka diya aa jɔnfa yɛ, wo do ka Jusufu kɛ a jɛlɛkanu madɛmɛnba le, ka ban ka a lasii aa bon kunna, ani ka a bolofennu bɛ kalifa a la.
[5] Ka ta Jusufu lasii ma Potifali bolo aa bon ni a bolofennu bɛ kunna, mɔ Tii Ala ka to balaka donna Misilanka kɛ́ wo ya bonnakolu lɔ ka bɛn Jusufu ya ko ma. Ala ya balaka tɛɛ a sɔlɔnfennu bɛ lɔ aa bon na, ani sɛnɛlu lɔ.
[6] Wo le k'a kɛ, Potifali ka aa ko bɛ to Jusufu bolo. Ka bɛn Jusufu ya ko ma, a tɛɛ tɛ a jɛlɛ ɲagbala foi la butu, fɔ a tɛɛ dɔnnifen minu dɔnna dein. Jusufu tɛɛ kavelen mafɛlɛn diyanin ne le.
[7] Waate dana timinnin, Potifali moso ɲa ka bɔ Jusufu la. A do vɛɛ a yɛ: «Na de, i la ǹ fɛ.»
[8] Kɛɛ Jusufu k'i ban. A do k'a fɔ aa jɔnfa moso yɛ, a vɛɛ: «Ǹa jɔnfa tɛ a jɛlɛ ɲagbala foi la aa bon na butu ka bɛn ǹa ko ma. A v'a sɔlɔnfen bɛ kalifa ǹ na.
[9] A vɛ ale ni ǹe lɔkaɲa bon min kɔnɔ. A do ma fen fen si ladalo a jɛlɛ yɛ, fɔ ile kelenpesa, kamasɔlɔn a moso le i le. Ǹ'i se kojuu ba dɛgbɛ min suu kɛla di vɛ wo lɔ, ka julumbu ta Ala la?»
[10] Moso ka to Jusufu laɲininna kuma kelen wo le tele o tele, kɛɛ Jusufu ma diɲa k'i sii a dafɛ, kumatɛ k'i la a fɛ.
[11] Lon dɔ, k'a talan bonnabɔiden dɔ pai tɛɛ tɛ bon na, Jusufu ka don bon na baale boloma.
[12] Moso ka Jusufu mina aa faaniba ma, k'a fɔ a yɛ, a vɛɛ: «Na de, i la ǹ fɛ!» Kɛɛ Jusufu ka aa faaniba to moso tɛɛ la, a vɛ bɔla bon na bɔli le.
[13] Moso k'a ye ngɛ ko Jusufu vɛ aa faaniba to a tɛɛ la ka bɔli ka bɔ bon na,
[14] a ka gbanɔ damina ka bonnabɔidennu kili. A do vɛɛ ai yɛ: «Ài y'a ye! Ǹ kɛ́ nanin Hebuluka kɛ́ dɔ le mɔ tɛma ka bɛn mɔ lafeyako ma. A na donna ǹ kan ko a a la ǹ fɛ, kɛɛ ǹ na gbanɔla fanga la.
[15] M̀ gbanɔkan mɛn a bolo, a na aa faaniba tola ǹ dafɛ, a vɛ bɔla bon na bɔli le.»
[16] Moso ka Jusufu ya faaniba ladalo a dafɛ haan fɔɔ Jusufu ya jɔnfa ka na bon na.
[17] Moso do ka kuma kelen wo ɲajiya a kɛ́ la, a vɛɛ: «I nanin iya jɔn min ne mɔ tɛma jan, ni a yi Hebuluka kɛ́ le, wo le na donna ǹ kan bi ǹa maloyako lɔ.
[18] Kɛɛ ǹ na m̀ gbanɔkan labɔla ngɛ, a na aa faaniba tola ǹ dafɛ, a vɛ bɔla bon na bɔli le.»
[19] Jusufu ya jɔnfa ka a moso kan mɛn ngɛ, a v'a fɔla, a vɛɛ: «Iya jɔn na min ni min ne kɛla ǹ na», a josola ka kuna.
[20] A ka taa Jusufu mina ka a bila kaso la, masakɛ ya kasodennu bilanin tɛɛ tɛɛminja. Jusufu ka to kaso la je.
[21] Kɛɛ mɔ Tii Ala ka to Jusufu fɛ, a vɛ kanundeya jiyala a la, min y'a kɛ, Jusufu ya ko yi diya kasobon lakanaliba yɛ.
[22] Wo le k'a kɛ, kasobon lakanaliba ka Jusufu lasii kasoden tɔlu bɛ kunna. Jusufu le tɛɛ ko bɛ ɲabɔla je butu.
[23] Kasobon lakanaliba tɛɛ vɛ ko suu suu tola Jusufu bolo, a tɛɛ tɛ haminna wo ko le butu, kamasɔlɔn mɔ Tii Ala tɛɛ Jusufu fɛ. A tɛɛ vɛ a bolo bilala ko suu suu lɔ, wo bɛ tɛɛ sawatila mɔ Tii Ala ya see lɔ.