[1] Wo waate lɔ, kɔɔn fitina ka don duu lɔ, iwo a na kɛla teme Ibulahima ya waate lɔ kɔlɔkɔlɔ le. Wo kɛ, Isiyaka ka taa Gelali so kɔnɔ, ka se Abimɛlɛki fɛlɔ, Filisitikalu ya masakɛ.
[2] Mɔ Tii Ala ka bɔ gbɛ la Isiyaka yɛ k'a fɔ a yɛ, a vɛɛ: «I kà taa Misilan dɛ! Ǹ kɛtɔ duu jiyala i la, i ka kan k'i sii tɛɛminja.
[3] I waate kɛ duu min nɔ bene. Ǹ totɔ i fɛ ka balaka don i lɔ, ka duu minu bɛ di ile ni i bɔzɔnnu ma. Ǹe do kɛtɔ ǹa kalinnikan mafala, ǹ na min tala i fa Ibulahima yɛ.
[4] Ǹ kɛtɔ i bɔzɔnnu walala iwo sanma lolonilu, ka duu minu bɛ di i bɔzɔnnu ma. Dunuɲa siboloma bɛ kɛtɔ balaka sɔlɔnna i bɔzɔnnu fɛ.
[5] Kamasɔlɔn Ibulahima tɛɛ ǹ kumakan labatola, ka ǹa jamalilu latelen, ani na laanalu, ani ǹa seliyalu.»
[6] Wo le k'a kɛ, Isiyaka k'i sii Gelali so kɔnɔ.
[7] Sokɔnɔkɛlu ka Isiyaka maɲininga ngɛ a moso ya ko ma, a k'a fɔ ko a dɔɔni le. A tɛɛ siyanna a fɔko lɔ k'a fɔ ko a moso le, kamasɔlɔn a k'a fɔ a miliya lɔ, a vɛɛ: «Jannɔ kɛlu kɛtɔ ǹ faala ka bɛn Lebeka ya ko ma, kamasɔlɔn a keinyayine bubale.»
[8] A k'i dɔni mafa je, Filisitikalu ya masakɛ Abimɛlɛki k'i ɲa kaan funɛtɛlɛ la, ka Isiyaka ni a moso Lebeka ye jamanibɔla.
[9] Wo ye Abimɛlɛki bolo, a ka Isiyaka kili k'a fɔ a yɛ, a vɛɛ: «I moso le min ne jɔ! A yi di vɛ, i n'a fɔla ko i dɔɔni le?» Isiyaka do vɛɛ a yɛ: «Ǹ na m̀ milila, ǹ ko, ai kana ǹ faa ka bɛn a ko ma.»
[10] Abimɛlɛki vɛɛ: «I na ko suu mindɛ kɛla mɔ la wo le? I m'a lɔn jannɔ kɛ́ dɔ tɛɛ sene a ɲaɲininna k'i la i moso fɛ wo lɔ, ka wo kolɔtiɲa kunko la mɔ kun?»
[11] Wo fɔ Abimɛlɛki bolo, a ka jama bɛ lali, a vɛɛ: «Mɔɔ min vɛ a bolo tuula kɛ́ min na, niwotɛ a moso, wo tii faatɔle.»
[12] Wo san kelen na, Isiyaka ka sɛnɛ kɛ duu wo lɔ. A na sɛnɛsi sɛnɛfensi min falinna, a ka wo ɲɔɔ kɛmɛ sɔlɔn, kamasɔlɔn mɔ Tii Ala ka balaka don a lɔ.
[13] Isiyaka ka banaya, a dɔ ka to lala aa banaya kɔkan fɔɔ a ka kɛ nafolotii ba le.
[14] Filisitikalu tɛɛ Isiyaka ɲangbeyaɲɛla, kamasɔlɔn saa ni bani ani nisilu tɛɛ a bolo, ani bɔiden siyama.
[15] Wo le k'a kɛ, a fa Ibulahima ya bɔidennu na kɔlɔn minu senna aa waate lɔ, Filisitikalu ka wolu bɛ gbelen fulu le.
[16] A laban nɔ, Abimɛlɛki k'a fɔ Isiyaka yɛ, a vɛɛ: «I i mataa mɔ la, kamasɔlɔn i fanga walanin vɛ mɔ ta le.»
[17] Isiyaka ka bɔ je ka taa a makɛ Gelali kɔɔ folonni lɔ k'i sii je.
[18] Wo kɛ, kɔlɔn minu sennin tɛɛ a fa Ibulahima ya waate lɔ, Filisitikalu tɛɛ vɛ minu gbelen a sa kɔ, Isiyaka ka kɔlɔn wolu lɔbɔ kula kɛ. A fa na tɔɔ minu lala kɔlɔn wolu la, Isiyaka ka tɔɔ kelen wolu la ai la kɔtunun.
[19] Lon dɔ, Isiyaka ya bɔidennu ka kɔlɔn dɔ sen kɔɔ folonni kɔnɔ ka se ji ma, min tɛɛ bɔlila fanga la.
[20] Kɛɛ Gelali kolofenkunnasiibalu ka Isiyaka ya kolofenkunnasiibalu dalasasa. Ai vɛɛ ai yɛ: «Ǹu le ta yi ji min ne.» Wo le k'a kɛ, Isiyaka ka kɔlɔn wo tɔɔla ko «Kɛlɛ».
[21] Isiyaka ya bɔidennu ka kɔlɔn gbɛlɛ sen ngɛ, Gelalikalu ka na k'ai dalasasa ka bɛn kɔlɔn wo ya ko ma tu. Wo le k'a kɛ, Isiyaka ka kɔlɔn wo tɔɔla ko «Dalasasa».
[22] A ka woja bila ka taa kɔlɔn gbɛlɛ sen tu. Mɔɔ ma na k'ai dalasasa ka bɛn wo ya ko ma butu. Wo kɛ, Isiyaka vɛɛ: «Tandainɔ yi ne, mɔ Tii Ala vɛ mɔ siiya lɔbuɲa, mɔ do jilitɔ duu min nɔ.» Wo le k'a kɛ, a ka kɔlɔn wo tɔɔla ko «Lɔbuɲa».
[23] Isiyaka ka bɔ je ka taa Bɛliseba.
[24] Su wo lɔ, mɔ Tii Ala ka bɔ gbɛ la k'a fɔ a yɛ, a vɛɛ: «Ǹe le i fa Ibulahima Tii le. I kà siyan, kamasɔlɔn ǹ'i i fɛ. Ǹe do kɛtɔ balaka donna i lɔ k'i bɔzɔnnu siyaya, ka bɛn ǹa bɔiden Ibulahima ya ko ma.»
[25] Isiyaka ka salakagbalan lɔ je, ka mɔ Tii Ala kili a tɔɔ la, ani ka aa faanigbaa lɔ woja. Aa bɔidennu do ka kɔlɔn gbɛlɛ sen kɔtunun.
[26] Wo timinnin kɔ, Abimɛlɛki ni a laliba Ahuzati ni aa kɛlɛkuluba Pikoli ka bɔ Gelali so kɔnɔ ka na Isiyaka fɛlɔ.
[27] Isiyaka k'ai maɲininga, a vɛɛ: «Àilu minu na m̀ gbɛnna àiya duu kɔnɔ ka bɛn ǹa lagbeyaɲɛ ma, a yi di ài natɔ m̀ ma kɔtunun?»
[28] Ai do k'a javi, ai vɛɛ: «A la vɛ gbɛ mɔ yɛ k'a fɔ ko i Tii Ala y'i fɛ. Ka bɛn wo ma, m'a fɛ salatikan yi kɛ ǹu ni ile wotɛ. Wo lɔ saa, m'i salatikan ta i ɲɔɔ yɛ k'a fɔ ko
[29] i tɛnala ko kɛla mɔ la, k'a kɛ iwo ǹu fana ma ko kɛ i la teme, mafɔ koɲuma gbaanzan, k'i bila hɛlɛ lɔ. I Tii Ala do vɛ balaka don i lɔ yi ne.»
[30] Wo kɛ, Isiyaka ka tiili ba kɛ ai yɛ. Ai ka dɔnni kɛ, k'i min.
[31] Ai do k'i wuli sɔɔmadanina k'i kalin i ɲɔɔ yɛ. Wo kɛ, Isiyaka k'ai lɔsiya, ai do ka falan i ɲɔɔ ma hɛlɛ lɔ ka taa.
[32] Wo lon kelen na, Isiyaka ya bɔidennu ka bɔ kɔlɔn senya lɔ ka na a fɔ a yɛ, ai vɛɛ: «Mɔ vɛ ji ye.»
[33] Isiyaka ka kɔlɔn wo tɔɔla ko Seba (wo kɔlɔ le ko «Kalinni»). Wo le n'a kɛla, hali bi ai y'a fɔla so wo ma ko Bɛliseba (min kɔlɔ yi «Kalinni Kɔlɔn»).
[34] Esawu si danma senin san binaani (40) lɔ, a ka Juditi fulu, Hɛtika kɛ́ Beeli denmoso. A ka Basemati fulu fana, Hɛtika kɛ́ Elon denmoso.
[35] Moso wolu ya ko ka Isiyaka ni Lebeka niimakumun kosɛvɛ.