[1] Wo timinnin kɔ, mɔ Tii Ala k'a fɔ Nuho yɛ, a vɛɛ: «I yi don kulunba kɔnɔ, ile ni iya demayalu bɛ, kamasɔlɔn m̀ɛ a ye k'a fɔ ko ile kelenpesa le telennin bi mɔɔlu tɛma.
[2] I yi soo ladaannin suu bɛ dɔ ta i fɛ, a kɛman wolowulan ani a mosoman wolowulan. I yi soo kɔnnin suu bɛ fana ta, a kɛman kelen ani a mosoman kelen.
[3] I yi kɔnɔ suu bɛ fana ta, a kɛman wolowulan ani a mosoman wolowulan, min y'a kɛ, ai suu yi to ai nii la duukolo kɔkan.
[4] Kamasɔlɔn tele wolowulan vɛ timinna, ǹ kɛtɔ sanji lanala duukolo kɔkan haan fɔɔ tele binaani (40) ni su binaani (40). Ǹ na niimafen suu suu danna, ǹ kɛtɔ wolu bɛ halakila k'ai bɔ duukolo kɔkan.»
[5] Nuho do ka ko bɛ kɛ iwo mɔ Tii Ala na a jamalila teme.
[6] Nuho sɔlɔn san kɛmɛ wɔɔlɔ (600) le na bɛnna tufana na ma duukolo kɔkan.
[7] Nuho, a denkɛlu, a moso, aini a maamosolu bɛ ka don kulunba kɔnɔ, min y'a kɛ, ai yi kisi ka bɔ tufanaji ma.
[8] Soo ladaanninu o, soo kɔnninu o, kɔnɔlu o, ani niimafen mɛsɛnnu,
[9] ai bɛ fila fila ka don kulunba kɔnɔ Nuho fɛ, a kɛman ni a mosoman, iwo Ala na Nuho jamalila teme.
[10] Tele wolowulan timinnin, tufanaji ka na damina duukolo kɔkan.
[11] Nuho sɔlɔn san kɛmɛ wɔɔlɔna (600), wo san kalo filana, tele tan ni wolowulanna (17), ji siiya minu yi duu kɔlɔ, wolu ka te ka ji jɛzɛn duukolo fan bɛ lɔ. Sangbololɔ ji siiyalu dalu la ka ka fana.
[12] Sanji do ka to nala duukolo kɔkan haan fɔɔ tele binaani (40) ni su binaani (40).
[13] Wo lon kelen na, Nuho ni a moso tɛɛ vɛ don kulunba kɔnɔ, ani a denkɛ sawa: Sɛmu, Hamu ani Jafɛti, ani ai moso sawa.
[14] Niimafen suu bɛ tɛɛ vɛ don kulunba kɔnɔ ai fɛ: tuukɔlɔsoo suu bɛ, kolofen suu bɛ, kɔnɔ suu bɛ, ndiinfen suu bɛ, ani niimafen mɛsɛn suu bɛ.
[15] Fen suu suu y'a nunakilila, wo bɛ fila fila ka don kulunba kɔnɔ Nuho fɛ.
[16] Niimafen suu bɛ ka don, a kɛman ni a mosoman, iwo Ala na Nuho jamalila teme. Wo kɛ, mɔ Tii Ala ka kulunba da tuun Nuho ma.
[17] Tele binaani (40) kɔlɔ, tufanaji ka to nala duukolo kɔkan. Ji do ka to siyayala fɔɔ ka kulunba kɔlɔta k'a bɔ duu ma.
[18] Ji fanga ka to walala duukɔlɔ kɔkan, a vɛ tola siyayala. Kulunba do k'i dɛn ji kɔkan.
[19] Ji fanga ka to walala duukolo fan bɛ lɔ, fɔɔ ka tini jaanjaannu bɛ latunun ji kɔlɔ.
[20] Ji ka to jɛlɛla k'a la tinilu kɔkan. Ka bɔ tini kɔkanla ma ka se ji dan na a kunma, wo tɛɛ nɔngulu ɲa tan ni loolu (15) le le.
[21] Niimafen suu suu minu yi taamana duukolo kɔkan, wolu bɛ ka to a lɔ: kɔnɔlu, kolofennu, tuukɔlɔsoolu, niimafen mɛsɛnnu, ani mɔɔnivinnu bɛ.
[22] Fen suu suu y'a nunakilila duu jalan kɔkan, wo bɛ ka faa.
[23] Mɔ Tii Ala ka duukolo niimafen bɛ halaki ten ne. Mɔɔnivinnu o, soolu o, kɔnɔlu o, ani niimafen mɛsɛnnu, ai bɛ ka halaki ka bɔ duukolo kɔkan. A ka to Nuho kelen ma, ani minu tɛɛ a fɛ kulunba kɔnɔ.
[24] Tufanaji fanga ka to duukolo kɔkan fɔɔ tele kɛmɛ ni biloolu (150).