[1] Wo kɛ, Isiyaka ka Janguba kili ka duwawu kɛ a yɛ, ka ban k'a jamali, a vɛɛ: «I kà Kanaan moso fulu dɛ!
[2] Taa Suliya jamana sanfɛ fannɔ, i yi se i bema Betuwɛli ya bon na. I yi moso dɔ ta je i bainkɛ Laban denmosolu lɔ.
[3] Ala Taala yi balaka don i lɔ, k'i jili, k'i bɔzɔnnu siyaya, min y'a kɛ, jama siyama yi bɔ i lɔ.
[4] Ala yi Ibulahima lɔhɔlɔma la ile ni i bɔzɔnnu kan, min y'a kɛ, i yi duu wo mala, Ala na duu min dila Ibulahima ma, i siinin duu min nɔ lonaya boloma.»
[5] Isiyaka ka Janguba lataa Suliya jamana sanfɛ fannɔ wo ɲa le ma, ko a yi taa Laban fɛlɔ, min kɛnin Alamuka kɛ́ Betuwɛli denkɛ le, ani Lebeka kɔlɔkɛ, Lebeka min tɛɛ Janguba ni Esawu ba le.
[6] Esawu k'a mɛn ko Isiyaka na duwawu kɛla Janguba yɛ ka a lataa Suliya jamana sanfɛ fannɔ ka bɛn moso tako ma je, ani a tɛɛ duwawu kɛla a yɛ waate min nɔ, a k'a jamali ko a kà Kanaan moso fulu.
[7] Esawu k'a mɛn fana ko Janguba ka a fa ni a ba kumakan labato ka taa Suliya jamana sanfɛ fannɔ.
[8] Esawu k'a lɔn wo le ma ko Kanaan mosolu ya ko diyanin tɛɛ tɛ a fa Isiyaka yɛ.
[9] Wo le k'a kɛ, Esawu ka taa Sumayila fɛlɔ, Ibulahima denkɛ, ka wo denmoso dɔ fulu, min tɔɔ tɛɛ ko Mahalati, ka a la a mosolu kan. Mahalati kɔlɔkɛ tɔɔ le tɛɛ ko Nebayoti.
[10] Janguba ka bɔ Bɛliseba ka Halan siya mina.
[11] A ka se dingila dɔ lɔ ka si je, kamasɔlɔn su tɛɛ vɛ ko. A do ka kawakulun dɔ ta je, ka a don a kun kɔlɔ, a v'i lala sunɔɔ lɔ.
[12] A ka siwo ka sɛnɛɛ ye, min daminanin ka bɔ duu ma ka a kunnama se sangbolo ma, Ala ya mɛlɛkalu vɛ jii ni jɛlɛla a kan.
[13] Mɔ Tii Ala gbu lɔnin tɛɛ sɛnɛɛ wo kunma. A do vɛɛ: «Ǹe le i Tii Ala le, i bema Ibulahima ni i fa Isiyaka yi min batola. I lanin duu min kan yi ne, ǹ kɛtɔ wo dila ile ni i bɔzɔnnu ma.
[14] I bɔzɔnnu walatɔ iwo duukolo bamu, k'ai jɛzɛn telebɔ ni teleben ni bolonunma ani bolokini fannu bɛ lɔ. Dunuɲa kabila bɛ kɛtɔ balaka sɔlɔnna i bɔzɔn ne lu fɛ.
[15] Ǹ'i i fɛ waate bɛ. Ǹ kɛtɔ i kunmafɛlɛnna i timinyalu bɛ lɔ, k'i laseikɔ duu min nɔ. Ǹ tɛnala i bilala, fɔ m̀ɛ ǹa lahedi mafala i yɛ.»
[16] Janguba ka kunun ka bɔ sunɔɔ lɔ k'a fɔ, a vɛɛ: «Tuɲa le, ǹ Tii Ala yi dingila min nɔ, kɛɛ ǹ tɛɛ m'a lɔn.»
[17] Janguba ka siyan k'a fɔ, a vɛɛ: «Jannɔ yi dingila masiyannin ne le! Min tɛ dingila gbɛlɛ le, mafɔ Ala ya bon ni haijɛnɛ donda.»
[18] Wo dusagbɛlon sɔɔmadanina, Janguba ka kawakulun wo ta, a kun lanin tɛɛ min ka, ka wo lalɔ k'a kɛ hangilitonɔkawa le, ka ban ka tulu bɔn a kan.
[19] A ka woja tɔɔla ko Bɛtɛli (wo kɔlɔ le ko «Ala ya bon»). Kɔlɔkɔlɔ le, ai tɛɛ a fɔla so wo ma ko Luzi.
[20] Janguba ka dakan ta Ala yɛ, a vɛɛ: «Ni Ala ka to ǹ fɛ, ka ǹ kunmafɛlɛn ǹa taama min nɔ, ka balo ni feeyabɔ di m̀ ma,
[21] min y'a kɛ, ǹ'i seikɔ ǹ fa ya bon na hɛlɛ lɔ, wo vɛ kɛla, ǹ kɛtɔ a lɔnna k'a fɔ ko ǹ Tii Ala le.
[22] M̀ɛ kawakulun min lalɔ ka wo kɛ hangilitonɔkawa le, wo kɛtɔ Ala ya bon ne le. I vɛ fen suu suu dila m̀ ma, ǹ kɛtɔ fen wo jaa bɔla i yɛ.»