[1] Wo le k'a kɛ, Ibulama ka bɔ Misilan ka taa Nɛgɛbi gbɛkɛnɛ lɔ, ale ni a moso ni Luti ani a sɔlɔnfennu bɛ.
[2] Wo k'a talan, Ibulama tɛɛ nafolotii ba le. Kolofennu ni wɔligbɛ ni sanu tɛɛ a bolo a ɲa ma.
[3] A ka bɔ Nɛgɛbi gbɛkɛnɛ lɔ ka to taamana sɛgbɛsɛgbɛ, haan fɔɔ ka se Bɛtɛli, Ibulama tɛɛ vɛ aa faanigbaa lɔ tɛɛminja kɔlɔkɔlɔ le, Bɛtɛli ni Ayi solu wotɛ,
[4] ani a tɛɛ vɛ salakagbalan lɔ tɛɛminja. Ibulama se je, a ka mɔ Tii Ala kili a tɔɔ la.
[5] Wo k'a talan, saa ni bani ni nisilu tɛɛ Ibulama taamaɲɔɔ Luti fana bolo, wo ni bɔidennu ni aa demayalu.
[6] Wo le k'a kɛ, ai mɔɔ fila tɛɛ tɛ se kunna duu kelen nɔ. Ai tɛɛ tɛ se i siila tɛɛ kelen nɔ ka bɛn ai bolofennu wala ɲa jate ma.
[7] Kɛlɛ ka to wulila Ibulama ya kolofenkunnasiibalu ni Luti ya kolofenkunnasiibalu wotɛ. Kanaankalu ni Pelizikalu siinin tɛɛ duu wo lɔ bene wo waate lɔ.
[8] Wo kɛnin, Ibulama k'a fɔ Luti yɛ, a vɛɛ: «Mɔ kà diɲa kɛlɛ yi wuli ile ni ǹe wotɛ, niwotɛ iya kolofenkunnasiibalu ni ǹ talu wotɛ. M'i jeli kelen ne le.
[9] Duu bɛ labilanin tɛ i yɛ? M'i falan a ma. Ni i ka taa bolonunma fannɔ, ǹe yi taa bolokini fannɔ. Ni i do ka taa bolokini fannɔ, ǹe yi taa bolonunma fannɔ.»
[10] Luti k'a ɲa lajii k'a ye ko jiko nɔyanin Julidɛn fofa lɔ, Zowali so fannɔ, iwo mɔ Tii Ala ya gbele kɛnin tɛɛ teme, niwotɛ iwo Misilan yi teme jiko lɔ. Mɔ Tii Ala tɛɛ ma Sɔdɔmu ni Gɔmɔli solu halaki ba bene wo waate lɔ.
[11] Wo le k'a kɛ, Luti ka Julidɛn kɔɔ fofa bɛ ta a jɛlɛ yɛ, a vɛ taama lawulila ka taa telebɔ fannɔ siya le. Ale ni Ibulama ka falan a ma ten ne.
[12] Ibulama k'i sii Kanaan duu lɔ, kɛɛ Luti do ka t'i sii fofa kɔnɔ solu tɛma Sɔdɔmu magbɛn nɔ.
[13] Wo k'a talan, Sɔdɔmu sokɔnɔmɔɔlu juuyayine tɛɛ bubale. Ai tɛɛ julumbutɔ ba le le mɔ Tii Ala ɲakɔlɔ.
[14] Luti ni Ibulama falan kɔ, mɔ Tii Ala k'a fɔ Ibulama yɛ, a vɛɛ: «Ibulama, i kun lawuli. I lɔnin tɛɛminja yi ne, i ɲa lataa bolonunma ni bolokini nɔ ani telebɔ ni teleben nɔ.
[15] I ɲa yi duu min bɛ la yi ne, ǹ kɛtɔ wo bɛ dila ile ni i bɔzɔnnu ma, k'a kɛ ài ta le kudein!
[16] Ǹ kɛtɔ i bɔzɔnnu siyayala k'ai kɛ iwo duukolo kiɲɛ. Ni mɔɔ yi sene duukolo kiɲɛ kɔndɛla, wo tii yi sene i bɔzɔnnu kɔndɛla.
[17] I wuli, i yi duu lɔtaama ka a lɔ ni a fɛlɛma jate ye, kamasɔlɔn ǹ kɛtɔ a bɛ dila ile le ma.»
[18] Wo kɛ, Ibulama ka aa faanigbaalu bɔ je ka t'i sii Mamele ya kɔlɔmaju balu dafɛ, min yi Hɛbulon so da la. A do ka salakagbalan lɔ je mɔ Tii Ala batoko lɔ.