[1] Kɔɔn ka to gbeleyala duu lɔ.
[2] Ai wɔlinin sɛnɛfen kɛsɛ wo bɛ dɔnna, Janguba denkɛlu nanin minu le ka bɔ Misilan, ai fa do vɛɛ ai yɛ: «Ài yi taa balo dɔni san mɔ yɛ kɔtunun.»
[3] Juda do vɛɛ a yɛ: «Kɛ́ wo na lailikan gbɛlɛn ne fɔla mɔ yɛ, a vɛɛ: ‹Ài man kan k'ài lɔ ǹ kɛɛna butu, fɔ ài dɔɔni vɛ kɛla ài fɛ.›
[4] Ni i ka diɲa mɔ dɔɔni taako ma mɔ fɛ, wo vɛ kɛla, m'i taale balo sanya lɔ i yɛ.
[5] Ni i do ma diɲa a taako ma, mɔ tɛnala taala, kamasɔlɔn kɛ́ wo n'a fɔ yi la mɔ yɛ, a vɛɛ: ‹Ài man kan k'ài lɔ ǹ kɛɛna butu, fɔ ài dɔɔni vɛ kɛla ài fɛ.› »
[6] Janguba do k'ai maɲininga, a vɛɛ: «A kɛnin di ài na kojuu min suu kɛla ǹ na, k'a fɔ kɛ́ wo yɛ ko dɔɔkɛ gbɛlɛ y'ài bolo?»
[7] Ai do vɛɛ a yɛ: «Kɛ́ wo na mɔ maɲiningala kosɛvɛ ka bɛn maa kolu ni maa demayalu ya ko ma. A vɛɛ: ‹Ài fa y'a nii la bene? Jalasa dɔɔkɛ gbɛlɛ y'ài bolo?› Mɔ na min fɔla a yɛ, wo le kɛnin ɲiningali javi le. Mɔ tɛɛ k'a lɔn ne k'a fɔ ko a kɛtɔle a fɔla mɔ yɛ ko m'i na mɔ dɔɔnin ne?»
[8] Wo fɔ, Juda do vɛɛ Janguba yɛ: «Ǹ fa, i jon, i yi kavelen kalifa ǹ na, m'i taama lawuli telemanin, fɔsa m'i to mɔ nii teme, ile ni ǹu ani maa demayalu kana taa sa.
[9] Ǹ'i ǹ jɛlɛ kɛla tɔima le ka bɛn kavelen latangako ma. Ni ko suu suu ka kɛ a la, i yi ǹe maɲininga. Ni m̀ ma a laseikɔ i ma k'a lalɔ i kɛɛna, wo vɛ kɛla, wo kunko latɔ ǹ kun ǹa dunuɲalɔtɛɛ tɔ bɛ lɔ.
[10] Ni tamala tɛɛ ma don mɔ taako la, iwo mɔ tɛɛ vɛ siɲa fila kɛ.»
[11] Ai fa Janguba do vɛɛ ai yɛ: «Ni a kɛɲa gbɛlɛ tɛ je, ài y'a kɛ ten. Ài yi taa maa duu tɔnɔmafen dɔlu le àiya donilu lɔ, ka taa a kɛ Misilanka kɛ́ sama le. Ài yi tulu sumadiyanin dɔlu ta, ani li, ani kɔlɔmajɛn sumadiyaninnu, aini kɔlɔmaden dɔlu, m'a fɔla minu ma ko piseteku ni amande.
[12] Ài yi taa àiya wɔli ɲɔɔzii fila le. Wɔli min laseikɔnin ài ma k'a lala aiya bɔlɔlu lɔ, ài yi wolu lasei, ni a k'a talan fili le kɛnin.
[13] Ài yi taa ài dɔɔkɛ le ài fɛ, ài y'ài kɔsei Misilanka kɛ́ fɛlɔ telemanin.
[14] Ala Taala yi ài mahena don kɛ́ wo la, kosa a ài badenmakɛ Simiyɔn ni Bɛnjamin bila. Ni ǹe do ka fo ǹ dennu la, wo vɛ kɛla, ale le ve le.»
[15] Wo fɔ, ai ka samalifen wolu bila àiya donilu lɔ, ani àiya wɔli ɲɔɔzii fila, ka ban ka Misilan siya mina, aini Bɛnjamin nu. Ai se je, ai ka t'i lɔ Jusufu kɛɛna.
[16] Jusufu ka Bɛnjamin ye ngɛ ai fɛ, a k'a fɔ aa bonkunnasiiba yɛ, a vɛɛ: «I yi taa mɔɔ minu malɔ ǹa bon na, i yi kolofen dɔ kannatɛɛ ka dɔnnifen dɔ lɔbɛn, kamasɔlɔn mɔɔ minu kɛtɔ telelɔ dɔnna ǹe le fɛ bi.»
[17] Kɛ́ wo ka taa ai le Jusufu ya bon na iwo a n'a fɔla a yɛ teme.
[18] Ai tɛɛ taala ai malɔla Jusufu ya bon na waate min nɔ, ai tɛɛ siyanna. Ai do vɛɛ: «Ai nanin mɔ le jan ka bɛn wɔli ko wo le ma, min laseikɔnin mɔ ma maa bɔlɔlu lɔ, maa taama kunfɔlɔ lɔ jan. A kɛyine iwo mɔ laɲininko le min ne, min y'a kɛ, kɛ́ wo yi mɔ mina ka mɔ bila jɔnya lɔ, ani ka maa sofalinilu ta a jɛlɛ yɛ.»
[19] Wo le k'a kɛ, ai k'i madon Jusufu ya bonkunnasiiba la bonda la, ka kuma damina a fɛ.
[20] Ai do vɛɛ a yɛ: «Mɔ fa, i hakɛ to. Waate timinnin, mɔ ka na jan balo sanko lɔ.
[21] Kɛɛ mɔ seikɔ waate waate mɔ fɛso, mɔ k'i lɔ siya wotɛ waate min nɔ, mɔ ka maa bɔlɔlu lafɔlin ka mɔ kelenkelenna bɛ k'i ta wɔli ye iya bɔlɔ lɔ, a bɛ dafanin. Wo le n'a kɛla, mɔ seikɔnin a le.
[22] Mɔ nanin wɔli gbɛlɛ le fana ka bɛn balo sanko ma. Kɛɛ mɔɔ kelen min na wɔli wolu bilala maa bɔlɔlu lɔ, mɔ ma wo tii kelen lɔn.»
[23] Bonkunnasiiba k'ai javi, a vɛɛ: «Ài y'ài josolajii. Ài kà siyan. A kɛyine iwo àilu ni ài fa yi Ala min batola, wo le na nafolo bilala àiya bɔlɔlu kɔnɔ ài yɛ, kamasɔlɔn àiya wɔlilu dafanin seyine m̀ ma.» Wo fɔ a bolo, a ka Simiyɔn lana ai fɛ.
[24] Wo kɛ, a k'ai bɛ ladon Jusufu ya bon na, ka ji di ai ma ai sen makoko lɔ, ka ban ka balo di aiya sofalinilu ma.
[25] Ai do ka aiya samalifennu jatesii ka bɛn Jusufu nako ma telelatelen waate lɔ, kamasɔlɔn ai tɛɛ v'a mɛn ko ai natɔ telelɔ dɔnna wo le ja.
[26] Jusufu se bon na, ai ka samalifen wolu di a ma, ai nanin minu le bon na, ka ban k'ai mabilin a sen kɔlɔ.
[27] Wo kɛ, Jusufu k'ai fo, a vɛɛ: «Tana tɛ ài la? Ài fa do? Ài na kɛkɔlɔba min ya ko fɔla ǹ yɛ, a kɛnɛ vɛ? A a nii la bene?»
[28] Ai do ka Jusufu javi, ai vɛɛ: «Tana suu suu tɛ mɔ fa la, ale min kɛnin iya bɔiden ne. A a nii la yi ne.» Wo fɔ ai bolo, ai k'ai mabilin Jusufu sen kɔlɔ kɔtunun.
[29] Jusufu do k'a kun lawuli ka a dɔɔni Bɛnjamin ye, a jɛlɛkanu baden. A do vɛɛ: «Jalasa ai na ài dɔɔni min ya ko fɔla ǹ yɛ, wo le ne?» A vɛɛ kɔtunun: «Ǹ den, Ala yi hena i la.»
[30] Wo fɔ Jusufu bolo, a k'i lateleja ka bɔ je, kamasɔlɔn a tɛɛ kasi bolo le ma a baden maɲuma kosɔn. A do ka don bon sokon nɔ ka kasi damina.
[31] A wɔlinin a ɲa lakola, a k'a jɛlɛ lɔmina ka bɔ. A do ka jamali di ko ai yi na dɔnnifennu le.
[32] Ai ka Jusufu ta kuna sii a kɛɛna jɛ, ka a badenmalu ta kuna sii ai kɛɛna jɛ, ani ka Misilankalu ta kuna sii ai kɛɛna jɛ, minu kɛtɔ dɔnni kɛla ai fɛ, kamasɔlɔn Misilankalu ya dɔnnikɛko Hebululu fɛ, ai tɛɛ wo yena kolakɔsɔnin ne le.
[33] Ai do siinin ka to Jusufu ɲakɔlɔ, ai v'i ɲɔɔ lɔgbɛnna kawakoya boloma, kamasɔlɔn ai k'ai lasii k'ai tuuntuun i ɲɔɔ na iwo ai sɔlɔnnin teme, ka damina kɔlɔmamɔɔ ma ka taa sii dɔɔmamɔɔ la.
[34] Jusufu k'ai sɔ ka bɔ a ta nii kuna lɔ, kɛɛ a ka a kɔlɔnu ta nii ɲɔɔzii loolu le di Bɛnjamin ma. Ai do ka lɛzɛnji min Jusufu fɛ fɔɔ k'ai wasa.