[1] Ko wolu timinnin kɔ, Adama k'i la a moso Hawa fɛ. Wo do ka kɔnɔ ta ka Kabila sɔlɔn. A vɛɛ: «M̀ɛ kɛ́ sɔlɔn ǹ Tii Ala ya see lɔ.»
[2] A ka kɔnɔ ta kɔtunun ka wo dɔɔkɛ Habila sɔlɔn. Habila ka kɛ saakunnasiiba le, Kabila do ka kɛ sɛnɛkɛba le.
[3] Waate dana timinnin, Kabila ka na aa sɛnɛfen dɔlu le, ka wolu nii mɔ Tii Ala ma.
[4] Kɛɛ Habila do ka na soo kɛɛnma jɔlɔlu le ka bɔ aa saadennu lɔ, minu tɛɛ ai banu den kunfɔlɔlu le. Habila ni aa niilifen ka diya mɔ Tii Ala yɛ,
[5] kɛɛ a ma Kabila ni aa niilifen jate fen ne. Wo le k'a kɛ, Kabila ka mɔnɛ bubale, ka a ɲakɔlɔsili.
[6] Mɔ Tii Ala k'a fɔ Kabila yɛ, a vɛɛ: «I mɔnɛnin mindɛ lɔ? Mindɛ kɛnin i ɲakɔlɔsilinin?
[7] Ni i ka kokein kɛ, i ɲalɔ yi kɛnɛyale. Ni i do ma kokein kɛ, iya julumbu kɛtɔle iwo soo fali min kɔngɔnin i la iya bonnada la. Julumbu wo yi iya ko ɲaɲininna, fɔsa a y'i mala, kɛɛ ile ka kan ka se a la.»
[8] Wo kɛ, Kabila k'a fɔ a dɔɔni Habila yɛ, a vɛɛ: «M'i taa tuu kɔlɔ.» Ai se je, Kabila k'i kɛ a dɔɔni kan ka a faa.
[9] Wo kɛ, mɔ Tii Ala vɛɛ Kabila yɛ: «I dɔɔni Habila yi min?» Kabila vɛɛ: «M̀ m'a lɔn a yi tɛɛminja. Jalasa ǹe le a kunnasiiba le?»
[10] Wo fɔ a bolo, mɔ Tii Ala do vɛɛ a yɛ: «I na ko suu mindɛ kɛla yi ne? I dɔɔni jeli kasikan yi bɔla duu kɔlɔ, ka se m̀ ma jan, ko ka a ta sala i lɔ.
[11] Duu min na i dɔɔni jeli minna, i daanyine duu wo kɔkan butu.
[12] I vɛ duu labaalela, a tɛnala i nafala butu. I kɛtɔ bilansennamɔɔ le le duukolo kɔkan kudein.»
[13] Kabila do vɛɛ mɔ Tii Ala yɛ: «Ǹ tɛ kolatɔn min manɔ.
[14] I m'a ye? I vɛ m̀ gbɛn ka bɔ duukolo kɔkan bi. Fɔ ǹ'i taa ǹ doon ka m̀ bɔ i ɲakɔlɔ, ka kɛ bilansennamɔɔ le duukolo kɔkan kudein. Mɔɔ o mɔɔ vɛ ǹ yena, wo tii yi ǹ faale.»
[15] Mɔ Tii Ala vɛɛ Kabila yɛ: «Wo tɛ kɛ. Ni mɔɔ o mɔɔ vɛ ile Kabila faala, julu wo salatɔ wo tii lɔ siɲa wolowulan ne le.» Mɔ Tii Ala ka tɔɔmase bila Kabila ma, fɔsa mɔɔ min vɛ a yena, wo tii kana a faa.
[16] Wo kɔ, Kabila ka bɔ mɔ Tii Ala ɲakɔlɔ ka t'i sii Nodi duu kɔnɔ, min yi Edɛn duu telebɔ fannɔ.
[17] Kabila k'i la a moso fɛ. Wo do ka kɔnɔ ta ka Enoki sɔlɔn. Kabila ka so labɔ mingɛ, a ka so wo tɔɔla a denkɛ Enoki la.
[18] Enoki ka Iladi sɔlɔn. Iladi ka Mehuyayɛli sɔlɔn. Mehuyayɛli ka Mɛtusayɛli sɔlɔn. Mɛtusayɛli ka Lamɛki sɔlɔn.
[19] Lamɛki ka moso fila ta: a kelen tɔɔ tɛɛ ko Ada, a tɔ kelen tɔɔ tɛɛ ko Zila.
[20] Ada ka denkɛ sɔlɔn ka wo tɔɔla ko Jabali. Mɔɔ minu y'ai siila faanigbaalu kɔlɔ, ai vɛ aiya kolofennu kɔnɔgbɛnna, Jabali ka kɛ wolu bema le.
[21] Jabali dɔɔkɛ le tɛɛ Jubali le. Wo le ka kɛ kɔnifɔbalu ni sɛnfɛbalu bɛ bema le.
[22] Zila fana ka denkɛ sɔlɔn ka wo tɔɔla ko Tubali-Kabila. Wo ka kɛ siyaki le, min tɛɛ baalefen suu bɛ dɔ ladanna ka bɔ daɲawulɛn ni nɛɛ lɔ. Tubali-Kabila dɔɔmoso tɔɔ tɛɛ ko Naama.
[23] Lamɛki k'a fɔ a mosolu yɛ, a vɛɛ: «Ada ni Zila, ài yi ǹ kan lamɛn, àilu Lamɛki mosolu, ài y'ài tolomalɔ ǹ kumakan na. Ni mɔɔ o mɔɔ ka m̀ madimin, ǹ kɛtɔ kɛ́ dɔ faala. Ni mɔɔ o mɔɔ do ka m̀ gbasi, ǹ kɛtɔ kavelenni dɔ faala.
[24] Ni mɔɔ min ka Kabila faa, a faako julu wo salatɔ wo tii lɔ siɲa wolowulan ne le. Ǹe Lamɛki koni, ǹ ta julu salatɔ siɲa biwolowulan ni wolowulan (77) ne le.»
[25] Adama k'i la a moso fɛ kɔtunun. Wo do ka kɔnɔ ta ka denkɛ sɔlɔn. A moso do ka wo tɔɔla ko Sɛti (wo kɔlɔ le ko «Latɛɛ»), kamasɔlɔn a k'a fɔ, a vɛɛ: «Ala vɛ den dɔgbɛlɛ latɛɛ m̀ ma, ka wo kɛ Habila ɲɔɔ le, Kabila na min faala.»
[26] Sɛti fana ka denkɛ sɔlɔn ka wo tɔɔla ko Enosi. Mɔɔlu ka mɔ Tii Ala kili damina a tɔɔ la wo waate le lɔ.