[1] Ko wolu timinnin kɔ, ai k'a fɔ Jusufu yɛ ko a fa man kɛnɛ. Wo kɛ, Jusufu ka a denkɛ fila Manase ni Efilaimu ta, ka taa ai le a fa fɛ.
[2] A fɔnin Janguba yɛ ko a denkɛ Jusufu vɛ na, a k'i lɔja k'i wuli k'i sii aa lafen kan.
[3] Janguba do vɛɛ Jusufu yɛ: «Ǹ tɛɛ Luzi so la waate min nɔ, Kanaan duu lɔ, Ala Taala ka bɔ gbɛ la ǹ yɛ ka balaka don ǹ nɔ.
[4] A do vɛɛ ǹ yɛ: ‹Ǹ kɛtɔ i jilila ka i bɔzɔnnu siyaya k'ai kɛ siboloma siyama le. Ǹ kɛtɔ duu min dila i bɔzɔnnu ma i kɔ, k'a kɛ ai ta le kudein.› »
[5] Janguba k'a fɔ Jusufu yɛ kɔtunun, a vɛɛ: «I denkɛ fila koni, i na den minu sɔlɔnna Misilan jani ǹ'i na i fɛlɔ, ǹ'i wolu kɛla ǹ ta le le bi. Efilaimu ni Manase kɛtɔ ǹ ta le iwo Lubɛn ni Simiyɔn yi ǹ ta le teme.
[6] I vɛ den minu sɔlɔnna dɔ wolu kɔ, wolu kɛtɔ i ta le le. Maasinin, ai bɔzɔnnu kɛtɔ kɛɛ sɔlɔnna Efilaimu ni Manase bɔzɔnnu le fɛ.
[7] Ǹ'i ko min kɛla yi ne ka bɛn i ba Lasɛli ya ko le ma. Waate min nɔ ǹ tɛɛ ǹ kɔseila Kanaan duu lɔ ka bɔ Suliya, i ba ka sa m̀ bolo siya wotɛ, k'a talan mɔ dɔni majaannin tɛɛ Efilata so la bene. Ǹ ka a sudoon Efilata siya dafɛ je» (Ai y'a fɔla Efilata ma bi ko Bɛtilɛhɛmu).
[8] Janguba ka Jusufu denkɛlu ye ngɛ, a vɛɛ: «Jene minu le?»
[9] Jusufu ka a fa javi, a vɛɛ: «Ala na ǹ sɔla denkɛ fila minu la jan, wolu le.» Janguba vɛɛ: «Ai madon ǹ na, ǹ'i duwawu kɛ ai yɛ.»
[10] Wo k'a talan, Janguba ɲala tɛɛ vɛ divi ka bɛn kɔlɔya ma. A tɛɛ tɛ yeni kɛla kobɛn butu. Jusufu ka a denkɛlu madon a la, Janguba do k'i fili ai lɔ k'ai sumu ai taman nɔ.
[11] A k'a fɔ Jusufu yɛ, a vɛɛ: «Ǹ jii tɛɛ tɛ a ma k'a fɔ ko ǹ kɛtɔ i ɲakɔlɔla yena butu. Kɛɛ Ala do vɛ diɲa, m̀ɛ i bɔzɔnnu gbu ye!»
[12] Jusufu ka a denkɛlu ta k'ai bɔ a fa sen kan, ka ban k'a ten bilin duu ma.
[13] Wo kɛ Jusufu bolo, a ka Efilaimu mina a bolokini le, ani ka Manase mina a bolonunma le, k'ai mɔɔ fila lalɔ Janguba kɛɛna, Efilaimu vɛ a bolonunma fannɔ siya le, Manase vɛ a bolokini fannɔ siya le.
[14] Kɛɛ Janguba ka a bolo latimin i ɲɔɔ kɔma, ka a bolokini latimin ka a la Efilaimu kunma, min kɛnin dɔɔmamɔɔ le, a ka a bolonunma latimin ka a la Manase kunma, min kɛnin kɔlɔmamɔɔ le.
[15] Wo kɛ, Janguba ka duwawu kɛ Jusufu yɛ, a vɛɛ: «M̀ bema Ibulahima ni ǹ fa Isiyaka tɛɛ taamana Ala min ya siya kan, Ala min tonin ǹ kunmafɛlɛnna ka ta ǹ sɔlɔnlon ma haan ka na sii bi la,
[16] mɛlɛka min ka ǹ kunmaka ka m̀ bɔ koyon bɛ ma, wo yi balaka don denkɛ minu lɔ. Ala yi ai kɛ sabu le, ǹ tɔɔ yi to fɔla kudein, ǹe ni m̀ bema Ibulahima ni ǹ fa Isiyaka tɔɔ. Ala yi ai buu, k'ai bɔzɔnnu kɛ jama ba le duukolo kɔkan.»
[17] Jusufu k'a ye ngɛ ko a fa vɛ a bolokini la Efilaimu kunma, wo ma diya a yɛ. A do ka a fa bolo mina ka a bɔ Efilaimu kunma, ka a la Manase kunma.
[18] Jusufu k'a fɔ a fa yɛ, a vɛɛ: «Ǹ fa, i filiyine. Dɔ min ne kɔlɔmamɔɔ le. Wo ma, i bolokini la ale kunma.»
[19] Kɛɛ a fa do k'i ban, a vɛɛ: «Ǹ den, ǹ k'a lɔn. Ǹ k'a lɔn fefe. Ale fana kɛtɔ mɔɔba le le, min bɔzɔnnu walatɔ k'ai kɛ jama ba le. Wo bɛ n'a kɛ, a dɔɔni buɲatɔ ka timin ale la. A dɔɔni bɔzɔnnu kɛtɔ kɛla siboloma siyama le le.»
[20] A ka duwawu kɛ ai yɛ wo lon na, a vɛɛ: «Bani-Isilankalu vɛ kɛla duwawu kɛla i ɲɔɔ yɛ, ai kɛtɔ ài tɔɔ le fɔla, ai vɛɛ: ‹Ala yi i kɛ Efilaimu ni Manase ɲɔɔzii le.› » Janguba ka Efilaimu bila Manase ɲa ten ne.
[21] Wo kɛ, Janguba k'a fɔ Jusufu yɛ, a vɛɛ: «Ǹ'i saya bolo le ma, kɛɛ Ala totɔ ài fɛ k'ài laseikɔ ài bemanu ya duu lɔ.
[22] Ni i kɔlɔ vɛ ta ka timin i badenma tɔ bɛ la, wo ma, ǹ'i tini kɛlɛnkɛlɛn dɔ kɛla i ta kɛɛ le, ǹ na tɛɛminja minala Amolikalu la ǹa siyamifan ni ǹa biɲɛkala le.»