[1] Adama bɔzɔnnu ya taliku le min ne. Ala ka mɔɔnivinnu dan mingɛ, a k'ai dan k'ai kɛ ale gbu sawula le.
[2] A k'ai dan k'ai kɛ kɛ́ ni moso le. A do ka kuma ka balaka don ai lɔ, k'ai tɔɔla ko mɔɔnivinnu ai dan waate a bolo.
[3] Adama si danma senin san kɛmɛ ni san bisawa (130) lɔ, a ka a denkɛ dɔ sɔlɔn, min bɔnin tɛɛ a la ka kɛ ale gbu sawula le. A ka wo tɔɔla ko Sɛti.
[4] Sɛti sɔlɔn kɔ, Adama ka san kɛmɛ sein (800) kɛ. A do ka denkɛ ni denmoso gbɛlɛlu sɔlɔn.
[5] A si danmajiya ka kɛ san kɛmɛ kɔnɔ ni san bisawa (930) le. Wo dafanin, a ka sa.
[6] Sɛti si danma senin san kɛmɛ ni san loolu (105) lɔ, a ka denkɛ sɔlɔn ka wo tɔɔla ko Enosi.
[7] Enosi sɔlɔn kɔ, Sɛti ka san kɛmɛ sein ni san wolowulan (807) kɛ. A do ka denkɛ ni denmoso gbɛlɛlu sɔlɔn.
[8] Sɛti si danmajiya ka kɛ san kɛmɛ kɔnɔ san tan ni fila (912) le. Wo dafanin, a ka sa.
[9] Enosi si danma senin san bikɔnɔ (90) lɔ, a ka denkɛ sɔlɔn ka wo tɔɔla ko Kenan.
[10] Kenan sɔlɔn kɔ, Enosi ka san kɛmɛ sein san tan ni loolu (815) kɛ. A do ka denkɛ ni denmoso gbɛlɛlu sɔlɔn.
[11] Enosi si danmajiya ka kɛ san kɛmɛ kɔnɔ ni san loolu (905) le. Wo ka dafa, a ka sa.
[12] Kenan si danma senin san biwolowulan lɔ, a ka denkɛ sɔlɔn ka wo tɔɔla ko Mahalɛli.
[13] Mahalɛli sɔlɔn kɔ, Kenan ka san kɛmɛ sein ni san binaani (840) kɛ, ka denkɛ ni denmoso gbɛlɛlu sɔlɔn.
[14] Kenan si danmajiya ka kɛ san kɛmɛ kɔnɔ ni san tan (910) ne. Wo dafanin, a ka sa.
[15] Mahalɛli si danma senin san biwɔɔlɔ ni san loolu (65) lɔ, a ka denkɛ sɔlɔn ka wo tɔɔla ko Jɛlɛdi.
[16] Jɛlɛdi sɔlɔn kɔ, Mahalɛli ka san kɛmɛ sein ni san bisawa (830) kɛ. A do ka denkɛ ni denmoso gbɛlɛlu sɔlɔn.
[17] Mahalɛli si danmajiya ka kɛ san kɛmɛ sein san bikɔnɔ ni loolu (895) le. Wo dafanin, a ka sa.
[18] Jɛlɛdi si danma senin san kɛmɛ san biwɔɔlɔ ni fila (162) lɔ, a ka denkɛ sɔlɔn ka wo tɔɔla ko Enoki.
[19] Enoki sɔlɔn kɔ, Jɛlɛdi ka san kɛmɛ sein (800) kɛ. A do ka denkɛ ni denmoso gbɛlɛlu sɔlɔn.
[20] Jɛlɛdi si danmajiya ka kɛ san kɛmɛ kɔnɔ san biwɔɔlɔ ni fila (962) le. Wo dafanin, a ka sa.
[21] Enoki si danma senin san biwɔɔlɔ ni loolu (65) lɔ, a ka denkɛ sɔlɔn ka wo tɔɔla ko Metusela.
[22] Metusela sɔlɔn kɔ, Enoki ka san kɛmɛ sawa (300) kɛ Ala ya siya lataamana. A do ka denkɛ ni denmoso gbɛlɛlu sɔlɔn.
[23] Enoki si danmajiya ka kɛ san kɛmɛ sawa san biwɔɔlɔ ni loolu (365) le.
[24] Enoki ka to Ala ya siya lataamana, a do ka tunun, kamasɔlɔn Ala tɛɛ vɛ taa a le.
[25] Metusela si danma senin san kɛmɛ san bisein ni wolowulan (187) lɔ, a ka denkɛ sɔlɔn ka wo tɔɔla ko Lamɛki.
[26] Lamɛki sɔlɔn kɔ, Metusela ka san kɛmɛ wolowulan san bisein ni fila (782) kɛ. A do ka denkɛ ni denmoso gbɛlɛlu sɔlɔn.
[27] Metusela si danmajiya ka kɛ san kɛmɛ kɔnɔ san biwɔɔlɔ ni kɔnɔ (969) le. Wo dafanin, a ka sa.
[28] Lamɛki si danma senin san kɛmɛ san bisein ni fila (182) lɔ, a ka denkɛ sɔlɔn
[29] ka wo tɔɔla ko Nuho (wo kɔlɔ le ko «Josolajii»), kamasɔlɔn a k'a fɔ, a vɛɛ: «Denkɛ min ne kɛtɔ mɔ josolajiila maa baalelu ni maa sɛyɛlu lɔ ka bɛn duukolo ya ko ma, mɔ Tii Ala na duukolo min daanna.»
[30] Nuho sɔlɔn kɔ, Lamɛki ka san kɛmɛ loolu san bikɔnɔ ni loolu (595) kɛ. A do ka denkɛ ni denmoso gbɛlɛlu sɔlɔn.
[31] Lamɛki si danmajiya ka kɛ san kɛmɛ wolowulan san biwolowulan ni wolowulan (777) ne le. Wo dafanin, a ka sa.
[32] Nuho si danma senin san kɛmɛ loolu (500) lɔ, a ka Sɛmu ni Hamu ni Jafɛti sɔlɔn.