[1] Lasɛli k'a ye ngɛ ko ale ma den sɔlɔn Janguba yɛ, a ka a kɔlɔmoso makeleya damina. A do vɛɛ Janguba yɛ: «I yi den di ǹe fana ma, niwotɛ ǹ satɔle.»
[2] Wo fɔ Lasɛli bolo, Janguba ka mɔnɛ a ma, a vɛɛ a yɛ: «Ǹ'i ǹ jɛlɛ bila Ala nɔ lɔ, baa? Ala le ma i lalɔ ka bɔ densɔlɔn ma?»
[3] Lasɛli vɛɛ: «Ǹa jɔnmoso Biliha le ne. Ǹ'a fɛ i y'a masi, kosa a yi den sɔlɔn ǹ yɛ, ǹe fana yi kɛ dentii le ka bɛn ale ma.»
[4] Wo le k'a kɛ, Lasɛli ka aa jɔnmoso Biliha di Janguba ma fulu boloma, Janguba do k'i la wo fɛ.
[5] Biliha ka kɔnɔ ta ka denkɛ sɔlɔn Janguba yɛ.
[6] Lasɛli vɛɛ: «Ala vɛ ǹa kiti tɛɛ ka tuɲa di m̀ ma. A do vɛ ǹa madailikan mɛn ka denkɛ di m̀ ma.» Wo le k'a kɛ, Lasɛli ka den wo tɔɔla ko Dan (wo kɔlɔ le ko «Kiti vɛ tɛɛ»).
[7] Lasɛli ya jɔnmoso Biliha ka kɔnɔ ta kɔtunun ka a denkɛ filana sɔlɔn Janguba yɛ.
[8] Lasɛli vɛɛ: «Ǹe ni ǹ kɔlɔmoso vɛ bɔɔni buba kɛ, kɛɛ m̀ɛ see sɔlɔn.» Wo le k'a kɛ, a ka den wo tɔɔla ko Nafitali (wo kɔlɔ le ko «Bɔɔni»).
[9] Leya k'a ye ngɛ ko a la vɛ lɔ, ale fana ka aa jɔnmoso Zilipa ta, ka a di Janguba ma fulu boloma.
[10] Leya ya jɔnmoso Zilipa ka kɔnɔ ta ngɛ ka denkɛ sɔlɔn Janguba yɛ,
[11] Leya k'a fɔ, a vɛɛ: «Ǹ kunna vɛ diya!» Wo le k'a kɛ, a ka den wo tɔɔla ko Gadi (wo kɔlɔ le ko «Kunnadi»).
[12] Leya ya jɔnmoso Zilipa ka a denkɛ filana sɔlɔn ngɛ Janguba yɛ,
[13] Leya k'a fɔ, a vɛɛ: «Ǹ kɔnɔlɔ vɛ diya. Mosolu kɛtɔ a fɔla butu ko ǹ kɔnɔlɔdiyayine.» Wo le k'a kɛ, a ka den wo tɔɔla ko Asɛli (wo kɔlɔ le ko «Kɔnɔlɔdiya»).
[14] Alikama kali waate, Lubɛn ka taa binju dɔ ye sɛnɛ lɔ, min tɔɔ yi ko mandalaju. A ka mandalaju wo bɔ ka na a le a ba fɛ. Lasɛli do k'a fɔ Leya yɛ, a vɛɛ: «I jaani, i yi ǹ sɔ i den ya mandalaju dɔ sɔ.»
[15] Kɛɛ Leya k'a javi, a vɛɛ: «I vɛ ǹ kɛ́ bɔ m̀ bolo, wo m'i wasa. I y'a fɛ kɔtunun ka ǹ den ya mandalaju bɔ m̀ bolo, kɛlɛ?» Lasɛli vɛɛ: «Awa, Janguba sitɔ i fɛ bi su yi nɔ, wo yi kɛ i den ya mandalaju ɲɔɔ le.»
[16] Janguba nanin ka bɔ sɛnɛ lɔ wulala, Leya ka taa a labɛn k'a fɔ a yɛ, a vɛɛ: «I ka kan ka si ǹ fɛlɔ bi, kamasɔlɔn m̀ɛ Lasɛli ya bi su mafalin ǹ den ya mandalaju la.» Wo le k'a kɛ, Janguba ka si Leya fɛlɔ su wo lɔ.
[17] Ala ka Leya ya madailikan mɛn. A do ka kɔnɔ ta ka a denkɛ looluna sɔlɔn Janguba yɛ.
[18] Leya vɛɛ: «Ala vɛ ǹ sala ka bɛn ǹa jɔnmoso diko ma ǹ kɛ́ ma.» Wo le k'a kɛ, a ka denkɛ wo tɔɔla ko Isakali (wo kɔlɔ le ko «Salali»).
[19] Leya ka kɔnɔ ta kɔtunun ka a denkɛ wɔɔlɔna sɔlɔn Janguba yɛ,
[20] a vɛɛ: «Ala vɛ ǹ sɔ fen kulugbɛlɛn ne la. Ǹ kɛ́ kɛtɔ ǹ kulugbeleyala butu, kamasɔlɔn m̀ɛ denkɛ wɔɔlɔ sɔlɔn a yɛ.» Wo le k'a kɛ, Leya ka den wo tɔɔla ko Zebulun (wo kɔlɔ le ko «Kulugbeleya»).
[21] A laban nɔ, a ka denmoso sɔlɔn fana, ka wo tɔɔla ko Dina.
[22] Wo kɛ, Ala k'a hangili bila Lasɛli lɔ. A ka aa madailikan mɛn, ka a kɔnɔ daka densɔlɔnko lɔ.
[23] Lasɛli ka kɔnɔ ta ka denkɛ sɔlɔn, a vɛɛ: «Ala vɛ maloya bɔ ǹ na.
[24] Ǹ Tii Ala yi denkɛ gbɛlɛ kafon min kan.» Wo le k'a kɛ, a ka den wo tɔɔla ko Jusufu (wo kɔlɔ le ko «A a dɔ kafon a kan»).
[25] Lasɛli ka Jusufu sɔlɔn waate min nɔ, Janguba k'a fɔ a bainkɛ Laban yɛ, a vɛɛ: «I jaani, i yi siya di m̀ ma, ǹ'i seikɔ ǹ sɔlɔnduu lɔ.
[26] Ǹ na baale kɛla i yɛ m̀ mosolu ni ǹ den minu ya ko lɔ, i yi diɲa, i yi wolu di m̀ ma, m'i taa. Ile gbu k'a lɔn m̀ɛ baale min bɛ kɛ i yɛ.»
[27] Kɛɛ Laban k'a javi, a vɛɛ: «Ni ǹa ko diyanin ka kɛ i yɛ, i yi to jan. M̀ɛ a lɔn ka bɔ fɛlɛnnikɛba ya kuma lɔ k'a fɔ ko i Tii Ala ya nɛɛma yi ǹ kan ka bɛn ile le ma.
[28] Wo lɔ saa, i yi sala yi kɛ jate min ne, wo fɔ vɛ ǹ yɛ, ǹ'a di i ma.»
[29] Janguba k'a javi, a vɛɛ: «Ile gbu k'a lɔn ne m̀ɛ baale i yɛ teme, ani iya kolofennu jiliɲa ma ka bɛn ai kunnasiiɲa ma m̀ bolo.
[30] Kolofen dana le tɛɛ i bolo sɔ dein, ǹ tɛɛ ma na ba waate min nɔ, kɛɛ tandainɔ yi ne, ai vɛ jili bɛlɛbɛlɛ kɛ. Ǹ tɛɛ vɛ timinna tɛɛ o tɛɛ lɔ, ǹ Tii Ala tɛɛ nɛɛma le kɛla i yɛ woja bɛ lɔ. Kɛɛ ǹ kɛtɔ ko kɛla ǹ jɛlɛkanu ya demaya yɛ waate mindɛ lɔ?»
[31] Laban do k'a javi, a vɛɛ: «I y'a fɛ ǹ'i mindɛ le di i ma i sala le?» Janguba vɛɛ: «I kà fen gbɛlɛ di m̀ ma, kɛɛ ǹ'i ko kelen min fɔla i yɛ yi ne, i yi diɲa wo ma. Wo vɛ kɛla, ǹ totɔle iya saa ni balu kunnasiila k'ai kunmafɛlɛn.
[32] Diɲa, ǹ'i timin iya saa ni banilu tɛma bi. M̀ɛ saa fin minu yena ai lɔ, ani saa ni bani minu fali ɲakolinin, ani minu fali mabonbonnin, ǹ kɛtɔ wolu bilala jɛ, wolu yi kɛ ǹ sala le.
[33] Ǹa telenmandeya seleya ditɔ sinin, i vɛ nala lon min na ka bɛn ǹ salako ɲabɔko ma. I vɛ bani suu suu yena m̀ bolo, min fali ɲakolinin tɛ, niwotɛ a fali mabonbonnin tɛ, ni i do ka saa dɔ ye min finnin tɛ, wo vɛ kɛla, i y'a lɔn k'a fɔ ko wo suɲayine i ma.»
[34] Laban vɛɛ: «Wo yi bɛnne. A yi kɛ iwo i n'a fɔla teme.»
[35] Wo lon kelen na, bakɔlɔnni minu fali maɲɛɛɲɛɛnin ani minu fali mabonbonnin, ani bamoso minu fali mabonbonnin, gbɛ tɛɛ a suu suu lɔ, ani saa finnu, Laban ka wolu bila jɛ k'ai kalifa a denkɛlu la.
[36] Wo kɛ, Laban nu ka tele sawa taama kɛ ai le, min y'a kɛ, ai ma yi jaanya Janguba la. Janguba do ka to je Laban ya saa ni bani tɔlu kunmafɛlɛnna.
[37] Wo kɛ, Janguba ka kɔlɔma bolo kɛnɛ dɔlu tɛɛ kɔlɔmaju suu sawa la, ai y'a fɔla minu ma ko pepiliye, amande, ani pilani. A ka kɔlɔma wolu fala dɔ bɔ a ma, kosa a ma yi ɲɛɛɲɛɛ k'a fan dɔlu gbɛ.
[38] Janguba tɛɛ vɛ kɛla kɔlɔma bololu maɲɛɛɲɛɛla kotan, a tɛɛ wolu bilala jikɛfen ne lu kɔnɔ kɔlɔn dala, min y'a kɛ, ai yi kɛ saa ni banilu ɲakɔlɔ aiya ji min waate lɔ. Kamasɔlɔn ai deinin tɛɛ jɛlɛla i ɲɔɔ kan ji minya wo le lɔ je.
[39] Ai tɛɛ vɛ kɛla jɛlɛla i ɲɔɔ kan kɔlɔma wolu ɲa, ai tɛɛ den minu sɔlɔnna wo kɔ, wolu maɲɛɛnin ne tɛɛ kɛla butu, niwotɛ k'ai fali ɲakoli, niwotɛ k'ai fali mabonbon.
[40] Ani fanani, Janguba tɛɛ aa saamosolu bila yi la jɛ, k'ai bila Laban ya kolofennu ɲakɔlɔ minu maɲɛɛɲɛɛnin ani minu finnin. A do tɛɛ a jɛlɛkanu ya saa ni bani kululu bilala ai ta fan ne. A tɛɛ tɛ diɲala a ta kolofennu ni Laban talu yi ɲaami.
[41] Kolofen kɔɔninnu tɛɛ vɛ kɛla jɛlɛla i ɲɔɔ kan kotan, Janguba tɛɛ kɔlɔma maɲɛɛɲɛɛnilu bilala ai ɲakɔlɔ jikɛfennu kɔnɔ, min y'a kɛ, ai yi jɛlɛ i ɲɔɔ kan kɔlɔma wolu dafɛ.
[42] Kɛɛ Janguba tɛɛ tɛ kɔlɔma wolu bilala kolofen balanilu ɲakɔlɔ je. Wo le k'a kɛ, kolofen balanilu ka kɛ Laban ta le, kolofen kɔɔninnu do ka kɛ Janguba ta le.
[43] Wo le k'a kɛ, Janguba ka banaya bɛlɛbɛlɛ kɛ, saa ni bani kulu babalu vɛ a bolo, ani jɔn kɛman ni a mosoman, ani ɲɔɔmɛ ni sofalinilu.