[1] Ibulama si danma senin san bikɔnɔ ni kɔnɔ (99) lɔ, mɔ Tii Ala ka bɔ gbɛ la k'a fɔ a yɛ, a vɛɛ: «Ǹe le Ala Taala le. I yi ǹa siya lataama ka kɛ mɔɔ dafanin ne.
[2] Wo le kɛtɔ a kɛla, ǹ kɛtɔ ǹa salatikan lasawatila ǹe ni ile wotɛ, k'i bɔzɔnnu siyaya bɛlɛbɛlɛ kɛ.»
[3] Wo mɛn Ibulama bolo, a k'a ten bilin duu ma telemanin. Ala do vɛɛ a yɛ:
[4] «Ǹe koni, ǹ'i salatikan min ne tala i yɛ k'a fɔ ko i kɛtɔ siboloma siyama fa le.
[5] I tɔɔ tɛnala kɛla butu Ibulama (wo kɔlɔ le ko «Fa kɔlɔtanin), fɔ Ibulahima (wo kɔlɔ le ko «Jamakulu siyama sɔlɔnfa»), kamasɔlɔn m̀'i kɛ siboloma siyama fa le.
[6] Ǹ kɛtɔ i jilila bɛlɛbɛlɛ kɛ, ka siboloma dɔlu bɔ i lɔ, ani masalu.
[7] Ǹ kɛtɔ ǹa salatikan lasawatila ile ni i bɔzɔnnu yɛ, minu natɔ i kɔ, ka salatikan wo kɛ kudein ko le, min y'a kɛ, ile ni i bɔzɔnnu yi ǹ lɔn ài Tii Ala le.
[8] Ani fana, i siinin Kanaan duu min nɔ lonaya boloma, ǹ kɛtɔ wo bɛ le dila ile ni i bɔzɔn natɔlu ma, k'a kɛ ai ta nii le kudein. Ai do kɛtɔ ǹ lɔnna ai Tii Ala le.»
[9] Ala k'a fɔ Ibulahima yɛ kɔtunun, a vɛɛ: «Ile koni, i ka kan ka ǹa salatikan siya lataama, ile ni i bɔzɔn minu natɔ i kɔ.
[10] Ài ka kan ka namu min kɛ ǹa salatikan lataamanko lɔ, wo le ne. Àiya kɛ́ kelenkelenna bɛ makɛnɛ yi kɛ.
[11] Ài vɛ ài makɛnɛkɛla, wo le kɛtɔ tɔɔmase le ka bɛn salatikan ma min yi ǹe ni àilu wotɛ.
[12] Ka damina bi ma haan ka taa, ài denkɛlu bɛ makɛnɛ yi kɛ ai sɔlɔn tele sein ma. Hali jɔn minu vɛ sɔlɔnna àiya malali kɔnɔ, niwotɛ ài vɛ jɔn minu sanna lonalu ma, minu tɛ ài bɔzɔn ne,
[13] wolu bɛ makɛnɛ yi kɛ, àiya malalimɔɔlu tanin ka la àiya jɔn sanninu kan. Wo vɛ kɛla, ǹa salatikan tɔɔmase kɛtɔ ài fali ma, k'a jiya ko salatikan wo yi kudein ko le le.
[14] Ni kɛ́ min makɛnɛ ma kɛ ka wo nɔ to a fali ma, ài yi wo tii gbɛn ka bɔ ǹa mɔɔlu tɛma, kamasɔlɔn a vɛ ǹa salatikan siya bila.»
[15] Ala k'a fɔ Ibulahima yɛ, a vɛɛ: «I moso Salayi koni, i kà a fɔ a ma butu ko Salayi, fɔ Salan (wo kɔlɔ le ko «Kuntii mosomanda»).
[16] Ǹ kɛtɔ balaka donna a lɔ, a do kɛtɔ denkɛ sɔlɔnna i yɛ. Ǹ kɛtɔ balaka donna a lɔ, ka siboloma dɔlu bɔ a lɔ, ani masalu.»
[17] Wo mɛn Ibulahima bolo, a k'a ten bilin duu ma telemanin, a vɛ jɛlɛla. A do vɛɛ a jɛlɛ yɛ: «Kɛ́ min si danma vɛ san kɛmɛ (100) bɔ, wo yi sene den sɔlɔnna? Salan min si danma vɛ san bikɔnɔ (90) bɔ, wo yi sene den sɔlɔnna?»
[18] Ibulahima ka Ala dali, a vɛɛ: «I jon, i yi sikunnɔjaan di Sumayila ma.»
[19] Kɛɛ Ala do k'a javi, a vɛɛ: «Iin, kɛɛ i moso Salan le kɛtɔ denkɛ sɔlɔnna i yɛ. I y'a tɔɔla ko Isiyaka. Ǹ kɛtɔ ǹa salatikan lasawatila Isiyaka ni a bɔzɔnnu le yɛ, ka salatikan wo kɛ kudein ko le.
[20] M̀ɛ iya dailikan mɛn ka bɛn Sumayila ma. Ǹ kɛtɔ balaka donna a lɔ jɔ, ka a jili bɛlɛbɛlɛ kɛ. A kɛtɔ ɲamɔɔ mɔɔ tan ni fila (12) sɔlɔnna. Siboloma fangama dɔ bɔtɔ a lɔ.
[21] Kɛɛ ǹ kɛtɔ ǹa salatikan lasawatila Isiyaka le yɛ, Salan kɛtɔ min sɔlɔnna i yɛ min ɲɔɔzii saa lɔ numaija.»
[22] Ala wɔlinin kumala Ibulahima yɛ, a ka bɔ Ibulahima fɛ ka jɛlɛ sannɔ.
[23] Wo lon kelen na, Ibulahima ka Sumayila makɛnɛkɛ, ani aa malalimɔɔ kɛman bɛ, hali aa jɔn sanninu, ani minu sɔlɔnnin aa malali kɔnɔ, iwo Ala n'a fɔla a yɛ teme.
[24] Ibulahima makɛnɛkɛ na bɛnna a sɔlɔn san bikɔnɔ ni kɔnɔ (99) le ma.
[25] Wo do na bɛnna a denkɛ Sumayila sɔlɔn san tan ni sawa (13) le ma.
[26] Wo lon kelen na, Ibulahima ni a denkɛ Sumayila mɔɔ fila makɛnɛ ka kɛ,
[27] ani aa malalimɔɔ kɛman bɛ. Jɔn minu sɔlɔnnin aa bon na ani minu sannin a bolo lonalu ma, wolu bɛ makɛnɛ ka kɛ a fɛ.