[1] Janguba lɔnko ka bila Laban denkɛlu ya kuma lɔ, min fɔnin ka bɛn a ma, k'a fɔ ko: «Janguba vɛ mɔ fa sɔlɔnfen bɛ bɔ a bolo. A v'a jɛlɛ labanaya mɔ fa sɔlɔnfennu le.»
[2] Ani fanani, Janguba k'a ye ko Laban tɛɛ tɛ a ɲakɔlɔ diyala a la butu, iwo a deinin tɛɛ a kɛla teme sɔ.
[3] Wo yi kɛla waate min nɔ, mɔ Tii Ala k'a fɔ Janguba yɛ, a vɛɛ: «I i kɔsei i fɛso, i kabiladennu yi tɛɛminja. Ǹ kɛtɔ i fɛ.»
[4] Wo kɛ, Janguba ka sama bila Lasɛli ni Leya ma ko ai yi na a fɛlɔ gbɛkɛnɛ lɔ, aa saa ni banilu tɛɛ tɛɛminja.
[5] Janguba do vɛɛ ai yɛ: «M̀ɛ a ye ko ài fa tɛ a ɲakɔlɔ diyala ǹ na butu, iwo a deinin tɛɛ a kɛla teme sɔ. Kɛɛ ǹ fa Tii Ala v'i lɔ ǹ fɛ.
[6] Àilu gbu k'a lɔn ne ko m̀ɛ baale ài fa yɛ teme ǹ fanga bɛ la.
[7] Wo bɛ n'a kɛ, ài fa ka to ǹ janvala, a vɛ ǹ sala mafalinna k'a majii fɔɔ siɲa tan. Kɛɛ Ala ma diɲa k'a fɔ a yi kojuu kɛ ǹ na.
[8] Ni ài fa tɛɛ v'a fɔla ko kolofen fali mabonbonnin yi kɛ ǹ sala le, wo tɛɛ vɛ kɛla, kolofennu tɛɛ den mabonbonnin ne lu sɔlɔnna. Ni a do tɛɛ v'a fɔla ko kolofen fali ɲakolinin yi kɛ ǹ sala le, wo tɛɛ vɛ kɛla, kolofennu bɛ tɛɛ den fali ɲakolinin ne lu sɔlɔnna.
[9] Ala na ài fa ya kolofennu bɔla a bolo ten ne k'ai di m̀ ma.
[10] «Kolofennu tɛɛ jɛlɛla i ɲɔɔ kɔkan waate min nɔ, ǹ ka siwo k'a ye ko bakɔlɔnni minu yi jɛlɛla bamosolu kɔkan, wolu bɛ fali ɲakolinin, niwotɛ k'ai mabonbon, niwotɛ k'ai maɲɛɛɲɛɛ.
[11] Ǹa siwo lɔ, Ala ya mɛlɛka ka ǹ kili, a vɛɛ: ‹Janguba!› Ǹ ko: ‹Naam!›
[12] A vɛɛ: ‹I kun lawuli, i ɲa lɔ bakɔlɔnnilu lɔ, minu yi jɛlɛla bamosolu kɔkan. Ai bɛ fali ɲakolinin, niwotɛ k'ai mabonbon, niwotɛ k'ai maɲɛɛɲɛɛ. A yi ten ne kamasɔlɔn Laban yi ko minu kɛla i la, ǹ ɲa yi wo bɛ la.›
[13] A vɛɛ: ‹Ǹe le Ala le, ǹe min na bɔla gbɛ la i yɛ Bɛtɛli, i na tulu bɔnna kawalefa kɔkan tɛɛminja ka dakan ta ǹ yɛ. I wuli telemanin, i yi bɔ duu min nɔ, i yi seikɔ i sɔlɔnduu la.› »
[14] Lasɛli ni Leya k'a javi, ai vɛɛ: «Hali bi mɔ ta nii vɛ mɔ fa kɛɛ lɔ bene?
[15] A tɛ mɔ jatela iwo lonalu? A vɛ mɔ fele ka mɔ fuluwɔli bɛ dɔn k'a ban.
[16] Ala na nafolo min minala mɔ fa la ka a di i ma, mɔ ta le wo bɛ le, ǹu ni mɔ dennu. Wo lɔ saa, a kɛ iwo Ala n'a fɔla i yɛ teme.»
[17] Wo fɔ, Janguba k'i wuli, ka a mosolu ni a dennu lajɛlɛ ɲɔɔmɛlu kɔkan, ai vɛ taala.
[18] A ka taa aa kolofen ni a sɔlɔnfen bɛ le, a na minu sɔlɔnna Suliya jamana sanfɛ fannɔ, a vɛ taala a fa Isiyaka fɛlɔ, Kanaan duu lɔ.
[19] Ai taatɔla, Lasɛli ka a fa ya mɔɔkɔlɔmanilu suɲa a kɔ, k'a talan Laban tɛɛ vɛ taa aa saalu sitɛɛya lɔ.
[20] Janguba ka Alamuka kɛ́ Laban to divi lɔ ten ne. A tɛɛ ma fɔ a yɛ k'a fɔ ko a taatɔle, a k'i doon ne a ma ka taa.
[21] A ka bɔli a sɔlɔnfen bɛ le. A do ka Efilati kɔɔ tɛɛ, ka taa Galadi tinima duu fannɔ siya le.
[22] Janguba taa tele sawana lon, ai k'a fɔ Laban yɛ ko Janguba vɛ bɔli.
[23] Wo kɛ, Laban ni a badenmalu ka Janguba kɔsalan damina. Ai ka tele wolowulan kɛ a kɔsalanna, ka se ai ma Galadi tinima duu lɔ.
[24] Kɛɛ su lɔ, Ala ka bɔ gbɛ la Alamuka kɛ́ Laban yɛ siwo lɔ k'a fɔ a yɛ, a vɛɛ: «Laban, i y'a kɛ kobɛn. I kà a yonma fɔ k'a bila Janguba ma.»
[25] Laban se Janguba fɛlɔ, wo k'a talan Janguba tɛɛ vɛ aa faanigbaalu lɔ tini dɔ kɔkan Galadi tinima duu lɔ. Laban ni a badenmalu ka aiya faanigbaalu lɔ woja fana.
[26] Laban k'a fɔ Janguba yɛ, a vɛɛ: «I na ko suu mindɛ kɛla ǹ na yi ne? I na ǹ tola divi lɔ, ka taa ǹ denmosolu le iwo jɔnnu yi minala teme kɛlɛ lɔ.
[27] A kɛnin di vɛ, i n'i doonna m̀ ma ka bɔli, ka ǹ to divi lɔ, i do m'i sala ǹ na? Niwotɛ ǹ tɛɛ i lɔsiyale sawa boloma, mɔ vɛ dɔɔni lala, ai vɛ giidɛ ni kɔnilu fɔla.
[28] I fɔlɔ ma diɲa gbu k'a fɔ ko ǹ'i ǹ denmosolu ni m̀ mamanilu sumu, k'ai lasalana. I na kuntanyako le kɛla wo le dɛ!
[29] A see yi ǹ yɛ ka koyon k'i la. Kɛɛ su timinnin, i fa Tii Ala na kumala ǹ fɛ siwo lɔ, a vɛɛ: ‹Laban, i y'a kɛ kobɛn. I kà a yonma fɔ k'a bila Janguba ma.›
[30] M̀ɛ a lɔn k'a fɔ ko i fa ya luu lɔɔ le tɛɛ gbala i la bubale, wo le n'i taala. Kɛɛ i na ǹa joolu suɲala mindɛ lɔ?»
[31] Janguba ka Laban javi, a vɛɛ: «Ǹ tɛɛ siyanna, kamasɔlɔn a tɛɛ ǹ kɔnɔ ko i kɛtɔ i denmosolu bɔ yi la m̀ bolo fanga la.
[32] Kɛɛ i v'iya joolu yena mɔɔ mɔɔ si bolo, wo tii tɛnala tola a nii la. I bolo telen i bolofen suu suu la, i vɛ min yena ǹ fɛlɔ jan, mɔ badenmalu yi kɛ wo sele le.» Wo k'a talan, Janguba lɔnko tɛɛ tɛ joolu suɲako ma Lasɛli bolo.
[33] Wo fɔ, Laban ka taa a ɲa kaan Janguba ya faanigbaa kɔlɔ, ani Leya ya faanigbaa kɔlɔ, ani jɔnmoso fila ya faanigbaalu kɔlɔ, kɛɛ a ma aa joolu ye. A do ka bɔ Leya ya faanigbaa kɔlɔ ka don Lasɛli ya faanigbaa kɔlɔ.
[34] Wo k'a talan, Lasɛli tɛɛ vɛ mɔɔkɔlɔmani wolu ta k'ai doon ɲɔɔmɛ kɔkan wɔmɔ kɔlɔ, a v'i siila ai kan. Laban k'i filinfilin faanigbaa fan bɛ kɔlɔ, kɛɛ a ma ai ye.
[35] Lasɛli k'a fɔ a yɛ, a vɛɛ: «Ǹ fa, i k'i josolakuna, kɛɛ ǹ tɛ se m̀ wulila i ɲakɔlɔ, kamasɔlɔn ǹ'i ǹa laana le lɔ yi ne.» A ka kɛ ten ne, Laban ka aa mɔɔkɔlɔmanilu ɲinin fan bɛ lɔ, a ma ai ye.
[36] Wo kɛnin, Janguba k'a josolakuna ka Laban dalasɔsɔ damina. A vɛɛ a yɛ: «Ǹ na kolɔtiɲa mindɛ kɛla? Ǹ na koyon mindɛ gbu kɛla i la vɛ, i na ǹ kɔsalanna bɔli le?
[37] I v'i filinfilin ǹa mulannu bɛ wotɛ. Wo bɛ kɔ, i n'i bolofen mindɛ yena jan? Wo labɔ vɛ jan m̀ badenmalu ni i badenmalu ɲakɔlɔ, ai yi wo kiti tɛɛ ǹe ni ile wotɛ!
[38] Ǹ na san muan (20) min kɛla i fɛ, wo waate bɛ kɔlɔ, kɔnɔtiɲa ma sii iya saa ni iya bani dɔ la. Ǹe do m'iya saajii dɔ mina tuun k'a dɔn.
[39] Ni soo fali tɛɛ v'iya kolofen dɔ lɔfalafala kotan, ǹ tɛɛ tɛ nala a le i fɛ. Ǹe gbugbu tɛɛ ǹ lɔ yi la wo kunko la. Kolofen suu suu tɛɛ vɛ tununna, i tɛɛ wo ɲɔɔ bɔ yi la ǹ kun, hali a suɲanin tɛɛ kɛ tele lɔ, niwotɛ su lɔ.
[40] Ǹa ko tɛɛ ten ne. Fundeli tɛɛ siila m̀ ma tele lɔ, ani nɛnɛ tɛɛ m̀ minala su lɔ. Ǹ tɛɛ sila piin, ǹ tɛɛ tɛ sunɔɔla.
[41] Ǹ na sanji muan (20) ne kɛla i fɛ. Ǹ na baalela i yɛ sanji tan ni naani (14) kɔlɔ ka bɛn i denmoso fila fuluko ma, ani ka sanji wɔɔlɔ kɛ ka bɛn saa ni banilu sanko ma i ma. I do ka to ǹ sala mafalinna fɔɔ siɲa tan.
[42] Ni ǹ fa Tii Ala tɛɛ ma kɛ ǹ fɛ, m̀ bema Ibulahima tɛɛ min batola, ǹ fa Isiyaka ya Masa Masiyannin koni, ni wo tɛɛ ma kɛ, i tɛɛ m̀ bololakolongbɛ le bilala. Kɛɛ Ala na ǹa tɔlɔya ni ǹ sɛyɛnɔ yena, a do na i jobaliyala su timinnin min nɔ.»
[43] Laban ka Janguba javi, a vɛɛ: «Moso minu yi ǹ denmosolu lu le. Denni minu yi m̀ mamanilu lu le. Saa ni bani minu yi ǹ ta le le. I ɲa yi fen fen na yi ne, ǹ ta le wo bɛ le. Kɛɛ wo bɛ n'a kɛ, ǹ'i se mindɛ kɛla butu ka bɛn ǹ denmoso minu ya ko ma, ani ai na den minu sɔlɔnna?
[44] Wo lɔ saa, ài m'i salatikan ta, wo yi kɛ sele le ǹe ni ile wotɛ.»
[45] Wo kɛ, Janguba ka kawa dɔ lalɔ k'a kɛ hangilitonɔkawa le.
[46] A k'a fɔ a badenmalu yɛ, a vɛɛ: «Ài yi taa kawakulunnu bii.» Ai do ka na kawakulunnu le ka a ton lɔ. Wo kɛ, ai bɛ ka dɔnni kɛ kawaton wo dafɛ.
[47] Laban ka kawaton wo tɔɔla ko Jagali-Sahaduta (wo kɔlɔ le ko «Seleya Ton» Alamekan nɔ). Janguba ka a tɔɔla ko Galɛdi (wo kɔlɔ yi kelen ne le Hebulukan nɔ).
[48] Laban vɛɛ: «Kawaton min yi seleya le le ǹe ni ile wotɛ bi.» Wo le k'a kɛ, a ka woja tɔɔla ko Galɛdi.
[49] Janguba ka ton kelen wo tɔɔla fana ko Mizipa (wo kɔlɔ le ko «Lakɔlɔsi Dingila»), kamasɔlɔn Laban k'a fɔ Janguba yɛ, a vɛɛ: «Mɔ Tii Ala yi ǹu mɔɔ fila lakɔlɔsi, mɔ ɲa t'i ɲɔɔ nɔ waate min nɔ.
[50] Ni i ka ko gbɛlɛn sii ǹ denmosolu la, ni i do ka moso gbɛlɛlu ta ka bɔ ǹ denmosolu kɔ, hali ni mɔɔ ɲa tɛ mɔ la, i y'a lɔn k'a fɔ ko Ala jɛlɛkanu yi sele le le ǹe ni ile wotɛ.»
[51] Laban vɛɛ Janguba yɛ kɔtunun: «I yi kawaton ni kawa lalɔnin ye, ǹ na minu lɔla ka bɛn ǹu mɔɔ fila wotɛko ma.
[52] Kawaton ni kawa lalɔnin, a fila bɛ yi sele le le, k'a fɔ ko ǹe tɛnala timinna wolu la ka koyon k'i la, ile fana tɛnala timinna wolu la ka koyon kɛ ǹ na.
[53] Ala yi kiti tɛɛ ǹu mɔɔ fila wotɛ, i bema Ibulahima tɛɛ Ala min batola, ani ǹe ta bema Naholi tɛɛ Ala kelen min batola.» Wo fɔ, Janguba k'a kalin a fa Isiyaka ya Masa Masiyannin na.
[54] Janguba ka to tini kuntɛma je, ka salaka bɔ. A do ka a badenmalu kili ko ai yi na dɔnni kɛ. Ai ka dɔnni kɛ ka si tini kuntɛma je.
[55] Wo dusagbɛlon sɔɔmadanina, Laban k'i wuli ka a denmosolu ni a mamanilu sumu, ka duwawu kɛ ai yɛ. Wo kɛ a bolo, a k'i wuli ka taa aa luu ma.