[1] Sa le jateeyanin tɛɛ ka timin tuukɔlɔsoolu bɛ la, mɔ Tii Ala na minu danna. Lon dɔ, sa k'a fɔ moso yɛ, a vɛɛ: «Tuɲa le wo le, Ala vɛɛ ko ài kà kɔlɔmaden suu suu dɔn gbele min nɔ?»
[2] Moso k'a javi, a vɛɛ: «M'i sene kɔlɔmadennu dɔnna gbele min nɔ,
[3] kɛɛ kɔlɔma min yi gbele tɛma, Ala vɛɛ ko mɔ kà tuu kɔlɔma wo la, kumatɛ ka a den dɔn. Mɔ vɛ wo kɛla, mɔ satɔle dɛ!»
[4] Sa do vɛɛ moso yɛ: «Ài tɛnala sala dɛ!
[5] Ala k'a lɔn ko ài vɛ kɔlɔmaden wo dɔnna lon min na, ài ɲa makatɔle. Ài kɛtɔ kokein ni koyon wotɛbɔ lɔnna iwo Ala.»
[6] Wo fɔ sa bolo, moso k'a ye ko kɔlɔma wo den yi dɔnnifen ɲuma le le, ani a ɲalaye keinyanin, ani a yi mɔɔ kɛla hangilima le le. Wo le k'a kɛ, moso ka kɔlɔmaden wo dɔ bɔ k'a dɔn, k'a dɔ di a kɛ́ ma, min tɛɛ a dafɛ je. Wo fana k'a dɔ dɔn.
[7] Wo kɛ, ai mɔɔ fila ɲama ka ka. Ai k'a lɔn butu k'a fɔ ko ai falimakolon ne. Ai do ka tolo bululu kala i ɲɔɔ na, k'ai fali masutala wo le.
[8] Wo lon wuladafɛ, fɔɲɛ bɔ waate lɔ, kɛ́ ni a moso ka mɔ Tii Ala nakan mɛn, a vɛ a mataamana gbele lɔ. Wo mɛn ai bolo, ai ka taa ai doon kɔlɔmajulu wotɛ, min y'a kɛ, ai yi bɔ Ala ɲakɔlɔ.
[9] Wo kɛ, mɔ Tii Ala ka kɛ́ kili, a vɛɛ: «I yi min?»
[10] Kɛ́ k'a javi, a vɛɛ: «Ǹ na i nakan mɛn mingɛla gbele lɔ, ǹ tɛɛ siyanna kamasɔlɔn ǹ falimakolon ne tɛɛ. Wo le n'a kɛla, ǹ na ǹ doonna.»
[11] Mɔ Tii Ala do vɛɛ a yɛ: «Jene n'a fɔla i yɛ ko i falimakolon ne? Ǹ na tɔn siila kɔlɔma min na, i na wo den dɔ le dɔnna?»
[12] Kɛ́ vɛɛ: «I na moso min dila m̀ ma, wo le na kɔlɔmaden wo dila m̀ ma, ǹ n'a dɔnna.»
[13] Mɔ Tii Ala vɛɛ moso yɛ: «I na ko suu mindɛ kɛla yi ne?» Moso k'a javi, a vɛɛ: «Sa le na m̀ manɛɛnna, wo le n'a kɛla, ǹ n'a dɔnna.»
[14] Wo kɛ, mɔ Tii Ala vɛɛ sa yɛ: «Ka bɛn i kɛko min ma, m̀'i daan kolofen ni tuukɔlɔsoo tɔ bɛ tɛma. I fɔnfɔntɔ i kɔnɔ le la butu, i vɛ gbangban dɔnna iya dunuɲalɔtɛɛ tɔ bɛ lɔ.
[15] Ǹ kɛtɔ juuya bilala ile ni moso wotɛ, ka juuya bila i bɔzɔn ni a bɔzɔn fana wotɛ. Moso bɔzɔn kɛtɔ i kun madiminna, ile fana kɛtɔ a sendina madiminna.»
[16] Mɔ Tii Ala k'a fɔ moso yɛ, a vɛɛ: «Ǹ kɛtɔ iya tinkɔnɔdimin lɔgbeleyala bubale, i sɛyɛtɔle iya denmoi waate lɔ. A lɔɔ kɛtɔ i la i kɛ́ yi kɛ i fanga kɔlɔ, kɛɛ i kɛ́ le siitɔ i kunna.»
[17] Mɔ Tii Ala do vɛɛ Adama yɛ: «I v'i moso kumakan labato ka kɔlɔmaden dɔn, ǹ na tɔn siila kɔlɔma min na. Wo le n'a kɛla, ǹ na duu daanna ka bɛn iya ko ma. I sɛyɛtɔle pɛ, i na to duu tɔnɔ dɔnna iya dunuɲalɔtɛɛ bɛ lɔ.
[18] Wonin ni bin kɛwonnu fɛlɛntɔ i yɛ duu kɔkan, kɛɛ i kɛtɔ balola tuukɔlɔbin fɛlɛn ne lu la butu.
[19] I balo bɔtɔ i talatɛɛnɔ le lɔ, ka sii i kɔsei la duu lɔ, i bɔnin duu min nɔ. Bamu le i le, i do kɔseitɔ bamu wo le lɔ.»
[20] Adama ka a moso tɔɔla ko Hawa (wo kɔlɔ le ko «Niimani»), kamasɔlɔn ale kɛnin mɔɔnivin bɛ ba le.
[21] Mɔ Tii Ala ka kolofen gbolo dɔlu ladan faani le, ka wolu kɛ Adama ni a moso feeyabɔ le.
[22] Mɔ Tii Ala do vɛɛ: «Tandainɔ, mɔɔnivinnu vɛ kɛ iwo mɔ dɔ, ai vɛ kokein ni koyon wotɛbɔ lɔn. Wo ma yi ne, ài m'i ai dansii, min y'a kɛ, ai kana ai bolo lɔsama ka niimaya kɔlɔmaden dɔ bɔ k'a dɔn, ai kana taa to ai nii lɔ kudein.»
[23] Wo le k'a kɛ, mɔ Tii Ala ka Adama labɔ Edɛn gbele lɔ, ko a yi duu labaale, a bamu tanin ka bɔ duu kelen min nɔ.
[24] Mɔ Tii Ala ka Adama gbɛn ten ne. A ka selubɛn mɛlɛkalu lalɔ Edɛn gbele donda la telebɔ fannɔ, ka siyamifan taalamaa bila je, min tɛɛ mininmininna waate bɛ, k'i jando niimaya kɔlɔma siya lɔ.