[1] Wo waate lɔ, Amulafɛli tɛɛ Sinali duu masaya la, Aliyoki tɛɛ Elasali duu masaya la, Kedololamɛli tɛɛ Elamu duu masaya la, ani Tidali tɛɛ Goyime duu masaya la.
[2] Masakɛ naani wolu k'ai ladɛn ka kɛlɛ ben Sɔdɔmu so masa Bela kan, ani Gɔmɔli so masa Bilisa, ani Adima so masa Sinabu, ani Zeboyimu so masa Sɛmɛbɛli, ani Bela so masa (ai y'a fɔla so min ma fana ko Zowali).
[3] Masakɛ Kedololamɛli tɛɛ vɛ a fanga la dɔ masakɛ loolu kɔkan sanji tan ni fila (12) kɔlɔ, kɛɛ a sanji tan ni sawana (13), ai ka mulutu a ma, ka aiya kɛlɛkɛjamalu ladɛn Sidimu fofa kɔnɔ, Dalaba Kɔɔjilamaa yi tɛɛminja bi.
[5] A san tan ni naanina (14), Kedololamɛli ni a masa ɲɔɔlu ka jii aiya kɛlɛkɛjamalu le, ai ka see sɔlɔn Lefakalu ma Asitolɛti-Kalinayimu so la, ani ka see sɔlɔn Zuzikalu ma Hamu so la, ani ka see sɔlɔn Emikalu ma Kiliyatimu gbɛkɛnɛ duu lɔ.
[6] Ai ka bɔ je ka see sɔlɔn Holikalu ma aiya tinima dingila lɔ, Seyili duu lɔ, ka to ai gbɛnna haan fɔɔ Eli-Palan, fuwa ba magbɛn nɔ.
[7] Wo kɔ, Kedololamɛli ni a masa ɲɔɔlu k'i kɔsei ka na Ɛni-Misipati so la, ai y'a fɔla min ma ko Kadɛsi. Ai do ka Amalekikalu ya duu bɛ mina, ka ban ka see sɔlɔn Amolikalu ma, minu siinin tɛɛ Hazazon-Tamali so la.
[8] Wo kɛ, Sɔdɔmu so masa, Gɔmɔli so masa, Adima so masa, Zeboyimu so masa, ani Bela so masa (ai y'a fɔla so min ma ko Zowali), masakɛ loolu wolu bɛ ka bɔ aiya kɛlɛkɛjamalu le k'ai lɔyalu mina Sidimu fofa kɔnɔ, min y'a kɛ, ai yi masakɛ naani minu kɛlɛ: Elamu masakɛ Kedololamɛli, Goyime masakɛ Tidali, Sinali masakɛ Amulafɛli, ani Elasali masakɛ Aliyoki,
[10] Wo waate lɔ, diɲa siyama tɛɛ Sidimu fofa kɔnɔ, minu lafanin tɛɛ mana fin na. Sɔdɔmu ni Gɔmɔli so masalu ni aiya kɛlɛkɛdennu ka to bɔlila ai juulu ma, ai dɔlu k'i ben diɲa wolu lɔ. A tɔlu ka to bɔlila haan fɔɔ tinima duu lɔ.
[11] Wo kɛ, ai juulu ka taa waan ben Sɔdɔmu ni Gɔmɔli solu kan, ka ban ka taa ai sɔlɔnfennu ni aiya dɔnnifennu bɛ le.
[12] Luti, min tɛɛ Ibulama kɔlɔkɛ denkɛ le, wo tɛɛ siinin Sɔdɔmu so kɔnɔ wo waate lɔ. Wo le k'a kɛ, ai ka Luti fana mina, ka taa ale ni a sɔlɔnfennu bɛ le.
[13] Mɔɔ dɔ ka bɔ kɛlɛ kɔlɔ ka taa ko wo ɲafɔ Hebuluka kɛ́ Ibulama yɛ. Wo waate, Ibulama siinin tɛɛ Amolika kɛ́ Mamele ya kɔlɔmajulu dafɛ. Mamele ni a badenma Esikoli ni Anɛli ani Ibulama tɛɛ vɛ salatikan ta i ɲɔɔ yɛ ka bɛn i ɲɔɔ madɛmɛnko ma.
[14] Ibulama ka a kɔlɔkɛ den minako mɛn mingɛ, a ka aa bɔiden makalanninu ladɛn, mɔɔ kɛmɛ sawa mɔɔ tan ni sein (18), minu sɔlɔnnin aa mala kɔnɔ. Ibulama ka bila ai ɲa ka to masakɛ wolu gbɛnna haan fɔɔ so min tɔɔ yi Dan.
[15] Su lɔ, Ibulama ka aa kɛlɛkɛdennu lɔtalatala, k'ai lataa ai juulu kanma. Ai do ka nini ai juulu ma. Ibulama nu do ka to ai gbɛnna haan fɔɔ Hoba so la, Damase bolonunma fannɔ.
[16] Wo kɛ, masakɛ wolu tɛɛ vɛ fen suu suu mina mɔɔlu la, Ibulama ni aa kɛlɛjama ka fen wolu bɛ mina ai la ka seikɔ ai le, ka ta ka la a kɔlɔkɛ den Luti ni a sɔlɔnfennu bɛ kan, ani mosolu ni mɔɔ minanin tɔ bɛ.
[17] Ibulama wɔlinin see sɔlɔnna masakɛ Kedololamɛli ni a masa ɲɔɔlu ma, a seikɔtɔla, Sɔdɔmu so masa ka na a labɛnya lɔ Save folon kɔnɔ, ai y'a fɔla min ma ko Masa folon.
[18] Wo waate kelen nɔ, Salɛmu so masakɛ Mɛlikizɛdɛki, min tɛɛ Masa Taala Ala ya salakalaseba le, wo ka na bulu ni lɛzɛnji dɔ le Ibulama fɛ.
[19] A do ka duwawu kɛ Ibulama yɛ, a vɛɛ: «Masa Taala Ala yi balaka don Ibulama lɔ, Dannimasa min na sangbolo ni duukolo danna.
[20] Tanuli yi Masa Taala Ala yɛ, min na i juulu labilala i yɛ.» Ibulama ka aa kɛlɛtɔnɔ bɛ jaa bɔ k'a di Mɛlikizɛdɛki ma.
[21] Sɔdɔmu masakɛ k'a fɔ Ibulama yɛ, a vɛɛ: «Ǹa mɔɔlu lasei m̀ ma, ai sɔlɔnfennu bɛ yi to i bolo.»
[22] Ibulama do ka Sɔdɔmu masakɛ javi, a vɛɛ: «M̀ɛ m̀ bolo kɔlɔta ka ǹ kalin ǹ Tii Ala la, Masa Taala, Dannimasa min na sangbolo ni duukolo danna,
[23] ǹ ko, ǹ tɛnala i sɔlɔnfen suu suu minala i la, hali min kɛnin iwo samala dasili julu niwotɛ jese kaale kelen, alako i kana taa a fɔ, i vɛɛ: ‹Ǹe le na Ibulama labanayala.›
[24] Ǹe koni, ǹa kavelennu na min kɛla ai balo le, wo yi kɛ ǹ ta nii le. Ani fanani, i yi diɲa, ǹ taamaɲɔɔlu minu kɛnin Anɛli ni Esikoli ani Mamele le, ai y'ai ta nii ta kɛlɛtɔnɔ lɔ.»