[1] Mɔ Tii Ala k'a fɔ Ibulama yɛ, a vɛɛ: «Bɔ iya duu lɔ, bɔ i kabiladennu tɛma, bɔ i fa ya luu ma, i yi taa duu dɔ lɔ, ǹ kɛtɔ min jiyala i la.
[2] Ǹ kɛtɔ i bɔzɔnnu kɛla siboloma fangama le le. Ǹ kɛtɔ balaka donna i lɔ k'i tɔɔ buɲa, min y'a kɛ, mɔɔlu yi balaka sɔlɔn i fɛ.
[3] Mɔɔ min vɛ duwawu kɛla i yɛ, ǹ kɛtɔ balaka donna wo tii lɔ. Mɔɔ min do v'i lafeyala, ǹ kɛtɔ wo tii daanna. Dunuɲa kabila bɛ kɛtɔ balaka sɔlɔnna ile le fɛ.»
[4] Ibulama do ka taama lawuli iwo mɔ Tii Ala n'a fɔla a yɛ teme. Luti do ka taa a fɛ. Ibulama bɔ Halan so kɔnɔ, wo na bɛnna a sɔlɔn san biwolowulan ni loolu (75) le ma.
[5] Ibulama ka taa a moso Salayi le, ani a kɔlɔkɛ denkɛ Luti, ani ai bolofen ni aiya malalimɔɔlu bɛ, ai na minu masɔlɔnna Halan so kɔnɔ. Ai se Kanaan duu lɔ,
[6] Ibulama ka duu lɔtimin ka se Sɛkɛmu so kɔnɔ, Mole kɔlɔmaju ba lɔnin tɛɛ tɛɛminja. Kanaankalu tɛɛ duu wo lɔ bene wo waate lɔ.
[7] Wo kɛ, mɔ Tii Ala ka bɔ gbɛ la Ibulama yɛ k'a fɔ a yɛ, a vɛɛ: «Ǹ kɛtɔ duu min dila i bɔzɔnnu le ma.» Wo kɛ, Ibulama ka salakagbalan lɔ je mɔ Tii Ala batoko lɔ, min na bɔla gbɛla a yɛ.
[8] Ibulama ka bɔ je ka taa tinima duu dɔ lɔ, min yi Bɛtɛli so telebɔ fannɔ. A ka aa faanigbaa lɔ wo le ja, Bɛtɛli so vɛ teleben fannɔ siya le, Ayi so vɛ telebɔ fannɔ siya le. A ka salakagbalan lɔ mɔ Tii Ala batoko lɔ, a vɛ mɔ Tii Ala kilila a tɔɔ la.
[9] Wo kɔ, Ibulama ka to taamana sɛgbɛsɛgbɛ, a vɛ taala Nɛgɛbi gbɛkɛnɛ fannɔ siya le.
[10] Wo waate lɔ, kɔɔn ka don Kanaan duu lɔ. Ibulama do ka taama lawuli ko a yi taa waate kɛ Misilan, kamasɔlɔn kɔɔn fanga tɛɛ vɛ kɛwonya duu lɔ kosɛvɛ.
[11] Ai se Misilan magbɛn nɔ, Ibulama k'a fɔ a moso Salayi yɛ, a vɛɛ: «I tolomalɔ, ǹ k'a lɔn moso kein ne i le.
[12] Misilankalu v'i yena, ai kɛtɔ a fɔla, ai vɛɛ: ‹Kɛ́ wo moso le ve le!› Ai do kɛtɔ ǹ faala, ka ile to i nii la.
[13] I jon jaani, i y'a fɔ ai yɛ ko ǹ dɔɔni le i le, min y'a kɛ, ai yi ǹ lɔmina kobɛn iya ko lɔ, ǹ nii yi to ǹ nɔ.»
[14] Ibulama se mingɛnin Misilan, Misilankalu k'a ye ko Salayi keinyayine kosɛvɛ.
[15] Misilan masakɛ kankɔlɔsiilu ka Salayi ye waate min nɔ, ai ka a matɔɔ masakɛ yɛ. Ai do ka na a le masabon na.
[16] Masakɛ ka Ibulama lɔmina kobɛn Salayi ya ko lɔ. Ibulama do ka saa ni bani ni nisilu masɔlɔn, ani sofalini ni ɲɔɔmɛlu, wo ni bɔiden kɛman ni a mosoman.
[17] Kɛɛ mɔ Tii Ala ka to jɔfɔba jangalolu lala masakɛ ni aa bonkɔnɔmɔɔlu kan ka bɛn Salayi ya ko ma, Ibulama moso.
[18] Wo kɛ, masakɛ ka Ibulama kili k'a fɔ a yɛ, a vɛɛ: «I na ko suu mindɛ kɛla ǹ na yi ne? A yi di vɛ, i m'a fɔ ǹ yɛ ko i moso le min ne?
[19] I n'a fɔla dailu mindɛ la ko i dɔɔni le, m̀ɛ a ta k'a kɛ m̀ moso le? Wo lɔ saa, i moso le ne. A mina, i yi taa a le!»
[20] Masakɛ do ka jamali di aa mɔɔlu ma ka bɛn Ibulama ya ko ma. Ai do ka ale ni a moso labɔ Misilan, ani a sɔlɔnfennu bɛ.