[1] Wo yi kela waate min nɔ, Juda ka bɔ a badenmakɛlu fɛlɔ, ka taa jiya Adulamuka kɛ́ dɔ fɛlɔ, min tɔɔ tɛɛ ko Hila.
[2] Juda ka to je k'a ɲa bɔ Kanaanka singbili dɔ la, min fa tɔɔ tɛɛ ko Suwa. A ka singbili wo fulu k'i la a fɛ.
[3] Wo do ka kɔnɔ ta ka denkɛ sɔlɔn. Juda ka den wo tɔɔla ko Ɛli.
[4] A moso ka kɔnɔ ta kɔtunun ka denkɛ sɔlɔn, a ka wo tɔɔla ko Onan.
[5] A ka denkɛ gbɛlɛ sɔlɔn kɔtunun, ka wo tɔɔla ko Sɛla. Juda moso ka denkɛ wo sɔlɔn a yɛ waate min nɔ, a tɛɛ Kezibu so le kɔnɔ.
[6] Wo timinnin kɔ, Juda ka moso dɔ fulu a den kunfɔlɔ Ɛli yɛ. Moso wo tɔɔ le tɛɛ ko Tamali.
[7] Kɛɛ Ɛli tɛɛ koyonnu le kɛla mɔ Tii Ala ɲakɔlɔ. Wo le k'a kɛ, mɔ Tii Ala ka a faa.
[8] Juda k'a fɔ a den Onan yɛ, a vɛɛ: «I lɔ i lɔya lɔ numɔɔya ta fannɔ, t'i la i kɔlɔ moso fɛ, min y'a kɛ, i yi bɔzɔn sɔlɔn i kɔlɔkɛ yɛ.»
[9] Kɛɛ Onan k'a ye ko bɔzɔn vɛ sɔlɔnna, a tɛnala jatela ale ta le, fɔ a kɔlɔkɛ ta. Wo le k'a kɛ, Onan tɛɛ vɛ kɛla i lala a kɔlɔkɛ moso fɛ kotan, a tɛɛ a falilɔkɛ bɔnna duu ma, alako bɔzɔn kana sɔlɔn a kɔlɔkɛ yɛ.
[10] Mɔ Tii Ala ka Onan kɛko wo ye koyon ne le, a do ka ale fana faa.
[11] Wo kɛ mingɛnin, Juda k'a fɔ a maamoso Tamali yɛ, a vɛɛ: «T'i sii i fa ya bon na kɛsamosoya lɔ, haan fɔɔ ǹ denkɛ Sɛla vɛ buɲala.» Kamasɔlɔn Juda tɛɛ siyanna, Sɛla kana taa sa iwo a kɔlɔnu na sala teme. Wo le k'a kɛ, Tamali ka t'i sii a fa ya bon na.
[12] Waate jaan timinnin, Juda moso ka sa, Suwa denmoso. Juda masawalinin a moso sa kɔ lɔ, a ka taa Timina so kɔnɔ, aa mɔɔlu tɛɛ aa saalu si tɛɛla tɛɛminja. A tɔva Adulamuka kɛ́ Hila ka taa a malɔ.
[13] Tamali k'a mɛn ko a bilankɛ taatɔ aa saalu si tɛɛya lɔ Timina,
[14] a ka aa filiɲalu bɔ a kanna, ka bitilan bilin a kunna, ka ban ka t'i sii Enayimu so donda la, min yi Timina siya la. Kamasɔlɔn Tamali tɛɛ v'a lɔn ko ai ma a di ba Sɛla ma fulu boloma, k'a talan a vɛ ban buɲala.
[15] Juda ka Tamali ye ngɛ, a tɛɛ a kɔnɔ ko sungulunba le, kamasɔlɔn bitilan lajiinin tɛɛ a ɲa la.
[16] Juda do ka taa a fɛlɔ siya dala k'a fɔ a yɛ, a vɛɛ: «Na de, ǹ'i ǹ la i fɛ.» Tamali vɛɛ: «I kɛtɔ mindɛ dila m̀ ma, min y'a kɛ, i i la ǹ fɛ?»
[17] Juda k'a javi, a vɛɛ: «Ǹ kɛtɔ bani bolan kelen lataala i ma ka bɔ ǹa bani kulu lɔ.» Tamali vɛɛ: «Kɛɛ fɔ i yi tɔimafen to m̀ bolo, jani i yi bani lana m̀ ma.»
[18] Juda do vɛɛ: «Ǹ'i mindɛ di i ma tɔima le?» Tamali k'a javi, a vɛɛ: «Iya tɔɔmasebilafen ni a julu, ani iya taamabele min y'i bolo.» Wo fɔ a bolo, Juda ka fen wolu di a ma, ka ban ka t'i la a fɛ. Tamali do ka kɔnɔ ta a la.
[19] Tamali kɔseinin luu ma, a ka bitilan bɔ a kunna, ka aa filiɲalu bila a kanna kɔtunun.
[20] Juda ka bani bolan dɔ di Adulamuka kɛ́ ma, a tɔva koni, ko wo yi taa aa tɔimafen wolu mina moso wo la ka na la a fɛ. Kɛɛ wo ma moso sɔlɔn je.
[21] A do ka je kɛlu maɲininga, a vɛɛ: «Sungulunbamoso min t'i siila siya la Enayimu so donda la jan, mɔɔlu yi lala min fɛ ka bɛn aiya joosɔ laana ma, a yi min ne ja?» Kɛɛ ai do vɛɛ: «Sungulunbamoso m'i sii ba jan bene.»
[22] Wo kɛ, Juda tɔva k'i kɔsei a fɛlɔ k'a fɔ a yɛ, a vɛɛ: «M̀ ma moso wo sɔlɔn je. Sokɔnɔmɔɔlu do n'a fɔla ko sungulunbamoso foi m'i sii ba je bene.»
[23] Juda do vɛɛ: «Awa, a yi bolo kɛ fen wolu la, alako mɔ kana lafeyali sɔlɔn moso wo ɲininko lɔ. Ǹe koni, ǹ na bani bolan min lataala ale le ma, i do ma a ye.»
[24] Kalo sawa jate timinnin, ai k'a fɔ Juda yɛ, ai vɛɛ: «I maamoso Tamali vɛ ɲɔmɔya kɛ. A do vɛ kɔnɔ ta ɲɔmɔya lɔ.» Wo mɛn Juda bolo, a do vɛɛ: «Ài yi taa a le so kɔma, ài y'a lafili taa lɔ!»
[25] Ai tɛɛ taala a le so kɔma waate min nɔ, Tamali ka sama bila a bilankɛ ma, a vɛɛ: «Fen minu mafɛlɛn k'a ye jene ta yi tɔɔmasebilafen min ne ani a julu, ka la taamabele min kan. Kɛ́ min na kɔnɔ lala ǹ na, ale le ta yi wolu le.»
[26] Juda ɲanɔ ka to a bolofen wolu ma. A do vɛɛ: «Jo yi Tamali bolo ka timin ǹ na, kamasɔlɔn ǹ ka m̀ ban a diko ma ǹ denkɛ Sɛla ma fulu boloma.» Juda do m'i la Tamali fɛ wo kɔ.
[27] Tamali densɔlɔn waate senin, ai k'a ye ko filaninnu le.
[28] A ka to tin nɔ, ai lɔ kelen ka a bolo labɔ. Denmoila ka den bolo mina ka jese wulɛn dɔ sili a la. A do vɛɛ: «Min ne sɔlɔnnin kunfɔlɔ le.»
[29] Kɛɛ den ka a bolo madon a la feeya, a filaninɲɔɔ vɛ sɔlɔnna. Denmoila do vɛɛ: «Koo, i vɛ siya bɔ i jɛlɛ yɛ!» Wo le k'a kɛ, ai ka den tɔɔla ko Pɛlɛzi (wo kɔlɔ le ko: «Jɛlɛkanu siyabɔba»).
[30] Wo kɛ, a baden ka sɔlɔn a kɔ, jese wulɛn silinin vɛ a bolo la. Ai do ka wo tɔɔla ko Zela (Wo kɔlɔ le ko: «Kɛnɛbɔ»).