[1] Sangbolo ni duukolo bɛ dannin wo ɲa le ma ka ban, ani ai kɔnɔlɔfen suu bɛ.
[2] Tele wolowulanna lon ka se, k'a talan Ala tɛɛ vɛ ban aa baalelu la. A tele wolowulanna lon, a k'i nɔningɛ aa baale bɛ ma.
[3] Ala ka balaka don tele wolowulanna lon nɔ, k'a kɛ lɔhɔlɔma lon ne, kamasɔlɔn a k'i nɔningɛ aa dunuɲa dan baale bɛ ma wo lon ne.
[4] Sangbolo ni duukolo danɲa taliku le ne, mɔ Tii Ala ka sangbolo ni duukolo dan waate min nɔ. Mɔ Tii Ala ka duukolo ni sangbolo dan waate min nɔ,
[5] bin suu suu tɛɛ tɛ duukolo kɔkan bene, ani sɛnɛfen foi tɛɛ ma fɛlɛn ba, kamasɔlɔn mɔ Tii Ala tɛɛ ma sanji lana ba duukolo kɔkan bene, ani mɔɔ tɛɛ tɛ je duu labaaleko lɔ.
[6] Kɛɛ ji le tɛɛ bɔla duu kɔlɔ, a vɛ duu fan bɛ sɔla ji la.
[7] Wo waate lɔ, mɔ Tii Ala ka kɛ́ dan ka bɔ duu bamu lɔ, ka ban ka niifɔɲɛ fɛ kɛ́ nunwoo lɔ, kɛ́ do ka kɛ niimani le.
[8] Mɔ Tii Ala ka gbele labɔ Edɛn duu kɔnɔ, telebɔ fannɔ siya le, ka ban ka kɛ́ bila gbele wo kɔnɔ, a na kɛ́ min danna.
[9] Mɔ Tii Ala ka kɔlɔmaju suu bɛ dɔ lafɛlɛn duu kɔkan je, minu ɲalaye keinyanin, ai do yi dɔnnifen ɲuma le le. Niimaya kɔlɔma le tɛɛ gbele tɛma, ani lɔnni kɔlɔma min yi mɔɔ lalɔnnila kokein ni koyon wotɛbɔ la.
[10] Kɔɔ dɔ tɛɛ bɔla Edɛn duu kɔnɔ ka na timin gbele wo lɔ ka a fan bɛ sɔ ji la. Kɔɔ wo timinnin gbele wo lɔ, a ka falanfalan a ma, ka kɛ bolo naani le.
[11] A bolo kunfɔlɔ tɔɔ le ko Pison. Wo le Havila duu lɔtiminna, sanu yi sɔlɔnna tɛɛminja.
[12] Duu wo sanu keinyanin. Kɔlɔmajɛn sumadiyanin yi sɔlɔnna je, ai y'a fɔla min ma ko bedeleyumu, ani kawa fin kulugbɛlɛn, ai y'a fɔla min ma ko oniki.
[13] A bolo filana tɔɔ le ko Gihon. Wo le yi Kusi duu lɔtiminna.
[14] A bolo sawana tɔɔ le ko Tigile. Wo le Asiliya duu telebɔ fan lɔtiminna. A bolo naanina tɔɔ le ko Efilati.
[15] Mɔ Tii Ala ka kɛ́ bila Edɛn gbele lɔ ko a yi gbele labaale k'i jando a lɔ.
[16] Mɔ Tii Ala k'a fɔ kɛ́ yɛ, a vɛɛ: «I yi sene kɔlɔmaden suu bɛ dɔ dɔnna gbele min nɔ,
[17] kɛɛ do, lɔnni kɔlɔma min yi mɔɔ lalɔnnila kokein ni koyon wotɛbɔ la, i kà wo den dɔn dɛ! I v'a dɔnna lon min na, i satɔle dɛ!»
[18] Mɔ Tii Ala k'a fɔ, a vɛɛ: «A tɛ bɛn k'a fɔ ko kɛ́ kelen yi to. Ǹ kɛtɔ a madɛmɛnba ladanna, min yi bɛn a ma.»
[19] Wo kɛ, mɔ Tii Ala ka tuukɔlɔsoo suu bɛ ni kɔnɔ suu bɛ dan ka bɔ duu bamu lɔ, ka ban ka na ai le kɛ́ fɛ, min y'a kɛ, a a ye kɛ́ kɛtɔ wolu tɔɔlala teme. Kɛ́ na tɔɔ kelenkelenna minu fɔla niimafennu ma, wo le lu ka kɛ ai tɔɔlu le.
[20] Kɛ́ ka kolofen ni kɔnɔ ani tuukɔlɔsoolu bɛ tɔɔla, kɛɛ a madɛmɛnba ma sɔlɔn wolu lɔ, min yi bɛn a ma.
[21] Wo kɛ, mɔ Tii Ala ka sunɔɔ ba lajii kɛ́ kan. A ka to sunɔɔ lɔ, Ala ka a balasa kolo kelen ta, ka bu lasei a nɔ lɔ.
[22] Mɔ Tii Ala na balasa kolo min bɔla kɛ́ lɔ, a ka wo ladan moso le, ka ban ka na a le kɛ́ fɛ.
[23] Kɛ́ do vɛɛ: «Dɔ min yi ǹ ɲɔɔzii le le! A kolo bɔnin ǹ kolo le lɔ. A bu bɔnin m̀ bu le lɔ. Ai kɛtɔ a fɔla a ma ko moso, kamasɔlɔn a bɔnin kɛ́ le lɔ.»
[24] Ka bɛn wo ma, kɛ́ bɔtɔle a fa ni a ba fɛ, ka ale ni a moso dɛn, fɔsa ai mɔɔ fila yi kɛ falikolo kelen ne.
[25] Wo waate lɔ, kɛ́ ni a moso mɔɔ fila fali makolon ne tɛɛ, kɛɛ ai tɛɛ ma maloya lɔn.