[1] Mɔ Tii Ala ka bɔ gbɛ la Ibulahima yɛ, Mamele ya kɔlɔmajulu dafɛ, a tɛɛ siinin aa faanigbaa da la waate min nɔ, telelatelen waate.
[2] Ibulahima ka to je, a k'a kun lawuli ka kɛ́ sawa lɔnin ye a ɲatelenma lɔ. A k'ai ye ngɛ, a ka bɔ aa faanigbaa da la ka taa ai labɛn bɔli le, ka t'i bilin duu ma ai sen kɔlɔ.
[3] A do vɛɛ: «Ǹ kuntiilu, ni ǹa ko diyanin ka kɛ ài yɛ, ài jon, ài kà timin ǹ na tan.
[4] Ài lɔ, ai yi na ji dɔ le, ài y'ài sen mako, ka ban k'ài nɔningɛ kɔlɔma min kɔlɔ.
[5] Ni ài vɛ na ka bɔ ǹe àiya bɔiden ma, wo vɛ kɛla, ài lɔ, ǹ'i na fenni ne, ài y'a dɔn, min y'a kɛ, ài falilɔ yi fɔlin ài kan. Wo vɛ kɛla, ài yi taa àiya taaman na.» Ai do vɛɛ a yɛ: «Awa, a kɛ iwo i n'a fɔla teme.»
[6] Wo kɛ, Ibulahima ka don faanigbaa kɔlɔ telemanin k'a fɔ Salan yɛ, a vɛɛ: «I lateleja, i yi sɛnɛfen kɛsɛ muu ɲuma nɛɛ ɲa sawa suma, ka bulu gbasi.»
[7] Wo fɔ Ibulahima bolo, a vɛ bɔlila ka taa aa nisilu ma, ka nisi bolan ɲuma dɔ mina ai lɔ, min yi soo mɛlɛn ne. A ka nisi wo don aa bɔiden dɔ bolo, wo do ka taa a lɔbɛn falafala.
[8] Wo kɛ, Ibulahima ka nɔnɔ lasilinin ni nɔnɔ kɛnɛ dɔ ta, ani nisi soo tiinin, ka taa wo bɛ sii lona sawa kɛɛna. A ka to lɔnin ai dafɛ kɔlɔma kɔlɔ, ai vɛ dɔnni la.
[9] Ai do k'a maɲininga, ai vɛɛ: «I moso Salan yi mineja?» Ibulahima vɛɛ: «A yi faanigbaa kɔlɔ jan.»
[10] Ai lɔ mɔɔ kelen vɛɛ: «I yi la a la, ǹ seikɔtɔ i fɛlɔ jan numaija min ɲɔɔzii saa lɔ. Wo kɛtɔ a talanna, i moso Salan vɛ denkɛ sɔlɔn.» Wo k'a talan, Salan lɔnnin tɛɛ faanigbaa donda la kɛ́ kɔma, a tolomalɔnin vɛ kɛ́ kumakan na.
[11] Wo waate, Ibulahima ni Salan mɔɔ fila tɛɛ vɛ kɔlɔya bubale. Salan tɛɛ tɛ aa laana yena butu.
[12] Kuma wo mɛn Salan bolo, a ka jɛlɛ a jɛlɛ ma, a vɛɛ: «Ǹe kɔlɔyanin teme butu, ǹ fali vɛ jɔwɔ. Ǹ kuntii fana vɛ kɔlɔya bubale. Ǹ kɛtɔ bonnasii diya lɔnna wo lɔ di?»
[13] Mɔ Tii Ala k'a fɔ Ibulahima yɛ, a vɛɛ: «Salan tɛɛ mindɛ jɛlɛla, a tɛɛ a fɔla, a vɛɛ: ‹Ǹe kɔlɔyaɲa min ne, ǹ kɛtɔ den sɔlɔnna di vɛ?›
[14] Jalasa wo ko yi je, i Tii Ala yi kaɲala min ma? Ǹ seikɔtɔ i fɛlɔ jan, numaija min ɲɔɔzii waate latɛɛnin nɔ. Wo kɛtɔ a talanna, Salan vɛ denkɛ sɔlɔn.»
[15] Kɛɛ siyan kosɔn, Salan k'i sɔsɔ wo ko la, a vɛɛ: «Ǹe ma jɛlɛ dɛ!» Ala do vɛɛ: «I na jɛlɛla jɔ!»
[16] Kɛ́ wolu k'i wuli ngɛ ko ai taatɔle, ai k'ai ɲa lajii Sɔdɔmu so fannɔ siya le. Ibulahima do ka taa ai lɔsiya.
[17] Mɔ Tii Ala k'a fɔ a jɛlɛ yɛ, a vɛɛ: «A bɛnnin tɛ ǹ'i ǹa kojatesiinin doon Ibulahima ma,
[18] kamasɔlɔn siboloma fangama ba bɔtɔ ale lɔ, ani dunuɲa siboloma bɛ kɛtɔ balaka sɔlɔnna ale le fɛ.
[19] Ǹ na Ibulahima le tala, min y'a kɛ, a a dennu ni aa demayalu bɛ jamali ko ai yi ǹa siya lataama ka kotelenninu kɛ, fɔsa ǹ'i ǹa lahedilu mafa Ibulahima yɛ teme.»
[20] Wo kɛ, mɔ Tii Ala k'a fɔ Ibulahima yɛ, a vɛɛ: «M̀ɛ makasilikan siyama mɛn ka bɛn Sɔdɔmuka ni Gɔmɔlikalu ma, ko àiya julumbu vɛ wala k'a dannatimin.
[21] Wo le kɛtɔ a kɛla, ǹ jiitɔ ai lakɔlɔsiya lɔ, min y'a kɛ, ǹ'a lɔn ni a yi tuɲa le le ǹ na min mɛnna ka bila ai ma.»
[22] Wo kɛ, kɛ́ fila wolu ka bɔ je ka taa Sɔdɔmu, kɛɛ Ibulahima lɔnin ka to mɔ Tii Ala ɲakɔlɔ.
[23] Ibulahima k'i madon a la k'a maɲininga, a vɛɛ: «I kɛtɔ mɔɔ telennin ni mɔɔ yonnu bɛ kunnafilila i ɲɔɔ fɛ?
[24] Ni a k'a talan mɔɔ telennin biloolu yi (50) so kɔnɔ, wo bɛ kɔ, i kɛtɔ je kunnafilila? I tɛ so to je ka bɛn mɔɔ telennin biloolu (50) wolu ya ko ma, minu siinin je?
[25] Ka mɔɔ telenninu faa mɔɔ yonnu fɛ, i tɛnala ko suu wo kɛla feu! I tɛnala diɲala ka mɔɔ telennin ni mɔɔ yonnu jate kelen ne. I tɛnala ko suu wo kɛla feu! Ile min yi dunuɲa muumɛ kititɛɛba le, i tɛnala kiti tɛɛla telenmandeya boloma?»
[26] Mɔ Tii Ala ka Ibulahima javi, a vɛɛ: «Ni ǹ ka mɔɔ telennin biloolu (50) talan Sɔdɔmu so kɔnɔ, ǹ kɛtɔ so tola je ka bɛn wolu ya ko ma.»
[27] Ibulahima k'a fɔ a yɛ kɔtunun, a vɛɛ: «Ǹ'i m̀ wakalila ka kuma i fɛ, Masaba, kamasɔlɔn ǹ tɛ foi le fɔ bamu ni buuli.
[28] Ni a k'a talan mɔɔ loolu le dɛsɛnin mɔɔ telennin biloolu (50) lɔ, i kɛtɔ je halakila ka bɛn mɔɔ loolu wo ma, minu dɛsɛnin?» Mɔ Tii Ala k'a javi, a vɛɛ: «Ni ǹ ka mɔɔ telennin binaani ni loolu (45) talan so kɔnɔ, ǹ tɛnala so halakila.»
[29] Ibulahima k'a fɔ a yɛ kɔtunun, a vɛɛ: «Ni mɔɔ telennin binaani (40) ka talan so kɔnɔ do?» Mɔ Tii Ala vɛɛ: «Ka bɛn mɔɔ binaani wo ma, ǹ tɛnala je halakila.»
[30] Ibulahima vɛɛ: «Masaba, i jon. I k'i josolakuna m̀ ma, ǹ'a fɛ ka kuma dɔ le fɔ. Ni mɔɔ telennin bisawa (30) ka talan so kɔnɔ do?» Mɔ Tii Ala vɛɛ: «Ni ǹ ka mɔɔ telennin bisawa (30) talan je, ǹ tɛnala je halakila.»
[31] Ibulahima vɛɛ: «Ǹ'i m̀ wakalila ka kuma i fɛ, Masaba. Ni mɔɔ telennin muan ka talan so kɔnɔ (20) do?» Mɔ Tii Ala k'a javi, a vɛɛ: «Ǹ tɛnala je halakila ka bɛn mɔɔ muan (20) wo ma.»
[32] Ibulahima vɛɛ: «Masaba, i k'i josolakuna m̀ ma. Ǹa kuma dan ne ne. Ni mɔɔ telennin tan ka talan so kɔnɔ do?» Mɔ Tii Ala vɛɛ: «Ǹ tɛnala je halakila ka bɛn mɔɔ tan wo ma.»
[33] Mɔ Tii Ala wɔlinin kumala Ibulahima fɛ, a ka taa. Ibulahima do k'i kɔsei aa luu ma.