[1] Kɛɛ Ala hangili ka to Nuho lɔ ani tuukɔlɔsoolu ni kolofennu, minu tɛɛ a fɛ kulunba kɔnɔ. Ala ka fɔɲɛ ba lana duukolo kɔkan. Tufanaji do k'i majii damina.
[2] Duukɔlɔ ji siiyalu ani sangbololɔ ji siiyalu dalu la ka tuun. Sanji do ka tɛɛ.
[3] Ji ma ka to jiila dɔni dɔni duukolo kɔkan. Tele kɛmɛ ni biloolu (150) yi dafala waate min, wo k'a talan, ji ma tɛɛ vɛ dɔɔya.
[4] San kalo wolowulan, tele tan ni wolowulanna (17), kulunba k'i sii tini dɔ kɔkan Alalati duu lɔ.
[5] Ji ma ka to dɔɔyala fɔɔ ka se san kalo tanna ma. Wo kalo tele kunfɔlɔ, tinilu kun ka bɔ gbɛ la.
[6] Tele binaani (40) gbɛlɛ timinnin, Nuho ka kulun fɔɲɛdonya dɔ laka,
[7] ka ngaawɔni dɔ bila. Wo do vɛ bɔla ka to taa ni seila, haan fɔɔ ji ka ja duukolo kɔkan waate min nɔ.
[8] Wo kɔ, a ka poponi dɔ bila k'a ye ni ji vɛ dɔɔya duukolo kɔkan.
[9] Kɛɛ poponi ma siiya sɔlɔnna. A do k'i kɔsei ka na Nuho fɛ kulunba kɔnɔ, kamasɔlɔn ji tɛɛ duukolo fan bɛ lɔ bene. Nuho ka a bolo lɔsama ka poponi mina, ka a ladon a fɛ kulunba kɔnɔ.
[10] A ka makɔnɔli kɛ tele wolowulan kɔlɔ, ka ban ka poponi bila kɔtunun.
[11] Poponi do k'i kɔsei Nuho fɛ wulala, zeituna bulu kɛnɛ vɛ a da la. Nuho k'a lɔn wo le ma ko ji ma vɛ dɔɔya duukolo kɔkan.
[12] A ka makɔnɔli kɛ tele wolowulan gbɛlɛ kɔlɔ, ka ban ka poponi bila. Wo do m'i kɔsei Nuho fɛ butu.
[13] Wo waate lɔ, Nuho si tɛɛ san kɛmɛ wɔɔlɔ san kelen (601) ne le. Ji ja duukolo kɔkan, wo na bɛnna san kalo kunfɔlɔ tele kunfɔlɔ le ma. Nuho do ka kulun kunmabilinfen bɔ kulun kɔkan, k'a ye ko ji vɛ ja duukolo kɔkan.
[14] Wo san kalo filana, tele muan ni wolowulan (27) ka se, k'a talan duuma tɛɛ vɛ ja.
[15] Wo kɛ, Ala ka kuma Nuho yɛ, a vɛɛ:
[16] «I yi bɔ kulunba kɔnɔ, ile ni i moso, ni i denkɛlu ani i maamosolu.
[17] I yi niimafen bɛ labɔ i fɛ: kɔnɔlu, tuukɔlɔsoolu, kolofennu, ani niimafen mɛsɛnnu. Wo le y'a kɛ, ai yi jili ka siyaya duukolo fan bɛ lɔ.»
[18] Wo fɔ, Nuho ka bɔ kulunba kɔnɔ, ale ni a denkɛlu, ni a moso ni a maamosolu.
[19] Soo bɛ, niimafen mɛsɛn bɛ, ani kɔnɔ bɛ, fen suu suu yi taamana duukolo kɔkan, wolu bɛ ka bɔ kulunba kɔnɔ, ai bɛ ni ai ta suu.
[20] Wo timinnin kɔ, Nuho ka salakagbalan lɔ mɔ Tii Ala yɛ. A do ka soo ni kɔnɔ ladaannin suu bɛ dɔ ta k'ai ɲɛnin salaka le salakagbalan kɔkan.
[21] Mɔ Tii Ala ka salaka wo suma diyanin mɛn. A do vɛɛ a jɛlɛ yɛ: «Ǹ tɛnala duu daanna mɔɔnivinnu ya ko lɔ butu, hali ai josokun fanin ka kɛ miliya juu la ka damina aiya denniya waate ma ka taa. Ǹ tɛnala niimafen bɛ halakila butu, iwo ǹ n'a kɛla teme yi ne.
[22] Damanda duukolo yi je, sɛnɛkɛ waate ni sɛnɛfen kali waate, nɛnɛbɔ waate ni fundesii waate, sanmaji ni telema, su ni tele, wolu totɔ a ɲa le ma kudein.»