[1] Ibulahima ka bɔ je ka taama damina ka taa Nɛgɛbi gbɛkɛnɛ fannɔ siya le. A do ka t'i sii Kadɛsi ni Suli wotɛ. A ka to Gelali so kɔnɔ lonaya boloma,
[2] a k'a fɔ je mɔɔlu yɛ ko Salan yi a dɔɔni ne le. Wo le k'a kɛ, Gelali masakɛ Abimɛlɛki ka aa mɔɔlu lɔ Salan tala ka na a le aa bon na.
[3] Kɛɛ Abimɛlɛki ka to sunɔɔ lɔ su lɔ, Ala ka bɔ gbɛ la a yɛ siwo lɔ, a vɛɛ a yɛ: «Abimɛlɛki, i faatɔle, kamasɔlɔn i na moso min tala yi ne, a fuluyine!»
[4] Wo k'a talan, Abimɛlɛki tɛɛ ma se ba Salan ma bene. A do vɛɛ: «Masaba, i diɲatɔ ka ǹe ni ǹa mɔɔlu halaki, k'a talan mɔ ma koyon kɛ?
[5] Ale kɛ́ jɛlɛ le ma a fɔ ǹ yɛ ko a dɔɔni ne? Moso fana ma a fɔ ko a kɔlɔ le? Ǹe koni, ǹ na ko min kɛla josolɔgbɛya le le, ani m̀ bolo lasɛnɛyanin.»
[6] Ala ka Abimɛlɛki javi siwo kelen wo lɔ, a vɛɛ: «Iin, ǹ k'a lɔn ko i na ko min kɛla josolɔgbɛya le le. Ǹe le n'i dansiila julumbu tako lɔ ǹ na. Wo le n'a kɛla, m̀ ma diɲa i yi se a ma.
[7] Wo lɔ saa, i yi kɛ́ wo moso lasei a ma, kamasɔlɔn ǹa keladen ne a le. A kɛtɔ madaili kɛla i yɛ, min y'a kɛ, i nii yi to i lɔ. Ni i do ma a moso lasei a ma, i yi la a la k'a fɔ ko i faatɔle, ile ni iya mɔɔlu bɛ!»
[8] Abimɛlɛki k'i wuli sɔɔmadanina ka a kankɔlɔsii bɛ kili. A wɔlinin wo bɛ ɲafɔla ai yɛ, ai ka siyan bubale.
[9] Wo kɛ, Abimɛlɛki ka Ibulahima kili k'a fɔ a yɛ, a vɛɛ: «I na ko suu mindɛ kɛla mɔ la yi ne? Ǹ na kolɔtiɲa suu mindɛ kɛla i la fɔɔ i vɛ kolɔtiɲa ba dɛgbɛ min kunko la ǹe ni ǹa jamanakɔnɔmɔɔlu kun? I na min kɛla ǹ na, mɔɔ man kan ka wo kɛ i mɔɔɲɔɔ la tuun!»
[10] Abimɛlɛki k'a fɔ Ibulahima yɛ kɔtunun, a vɛɛ: «I na wo kɛla dailu mindɛ la?»
[11] Ibulahima k'a javi, a vɛɛ: «Kamasɔlɔn ǹ n'a fɔ yi la m̀ miliya lɔ, ǹ ko: ‹Alaɲasiyanɲɛbali gbaanzan ne lu yi dingila min nɔ. Ai do kɛtɔ ǹ faala ka bɛn m̀ moso ya ko ma.›
[12] Ani fanani, ǹ dɔɔmoso bɛlɛbɛlɛ le a le. Ǹu mɔɔ fila yi fa kelen ne ma, kɛɛ mɔ tɛ ba kelen ma. Ǹ na a fulu le la.
[13] Waate min nɔ Ala ka ǹ kili ko ǹ'i bɔ ǹ fa ya bon na ka kɛ timintiminkɛba le, ǹ k'a fɔ m̀ moso yɛ, ǹ ko: ‹Ǹ'a fɛ i yi kanundeya min jiya ǹ na, wo le ne. Mɔ vɛ sena tɛɛ o tɛɛ lɔ, i y'a fɔ je mɔɔlu yɛ ko i kɔlɔ le ǹ ne.› »
[14] Wo kɛ, Abimɛlɛki ka saa ni bani ni nisi dɔlu ta, ani jɔn kɛman ni a mosoman, ka wolu don Ibulahima bolo, ka ban ka a moso Salan lasei a ma.
[15] Abimɛlɛki do vɛɛ: «Ǹa duu labilanin i yɛ. Tɛɛ min vɛ i diyala, i t'i sii woja.»
[16] A k'a fɔ Salan yɛ, a vɛɛ: «A ye, m̀ɛ wɔligbɛ gbanan waa kelen (1 000) di i kɔlɔkɛ ma. Wo kɛtɔ tɔɔmase le le k'a jiya iya mɔɔ bɛ la ko i vɛ tuɲa sɔlɔn.»
[17] Wo k'a talan, Abimɛlɛki moso ni aa jɔnmosolu ma tɛɛ vɛ lɔ mɔ Tii Ala bolo, ka bɛn Salan ya ko ma, Ibulahima moso. Kɛɛ Ibulahima ka Ala dali waate min nɔ, Ala ka Abimɛlɛki ni a moso ni aa jɔnmosolu lakɛnɛya. Ai do ka den sɔlɔn damina kɔtunun.