[1] Wo kɛ, Jusufu ka taa a fɔ masakɛ yɛ, a vɛɛ: «Ǹ fa ni m̀ badennu vɛ na yi ne ka bɔ Kanaan duu lɔ, ailu ni aiya saa ni bani ni nisilu, ani ai sɔlɔnfennu bɛ. Ai yi Gosɛn duu lɔ yi ne.»
[2] Jusufu do ka mɔɔ loolu ta a kɔlɔnu lɔ, ka wolu jiya masakɛ la.
[3] Masakɛ k'ai maɲininga, a vɛɛ: «Àilu baaleda y'a suu mindɛ le?» Ai ka masakɛ javi, ai vɛɛ: «Maa kuntii, m'i kolofenkunnasiiba le le, iwo mɔ bemanu tɛɛ teme.»
[4] Ai vɛɛ masakɛ yɛ kɔtunun: «Mɔ nanin ka waate kɛ Misilan, kamasɔlɔn bin tɛɛ Kanaan duu lɔ butu maa saa ni banilu dɔnko lɔ. Kɔɔn fitina fanga vɛ wala woja. Wo lɔ saa, i yi diɲa, m'i sii Gosɛn duu lɔ.»
[5] Wo fɔ, masakɛ vɛɛ Jusufu yɛ: «I fa ni i badenmalu vɛ na i fɛ.
[6] Misilan jamana labilanin i yɛ. Taa i fa ni i badenmalu lasii maa duu fan bɛ lɔ kein nɔ. Ai y'ai sii Gosɛn duu lɔ. I do ka mɔɔ minu lɔn mɔɔ sɔvɛ le ai tɛma, i yi wolu lasii ǹ jɛlɛkanu ya kolofennu kunna.»
[7] Wo fɔ masakɛ bolo, Jusufu ka na a fa Janguba le ka a lalɔ masakɛ kɛɛna. Janguba do ka duwawu kɛ masakɛ yɛ.
[8] Masakɛ ka Janguba maɲininga, a vɛɛ: «Ǹ fa, i sɔlɔn vɛ san jein bɔ?»
[9] Janguba vɛɛ: «M̀ɛ san kɛmɛ ni bisawa (30) le kɛ timintiminna dingila ni dingilalu wotɛ. M̀ ma sikunnɔjaan sɔlɔn iwo ǹ fanu ǹ n'a sɔlɔnna teme, minu fana tɛɛ timintiminna dingila ni dingilalu wotɛ. Ǹe do vɛ tɔlɔya siyama masɔlɔn dunuɲa.»
[10] Wo fɔ Janguba bolo, a ka duwawu kɛ masakɛ yɛ ka ban ka bɔ a kɛɛna.
[11] Jusufu ka a fa ni a badenmalu lasii Misilan ten ne, ka duu bɛ lɔ kein di ai ma k'a kɛ ai ta le, Lamɛsɛsi so magbɛn nɔ, iwo masakɛ na jamali dila teme.
[12] Jusufu do tɛɛ a fa ni a badenmalu ani a fa ya demayalu bɛ lasonna, ka bɛn demaya kelenkelenna bɛ kɔndɛ jate ma, hali den mɛsɛnnilu.
[13] Waate ka se, balo ka ban duukolo fan bɛ lɔ, kamasɔlɔn kɔɔn fitina fanga tɛɛ vɛ wala bubale. Misilanka ni Kanaankalu bɛ lɔ tɛɛ vɛ ban kɔɔn bolo.
[14] Jusufu ka to sɛnɛfen kɛsɛ felela, haan fɔɔ Misilanka ni Kanaankalu ya wɔli bɛ ka to a bolo. A do ka wɔli wolu bila masakɛ ya nafolo ladaloya lɔ.
[15] Wɔli bannin Misilanka ni Kanaankalu bolo, Misilankalu bɛ vɛ nala Jusufu fɛlɔ, ai v'a fɔla a yɛ, ai vɛɛ: «Balo di vɛ mɔ ma! Mɔ vɛ sala i ɲakɔlɔ ka bɛn maa wɔlitanya ma, wo yi bɛnne?»
[16] Jusufu k'ai javi, a vɛɛ: «Ni àiya wɔli vɛ ban, wo vɛ kɛla, ài yi na àiya kolofennu le, ǹ'i wolu mafalin balo la.»
[17] Wo fɔ Jusufu bolo, ai ka na damina aiya kolofennu le a fɛlɔ. A do ka balo di ai ma aiya soolu ni aiya saalu ni aiya banilu ni aiya nisilu ani aiya sofalinilu mafalin ne. Jusufu k'ai bɔ kɔɔn bolo ten ne wo san na, a vɛ balo dila ai ma aiya kolofen mafalin ne.
[18] San wo timinnin, ai ka na Jusufu fɛlɔ wo sanɲɔɔmɛn nɔ k'a fɔ a yɛ, ai vɛɛ: «Maa kuntii, mɔ tɛ se maa wɔlitanya doonna i ma. Maa kolofen bɛ vɛ kɛ i ta le fana. Min tonin mɔ bolo butu, wo le mɔ jɛlɛkanu ni maa sɛnɛkɛ duulu le.
[19] Ni ǹu ni maa sɛnɛkɛ duulu ka halaki i ɲakɔlɔ kelen ne, wo yi bɛnne? Wo lɔ saa, i yi diɲa, m'i ǹu ni maa sɛnɛkɛ duulu di balo mafalin ne. M'i kɛ masakɛ ya bɔidennu le, mɔ jɛlɛkanu tanin ka la maa sɛnɛkɛ duulu kan. I yi diɲa, i yi sɛnɛfensi di vɛ mɔ ma fana, alako maa sɛnɛlu lɔkolon kana to.»
[20] Jusufu ka Misilan duu bɛ san masakɛ yɛ, kamasɔlɔn Misilankalu bɛ tɛɛ aiya sɛnɛkɛ duulu felela, ka bɛn kɔɔn fanga wala ɲa ma ai ma. Duu bɛ ka kɛ Misilan masakɛ ta le ten ne.
[21] Ka bɔ Misilan kun dɔ la ka taa se a kun dɔ la, Jusufu ka jamanakɔnɔmɔɔlu bila bɔidenya lɔ.
[22] Fɔ duu minu tɛɛ salakalasebalu bolo, Jusufu ma wolu san, kamasɔlɔn Misilan masakɛ tɛɛ vɛ tɔn sii ko ale totɔ salakalasebalu sɔla kudein. Ai do tɛɛ balola wo le la. Wo le k'a kɛ, ai ma ai ta duulu fele.
[23] Wo kɛ Jusufu bolo, a k'a fɔ jama yɛ, a vɛɛ: «A ye, m̀ɛ àilu ni àiya duulu san Misilan masakɛ yɛ bi. Wo ma yi ne, ài yi sɛnɛfensi minu ta, ài yi taa a falin àiya sɛnɛlu lɔ.
[24] Ài vɛ kɛla sɛnɛfen kalila, ài yi wo lɔtala ka a looluna lɔsii di masakɛ ma. A lɔtala naanina lɔsii kɛtɔ ài ta le le. Wo le kɛtɔ sɛnɛfensi ni balo le àilu ni ài denmɛsɛnnilu ani àiya bonkɔnɔmɔɔ tɔ bɛ yɛ.»
[25] Ai ka Jusufu javi, ai vɛɛ: «Maa kuntii, i vɛ mɔ nii lakisi yi ne. M'a fɛ maa ko yi to diyala i yɛ. Mɔ do kɛtɔ Misilan masakɛ ya bɔiden ne.»
[26] Jusufu ka tɔn sii Misilan jamana lɔ ko sɛnɛfen min vɛ kalila, wo lɔtala looluna lɔsii yi kɛ Misilan masakɛ ta le. Tɔn wo yi je hali bi. Salakalasebalu ta duulu le kelenpesa ma kɛ masakɛ ta le.
[27] Bani-Isilankalu k'i sii Misilan jamana kɔnɔ ten ne, Gosɛn duu kɔnɔ. Ai do ka duutiiya kɛ je, ai vɛ jilila ka siyaya bɛlɛbɛlɛ kɛ.
[28] Janguba ka san tan ni wolowulan (17) ne kɛ Misilan jamana lɔ. A si danmajiya ka kɛ san kɛmɛ san binaani ni wolowulan (147) ne le.
[29] Janguba sa waate masulunyanin, a ka a denkɛ Jusufu kili k'a fɔ a yɛ, a vɛɛ: «Ni ǹa ko diyanin ka kɛ i yɛ, i i bolo la m̀ wolo kɔlɔ k'i kalin ǹ yɛ, k'a fɔ ko i kɛtɔ ǹ lɔminala kanundeya ni kankelentiiya bolo le ma. I kà ǹ sudoon Misilan.
[30] M̀ɛ taala ǹ fanu fɛlɔ waate min nɔ, i yi ǹ fuleni ta ka bɔ a le Misilan, i yi taa ǹ sudoon ǹ fanu ya kabila kabuluso la.» Jusufu k'a javi, a vɛɛ: «Ǹ kɛtɔ a kɛla iwo i n'a fɔla teme.»
[31] Janguba do vɛɛ a yɛ: «I kalin ǹ yɛ.» Jusufu k'a kalin a yɛ. Wo fɔ, Janguba k'i bilin aa lafen kun kan ka Ala bato.